1. Melkizedek Salemacho raiza ani Bhov-Vortea Devacho iadnik aslo. Razancher zoit vhorun Abraham' porto ietalo tednam, Melkizedek taka mell'llo ani tannem Abrahamak axirvad dilo.
2. Tednam Abrahaman apunn gheun ail'lo titleacho-i dhavo vantto taka dilo. Melkizedek, tachea nanvacho ôrth dhôrun, poilê svater "Promannikponnacho Raza"; tea bhair, to Salemacho raza dekhun, to "Xanticho Raza".
3. Tachea bapaichi vô avôichi, nhoi mhonn tachea khoincheach purvozachi, khoboruch na; to kednam zolmolo vô kednam melo hachi-i khobor na. Tachem iadnikponn Devachea Putachea iadnikponna sarkem: sodankal Melkizedekachi itlich khobor urtoli, ki to iadnik.
4. Tôr to kitlo vorto to polleiat: amchea porzapoti Abrahaman porian zhuzachê luttichea mhalacho boreantlo boro dhavo vantto taka dilo.
5. Soglli Israelachi porza Abrahamachi sonsôt, punn fokot Levichea kullantle ki iadnik zatat; tôri, je iadnik asat, tankam Somurti pormannem porjê koddsun, mhonngê apleach bhavam-bhoinnim koddsun, dhavo vantto vôsul korcho kaido asa.
6. Melkizedek Abrahamachê sonstintlo nhoi aslo. Tôri astana, tannem Abrahama koddcho dhavo vantto ghetlo ani Devacheô bhasavnniô ghetlolea Abrahamak tannem axirvad dilo.
7. Dubava virêt axirvad dita to axirvad ghetolea poros vorto.
8. Tea bhair, dhavo vantto ghetat te êk dis mortole tosle sade monis; punn Melkizedeka vixim oxem sangchem asa: amkam mhaiti asa tea pormannem, zachea mornnachi khoboruch na, tannem Abrahama koddcho dhavo vantto ghetlo.
9. Mhonnttôch, orxem Levi dusream koddcho dhavo vantto vôsul korta zalearui, jednam Abrahaman dhavo vantto farik kelo, tednam Levin-ui kelo, oxem zalem.
10. Karonn Melkizedek Abrahamak mell'lo tednam, Levi ozun zolmunk naslo, to ozun aplea purvozanchea angant aslo.
11. Porjek dil'li ti Somurt Levichea iadnikponnacher dhòrloli asli; tôr, Levichem iadnikponn porjek sopurnnaiek pavounk upkarlolem zalear, Melkizedekachea jin'nosacho anink dusro Iadnik kiteak mhonn ieunk zai aslo? Aaronachea jin'nosacho iadnik puro zatolo aslo.
12. Mhonnttôch, iadnikponnachi bodôlnni zalea zalear, Somurtichi-i bodôlnni zaunk zai.
13. Heô vôstu amchea Somia vixim sangloleô asat, punn To dusrea kullantlo. Ani hea kullantlea eklean-ui kednanch vedichi seva korunk na. To Judachea kullantlo zolmolo mhonn soglleank khobor asa; ani Moizesan, iadnikanchi khobor kortana, hea kulla vixim kãich sangunk na.
15. Melkizedeka sarko anink eklo Iadnik ubo zalo dekhun, hem odik spoxtt zata.
16. Masa-rogta pormannem khoinchea kullantlo monis iadnik zaunk zai, oso Somurtint kaido asa; hea kaideachea bollan Jezu iadnik zaunk na. To ovinaxi jivitachea bollan Iadnik zalo.
17. Khorench Tachê vixim Povitr Pustokar oxi govaiki dil'liasa: "Melkizedeka porim konn adlo-fuddlo nastana Iadnik Tum sasnna-sasnnak!"
18. Mhonnttôch adlo kaido kaddun uddoilo, kiteak to osokt ani nirupeôgi aslo.
19. Karonn Somurtik kitench sompadnnek pavounk xokti nasli; punn atam amkam hea kaideachea zagear êk odik vorto bhorvanso Devan udeum-so kela, ani hea bhorvanxea vorvim amkam Deva sorxim vochunk provês mellta.
20. Tea bhair, hê vixim Devacho soput asa. Dusreank iadnik kel'le tednam oslo soput naslo.
21. Punn Jezu Iadnik zalo kiteak Devan soput gheun Taka oxem mhollem: "Sorvesporan soput dila, dil'lem utor To pattim gheuncho na: Iadnik Tum sasnna-sasnnak!"
22. Soput gheun Devan ho Korar sthaplo dekhun, to odik ut'tôm', ani hachi khatri divpak khud Jezu Zamin ravta.
23. Anink-ui êk ontor asa: te adlea Korarache iadnik zaite zann asle, kiteak ek-eklo morun vetalo ani oxem sodankal uronaslo.
24. Punn Jezu sasnnak jivo asa ani dekhun Tachem iadnikponn sasnnak togta.
25. Mhonnttôch, atam ani sodankal Tachê udexim Deva sorxem vochunk sôdtat tankam To taronn diunk xokta, karonn tanchê khatir Deva mukhar vinoti korunk To sasnnak jivo asa.
26. Khorench, oslea Porom'-Iadnikachi amkam goroz asli: Devak manovlolo, niropradi, nixkollonk, patki mon'xam thaun kuxin kaddlolo, sorga voir ubarlolo.
27. To heram porom'-iadnikam sarko nhoi. Taka poilê svater aplea patkam khatir ani uprant porjechea patkam khatir disan'dis iodn bhettounchi goroz na, karonn hem Tannem, Apnnachoch iôdn korun, êkêch pavttim korun kaddlem.
28. Devan dil'lê Somurtin nemlole iadnik soglle osokt monis; punn Somurti uprant toch Dev soput gheun sasnnak sompadnnek pavôil'lea Putak Iadnik nemta.
