1. Dev fuddarak ditolo aslo tea denneanchem Somurtint khorem sorup na; Somurt tanchi fokot êk savlli. Ti portun-portun, vorsachea-vorsa, tech-tech iodn bhettounk formaita. Toxem zalear, Deva sorxim ieunk sôdtoleank sopurnn korunk Somurtik podvich na.
2. Karonn Devak bhoztat tim êkêch pavttin xud'dh zal'lim zalear, tanchea ontoskornnant kosleach patkacho bhar ascho naslo ani dekhun iodn bhettovpachem sodankal bond zatolem aslem.
3. Punn portench, tea iodnam vorvim vorsachea-vorsa patkancho ugddas zata.
4. Kiteak boilanchea ani bokddeanchea rogtak patkam kaddun uddounk koslich podvi na.
5. Heach pasot sonvsarant bhitôr sortana Jezun oxem mhollem: "Iodn ani bhettovnniô Tuka naka zalim, punn Mhaka Tunvem êk kudd toiar keli;
6. hom' ani patkam pasot boliô Tuka manonk nant.
7. Tednam Hanvem mhollem: ho polle Hanv ietam. Pustokachea kovlleacher Mhojê vixim oxem boroilolem asa. Tuji khuxi korunk, Deva, Hanv ietam."
8. Voir sanglam toxem, jim danam Somurt vôpunk formaita - mhonngê "iodn ani bhettovnniô, hom' ani patkam pasot boliô", tim - To mhonntta - "Tuka naka zalim" ani "Tuka manonk nant";
9. uprant To oxem sangta: "Ho polle Hanv ietam! Tuji khuxi korunk Hanv ietam!" Hê ritin Dev Adlea Korarant formail'le soglle iodn rod'd korta ani tanchê svater Novea Koraracho, Jezu Kristacho, êkuch iôdn sthapun dovorta.
10. Jezu Kristan hi Devachi khuxi manun ghetli dekhun, Tachê kuddicho êkêch pavttin iodn zal'lean, amkam povitrtai mell'lea.
11. Adlea Koraracho dôr-êk iadnik sevadhormik riti pallunk dispottim Devmondirant asta ani koxêch bhaxen patkam kaddun uddounk xokonant tosle iodn portun-portun somorpita.
12. Kristan zalear patkam khatir êkuch iodn bhettoilo ani To atam Devachea uzveak bosla.
13. Ani oso, tednam thaun, Dev Aplea dusmanank Tachea pãiam tolla ghaltolo tê ghoddiechi vatt To polleit asa.
14. Mhonnttôch, tê êkêch bhettovnnê vôrvim povitr keleant tankam Tannem sasnnak sopurnnaiek pavoileant.
15. Ani hachê vixim Povitr Atmo-i amkam govai dita; poilim To mhonntta:
16. "Tea disam uprant - uloita to Sorvespor - Hanv tanchê kodde korar kortolom to oslo: tanchea kallzant Hanv Mhoje nem'-kaide ghaltolom ani tanchea monant te rigoitolom."
17. Uprant To mhonntta: "Tanchea patkancho ani khottea kortubancho hea fuddem Hanv anink ugddas korcho na."
18. Oxem tôr, patkanchem bhogsonnem mell'llam mhonnttôch, patkam khatir anink bhettovnni na.
19. Mhonnttôch, mhojea bhavam-bhoinnimnô, Jezun Aplem rogot vikrailem mhonnun, Gabhareant provês korunk amkam purnn sot'tia asa.
20. Tannem amkam podd'ddo pinzun, mhonngê Aplê kuddichea somorponna vorvim, êk novi vatt ugddun dili; hi novi vatt mhollear khud jivont Jezu.
21. Oso Devachea Ghoracho karbhar cholounk êk xrêxtt Iadnik amkam asa.
22. Oxem tôr, khorea monan, poripurnn bhavarthan, amchem ontoskornn guneanva-mekllem ani amchim kallzam xud'dh korun, ani amcheô kuddi nitoll udkan dhuun, provês korum-ia.
23. Ami uchartanv to bhorvanso thirponnim samballum-ia, kiteak Dev Aplê bhasavnnek visvaxi mhonn amkam khatri asa.
24. Pritimôg dakhounk ani boreô kornniô korunk ekamekak hurba diunk vavrum-ia.
25. Zomati bhorun ektthaim zaunchi amchê modem sonvoi asa ti thoddim zannam môddtat. Ami toxem korchem nhoi. Portench zalear, jitlo "Somiacho Dis" lagim pavta mhonn polletanv, titlim ami ekamekak dhir dium-ia.
26. Amkam sotacho uzvadd mell'la astana ami ap-khuxen patkam korit ravleanv zalear, hea patkam pasot dusro kosloch anink iôdn na.
27. Ekuch urlam tem hem: ieunchi asa ti bhoikôr zhôddti ani Devachea dusmanancho bhosm kortolem tem ujeachem agttem.
28. Moizesachê Somurticher konn-ui add vôchtit zalear ani dogam vô tegam sakxidaranchê govaiken tancho guneanv ruzu zait zalear, koslich doia nastana tankam jivexim martat.
29. Oxem zalear, jim Devachea Putak aplea pãiam tolla mostitat, jim apnnank povitr kel'lem tem Korarachem rogot opovitr mhonn lêkhtat, ani jim Povitr Atmeak, Devachê doiallaiechea hea Denneak, okman kortat, toslea mon'xank kitli odik khôr khast favo zaunchi na?
30. "Hanv sudd ghetolonch; Hanv tankam farik kortolom": him utram Konnem mholleant tim ami zannonv. Tannench oxem-i mhollam: "Sorvespor Aplê porjechi zhôddti kortolo."
31. Jivea Devachea hatant poddunk kitlem bhirankull!
32. Adlea disancho ugddas dhôrat: tednam, Devacho uzvadd tumkam melltôch, tumkam zaite koxtt-dogd sõsunk poddle, punn tanchê modem tumi thir ravleant.
33. Thoddê pavtti tumkam sobhêmazar opman kela ani jastiamnim koxttaileant. Kednam-kednam osle koxtt bhôgtoleanchea bhagak tumi asleat.
34. Hôi, bondkhonnint aslim tanchea koxttamnim tumi vantto ghetlo; ani tumkam aslem titlem-i kaddun vhelem tednam, tumi tem khuxalkaien sôddun dilem, kiteak tumchê lagim odik unch molachi ani sodankal togta tosli girestkai asa mhonn tumi zanno asleat.
35. Tôr atam tumchem kalljidarponn sôddun dium nakat, kiteak taka vhoddlem inam' asa.
36. Devachi khuxi korun, Tannem bhasailam tem tumi ghetoleat zalear, tumkam sosnnikaiechi goroz asa. Kiteak Povitr Pustok oxem sangta:
37. "Thoddoch vêll urla, bhov thoddo vêll, ieuncho asa To ietolo; To uxir korcho na.
38. Mhaka manovlolim Mhojim bhoktam bhavarthant thir ravun Jivit zôddtolim; punn tim pattim sorun gelear, Mhaka tim man'vochim nant."
39. Ami pattim sorun Jivit hogddavpi mon'xam nhoi; punn portench, bhavarthant thir ravun soddvonn zôddtanv toslim mon'xam ami.
