1. Ekamekachim bhav-bhoinn koxim mogan jieiat.
2. Porkeank tumger biradd diunk visrum nakat. Oxem korun, thoddea zannamnim nokllo zaun Devachea dutank aplea ghoramnim gheun tancho poramôs kelo.
3. Koidi zal'leam borabôr tumi-i koidi zal'lê porim, bondkhonnint asloleancho ugddas korat; ani piddapidd sõstat tancho-i ugddas korat, kiteak tanchê bhaxen tumi-i ozun sonvsarant asat.
4. Soglleamnim lognak favô to man diuncho, ani lognachi baz khot nastana samballchi, kiteak pozddeanchi ani pordvarianchi Dev nit kortolo.
5. Tumchea jivitant girestkaiechi axa dhôrum nakat, ani tumchê kodde asa titleanuch dhadoxi zaiat, kiteak khud Devan oxem sanglam: "Hanv tuka kednanch sôddcho na ani sanddcho-i na."
6. Tôr ami kalljidarponnan mhonnum-ia: "Sorvespor mhojea pokxak asa: tôr kosli bhirant? Monis mhaka kitem korunk xokta?"
7. Tumkam Devachem utor porgôtt kelam tea tumchea vhoddilancho ugddas korat: te koxe jiele ani ontorle tem lokxant dhôrun tanchea bhavartachi dêkh gheiat.
8. Jezu Krist kodinch-kednanch bodòlna: kal, aiz ani sodankal To Toch!
9. Veg-veglle atvech xikovnnen tumkam nitt rostea velim koddsoraunk dium nakat. Jevnna-khannache nem' dhôrun nhoi punn Devachê doiallaien tumchim kallzam ghott kelear ekdom' borem, kiteak mhollear jevna-khannache osle nem' palltale tankam te kiteakuch upkarunk nant.
10. Amkam amchi khaxa vedi asa ani Adlea Korarachea povitr-sthanant seva kortat tankam amchê vedicher bhettoil'lem khaunk hôk'k na.
11. Adlea Koraracho porom'-iadnik mon'zatinchem rogot patkanchea bhogsonnea khatir Gabhareant vhorta; punn tea mon'zatincheô kuddi Xara bhair vhorun lastat.
12. Heach khatir Jezu Apunn-ui Aplea khaxa rogtan porjek povitr korunk Xarachea darvonttea bhair koxtt sõsun melo.
13. Tôr ami-i Tachê-xim xara bhair vochum-ia ani Tachea mornnachê lojent vantto gheum-ia.
14. Kiteak hea sonvsarant togta toslem xar amkam na; amchem zaunchem asa tea Xarachê vatter ami asanv.
15. Tôr Devak amchea onttamnim vakhannun, Taka Jezu vorvim nirontorim amcho vakhann'nnecho iôdn bhettoum-ia.
16. Bhavponnachea mogan ekamekak adar diun borem korunk visrum nakat: kiteak osle iodn Devak manovtat.
17. Tumche vhoddil bhar gheun tumchea jivachi kallji ghetat, kiteak tãnnim aplea vavracho Devak hixôb diunk zai; tôr tanchem utor aikat ani tankam khaltim ravat. Hê bhaxen, te aplo vavr khuxal monan kortole; na zalear, te aplo vavr kortole punn haskar-suskar sôddun, ani hem tumkam faideachem zaunchem na.
18. Amchê-i pasot magit ravat. Amchea ontoskornnant koslich chuk na mhonn amkam khatri asa ani ami kortanv titleant-ui sarkem tem korunk amchi thir khuxi.
19. Ani zata titlê vegim tumchê-xim hanv porot pavunk khotkhotean prarthonam korat: oxi mhoji vinoti.
20. Amchea Somia Jezuk, xellianchea Vortea Gonvlliak, Devan mel'leantlo punorjivont kelo kiteak Tannem Aplem rogot vikraun Sasnnacho Korar sthaplo. Hoch xanticho Dev sogllê torechea borea kornniamnim Tachi khuxi pallunk tumkam aitim dovrum, ani Jezu Krista udexim Apnnak man'tat toslim amkam korum. Teach Jezu Kristak mhoima sasnnachea-sasnnak! Amen !
22. Mhojea bhavam-bhoinnimnô, tumkam ghottai diunk boroil'lim him mhojim utram borê bhaxen gheiat mhonn hanv magtam; heach khatir hem potr hanvem lamb korunk na.
23. Amchea bhava Timotak bondkhonnintlo sôddlo mhonn tumkam khobor ditam. To rokddo pavot zalear, hanv tumkam polleunk ietolom tednam taka mhojê borabôr haddtolom.
24. Sogllea tumchea vhoddilank ani somest bhoktank noman kortam. Italiechea bhoktancho-i tumkam nomoskar.
25. Sodanch tumi Devachi doiallai bhôgum. Amen.
