1. Razacho updês ani tacho hukum' Adar nanvachea baravea mhoineachea teravea disa nem' zale, ani jea disa Judevanchea dusmanamnim tanchem nisontton korunk chintlolem, teach disa portench ghoddlem; Judevamnim aplea dusmananchem nisontton kelem.
2. Ahasuerus Razachea sorvoi prantachea xaramnim, aplea dusmananchem nisontton korunk Judev ektthaim zale. Sogttank Judevanchi bhirant lagloli dekhun, konnench tancher hat ukol'lo na.
3. Mordekaiachê bhirantin sorvoi prantanche odhikari, up-rajpal, rajpal, ani rajodhikari Judevank borem korunk sôdtale.
4. Khoreponnim rajmhalant Mordekaiachea hatant soglli podvi asli ani sorvoi prantamnim tachem nanv gaztalem. Mordekaiachi podvi disachea disa vaddot vetali.
5. Mhonnttôch apnancher kolpotale tankam Judevamnim tolvarin marun uddoile, tancho nas kelo ani apnnak zai toxem tanchê thaim kelem.
6. Suza xarantuch Judevamnim pãixim mon'xank tolvarin marun uddoile,
7. Hanchê modem Judevanchea dusmana Hammedatachea puta Hamanache dha put
8. Parshandata, Dalfon, Aspata, Porata,
9. Adalia, Aridata, Parmashta, Arisai, Aridai ani Jezata asle.
10. Punn tãnnim lutticho mhal vhorunk na.
11. Suza rajdhani xarant kitlea lokak jivexim marle tachê vixim teach disa razak kolloilem.
12. Razan Esther ranniek mhollem, 'Suza rajdhani xarant, Judevamnim pãixim mon'xank ani Hamanachea dha putank jivexim marleat. Rajeachea dusrea prantamnim tãnnim kitem kelam kai? Tuka zai tem mag ani hanv tuka ditolom, magxi titlem-i ditolom.'
13. Estheran zobab dilo, 'Razachi khuxi zalear, Suza xarantle Judevank, aichê hukumê pormannem faleam-i korum di. Ani Hamanachea dha putancheô kuddi gollar umkollaum di.'
14. Oxem korunk razan hukum' dilo. Suza xarant hukum' porgôtt kelo ani Hamanachea dha putank gollar umkollaile.
15. Mhonnttôch Adar mhoineachea chovdavea disa Judev Suza xarant ektthaim zale ani tinxim mon'xank xarant jivexim marle. Punn tãnnim lutticho mhal vhorunk na.
16. Razachea prantamnim jietolea dusrea Judevamnim aplea jivachi rakhonn korunk ani dusmananchem nisontton korunk ektthovle. Tãnnim aplea dusmanachea poncheat'tôr (75) mon'xank jivexim marle. Punn tãnnim lutticho mhal vhorunk na.
17. Hem ghoddlem Adar mhoineachea teravea disa. Chovdavea disa tãnnim visôv ghetlo ani to dis khuxalkaiecho ani somarombhacho dis zalo.
18. Punn Suza xarantle Judev teraver ani chovdaver ektthovle mhonnun tãnnim pondravea disa visôv ghetlo. Ani ho dis khuxalkaiecho ani somarombhacho zalo.
19. Haka lagun xara bhair kil'len aslolea ganvamnim ravtole Judev lok, Adar mhoineacho chovdavo dis sontosacho ani somarombhacho dis koso palltat, khuxalkaien ani sontosan ekamekak danam diun sartat, Punn xaramnim jietole Judev lok Adar mhoineachê pondravê tarker oxem korta, khuxalkaien ani ekamekak danam diun sarta.
20. Mordekain hem sogllem boroun dovorlem. Uprant Ahasuerus razachea prantamnim jietolea sorvoi Judevank, lagxileank toxench poixileank, chitti dhaddun dile
21. ani vorsachea vorsa, Adar mhoineachê chovdavê ani pondravê tarker Purim utsôv korcheak,
22. kiteak tea disamnim Judevamnim aplea dusmanachem nisontton kel'lem ani tea mhoineant tanchem dukh-roddnnem, sukh somadhanan bodol'lolem. Hea pasot tea disamnim utsôv korcho ani khuxalkaien ekamekak danam diunchim ani durbollank dennim ghalchim mhonn formailolem.
23. Ho utsôv suru kela tethun thaun Judev oxem korit aileat.
24. Koxê porim Judevank dhumallo diupi Agagit Hamanan Hammedatachea putan Judevanchem nisontton korunk ievjilolem ani pur mhonngê sort ghal'li tancho bhosm korunk ani tankam nopoit korunk,
25. punn jedna to raza-xim gel'lo Mordekaiak gollar marcho hukum' gheun, Judevancher add tachi khotti ievzonn takach bhuzli ani taka ani tachea putank-ui gollar marle- oxem Mordekaian tankam boroun sanglem
26. ani tea pasot pur hea utravelean, hea disank 'purim' mhonn nanv poddlem. Hea jin'san chitticher boroun aslem toxench apleam dolleamnim dekhlolem ani apnnak ghoddlolem tem polleun,
27. vorsan voros tharailolê pod'dotin ani tharailolea vellar aplê pillgê ani apnna vangdda ravtoleam borabor don dis chukoinastana somarombh korunk Judev khuxen raji zale.
28. Hê bhaxen pinnddkechê-pinnddkent, dôr-eka ghorabeant, prantant ani xarant, somarombhlole Purimache dis, Judevam modem kednanch rodh zaunche nant, nhoi mhonn tancho ugddas tanchê pillgentlo nattak zauncho na.
29. Mordekaian boroil'lem potr monzur korunk, Abihailachê dhuvê, Esther rannien sogllea odhikaran hi dusri chitt boroili.
30. Ani Ahasuerusachea razvôttkent aslolea ekxem sot'tavis prantamnim jietolea sogllea Judevank xanticho ani visvaxiponnacho sondêx diun, teô dhaddun dileô.
31. Mordekai Judevan formailolem toxem ani apnnak ani aplê pillgek tharailolê pod'dotin nemlolea vellar Purimache dis pallunk aplê chittir boroil'lem. Tea bhair upas ani vilap korunk kherit nem' asle.
32. Estheran dil'lea hukuman, Purimachea utsovache nem' thir zale ani hem sogllem pustokar boroun dovorlem.
