1. Hea khatir, ami lotton vochona zaunk, amkam xikoileant tea sotank odik zotnaien ami lokx diunk zai.
2. Devdutam vorvim amchea purvozank porgôtt zal'lem utor visvas favo aslolem mhonn dokhol zalem, tem môddlam vô taka kan diunk na tãnnim favo ti khast ghetli.
3. Toxem zalear, amkam atam favo zal'lea êdê vôrtê soddvonnechea denneak ami chit dinanv tôr, koxim mhonn ami khastintlim sutt'toleanv? Hi soddvonn khud Somia vorvim porgôtt zali ani Tachi porgôttnni aikoli tãnnim amkam tichi khatri dili.
4. Teach borabor, khunnam, ochoriam ani jin'nosvar vismitam vorvim, toxench Aplê khuxê pormannem vanttlolea Povitr Atmeachea vorgunnam vorvim Devan tanchi govaiki khori mhonn dakhoili.
5. Êk novi prithum', mhonngê mon'xanchea jivitachi êk novi manddavôll, ieunchi asa: tichi khobor ami hanga kortanv. Hê novê prithumecho odhikar Devan devdutanchê adhin korunk na.
6. Povitr Pustokar êkê svater konn-eklean oxem sangun hea vixim govai dilea: "Monis konn Ga, Tunvem tacho ugddas korcheak?! Mon'xacho put konn, Tunvem tachi porva korcheak?!
7. Tôri astana Tunvem taka devdutam poros matso sokla dovorlai, mhoimecho ani manacho mukutt tachea mathear ghalai.
8. Ani soglleô vôstu Tunvem tachea pãiam tolla ghaleôi." Soglleô vostu mon'xachea pãiam tolla ghaleô zalear, tachê khal ghalinastana kãich ek dovrunk na. Punn khorem mhollear, soglleô vostu mon'xachea hata khal asat mhonn ami ozun pollenanv.
9. Tôri devdutam-vôn matso lhan zal'leak, mhonngê Jezuk, ami polletanv: Tannem moronn sõslem dekhun, atam mhoimecho ani manacho mukutt Tachea mathear ghal'lo asa. Oxem Tannem, Devachê doiallaien, ek-eklea mon'xa khatir moronn bhôgchem aslem.
10. Dev sorv vostuncho Oromb ani Xevôtt; sogllea Aplea putam-dhuvank mhoimek vhorunk Tachi ievzônn asli dekhun, Tannem Jezuk koxttam-dogdam vorvim sompadnnek pavounk zai aslo, kiteak mhollear Jezu mon'xank soddvonnechê vatten choloun vhorta to Fuddari.
11. Karonn To mon'xank patkantlim xud'dh korta, ani Taka ani Tannem xud'dh kel'leank êkuch Bap asa. Heach khatir tankam Aplim bhav-bhoinn mhonnunk To lojena.
12. Dekhun To oxem Devak mhonntta: Mhojea bhavam-bhoinnim modem Tujem Nanv porgôtt kortolom, tanchi zomat bhòrta tednam sobhêmazar Tuka vakhanntolom:
13. Oxem-i To sangta: "Tacher Hanv visvas tthevtolom". Anink-ui To mhonntta: "Ho polle Hanv asam, ani Devan Mhaka dileant tim Mhojim bhurgim"
14. Sogllim bhurgim ekach rogta-masachim dekhun, Jezu teach tanchea masa-rogtacho zaun ailo. Oxem mornnacher podvi choloitalo tacho, mhonngê devcharacho, Aplea mornna udexim Tannem nas kelo.
15. Ani hê bhaxen mornnachê bhirantin ak'khea aplea jivitant gulam'ponnant jietalim tankam Tannem suttka dili.
16. Khorench, devdutank mozôt korunk To ieunk na, punn Abrahamachê sonstik.
17. Hea pasot, porjechea patkanchem bhogsonnem zôddun gheunchê khatir Devachea fuddean doiall ani visvaxi Porom'-Iadnik zaunk, sogttant Tannem aplea bhavam-bhoinnim sarko zaunchem poddlem.
18. Tachi poili koxttam-upodream vorvim porikxa zali dekhun, atam zanchi porikxa zata tankam adar diunk To xokta.
