1. Oxem atam Krista vixim mullavi xikovnn sanddun, odik sopurnn xikovnnecher lokx ghalun fuddem vochum-ia. Mullavea sotanchi anink khobor korchi nhoi. Tim mullavim sotam mhollear him: moronn haddtat tim kortubam sôddun divop, Devacher bhavarth dovrop,
2. xud'dhichea ritim vixim, hat dovorpachea ritim vixim, mel'leanchea punorjivontponna vixim ani Devachê zhoddtechea sasnnak togtolea nirnnoia vixim xikovnn.
3. Mhonnttôch fuddem vochum-ia, ani Devachi khuxi zalear, hench korunk amcho hetu.
4. Mon'xank zôr êk pavtt uzvaddak pavoilim, sorginchem dennem tãnnim chaklem, tankam Povitr Atmo mell'llo,
5. Devachea utrachi gôddsann tãnnim chakli ani ieuncho asa tea iugachem boll tãnnim onnbhovlem,
6. ani tôri astana bhavarthachea marga velim zôr tim koddsorlim - tôr osleank novean jivit bodlunk portun haddunk zaunchench na: tim apnnancheruch khast magun Devachea Putak novean khursar martat, sobhêmazar Tacheô kenddnniô kortat.
7. Khorench zomin, apnnacher portun-portun poddta tem pavsachem udok pieun, roitoleank adavachim zhaddam utpon korun, Devacho axirvad gheta.
8. Punn ti kantte ani sorantte utpon korit zalear, ti kiteakuch upkarona ani tika Devacho xirap favo zaum ieta. Uzo lavun tika lastolim.
9. Punn tumi, priticheamnô, hê bhaxen ami uloileanv zalear-ui, tumchi gôt odik bori ani soddvonnechê vatter tumi asat mhonn amkam khatri asa.
10. Dev onit korina. Tachea Nanvacho man rakhun tumi môg dakhoila to, bhoktank tumi adar dila ani ozun tumi adar diit asat to, hem sogllem tumi kelam tem Tachean visrunk zaina.
11. Punn amchi vhôdd axa hich: tumcho bhorvanso sompadnnek pavo-sôr, tumchi hurba thir samballunk tumchê modlea zonn-eklean tich mhenôt gheunchi.
12. Tumi allxi zal'lim amkam naka, aplea bhavarthan ani thiraien Devan bhasail'lem daiz zôddunk pavtat tanchi dêkh tumi ghetloli amkam zai.
13. Devan Abrahamak bhasavnni keli tednam, Tannem soput gheun hi bhasavnni keli. Ani Apnna-vôn vhôdd konn na dekhun, Apnnacheach nanvan Tannem ho soput ghetlo.
14. Tannem oxem mhollem: "Khorench, Hanv tuka subham' axirvadan bhôrtolom ani tuji sonsôt hispabhair vaddoitolom."
15. Ani Abraham' sõsnnikai dhôrun thir ravlo dekhun, Devan bhasail'lem tem taka mell'lem.
16. Mon'xam soput ghetat tednam, apnnam-vôn konn vhôdd asa tachea nanvan soput ghetat, ani koslo-i vad upzot tôr, soputa vorvim sogllo vad mitton ieta.
17. Têch porim, Aplê ievzonnê vixim Apli khuxi kednanch Apunn bodôlcho na mhonn bhasavnnianchea daijiank Dev ukteponnim dakhounk sôdtalo dekhun, Tannem ti bhasavnni soput gheun thir keli.
18. Mhonnttôch atam bodlunk zainant tosleô Devan kel'leô don vostu asat: tanchê vixim Devachean amkam fottounk zaina. Dekhun amchê mukhar dovorlolea bhorvanxeacher amchem mon ghott lavun dovrunk, amkam, Taka xeronna ail'leank, vhôdd dhir mellta.
19. Zoxem nangôr doriant hoddem surokxit dovorta, toxem ho bhorvanso amchem jivit surokxit samballta. Jezu, Melkizedekachea jin'sacho sasnnak sthaplolo amcho Porom'-Iadnik, Sorginchea Devmondirachea podd'ddeantlean vochun Gabhareant amchê pasot riglolo asa: thoim ami pavo-sôr ho amcho bhorvanso amchea jivitak surokxa dita.
