1. Raza ani Haman Estherachea jevnnak gele,
2. ani hea dusrea disa jevtana, anink êk pavtt razan mhollem, 'Esther Ranniê, tuka kitem zai tem mhaka sang, ani tem tuka melltolem. Tum magxi titlem-i hanv ditolom, mhojê razvôttkechem ord porian.'
3. Esther rannien zap diun mhollem, 'Raza Saiba, hanv tuka manovlim zalear, ani Tuji khuxi zalear, mhozo ani mhojê porjecho jiv samball, hich mhoji vinonti.
4. Mhozo ani mhojê porjecho nas korchê khatir, amkam marun uddounchê khatir ani amcho sotianas zaunchê pasot amkam dusmanachê adhin keleant. Amkam gulamam ani chakram koxim viklolim zalear, hanv kãich mhonnchi naslim; punn atam asam toxem razak kel'lem nuksann dusman bhôrun haddunk xokcho na.'
5. Esther ranni uloita astana, Ahasuerus razan mhollem, 'Oxem korunk ievjitolo monis konn? Ani to khoim asa?'
6. Estheran zobab dilo, 'Amkam dhumallo ditolo ho noxtto Haman.' Hamanak raza ani ranniê mukhar kampero suttlo.
7. Ragabhorit zaun, raza jevnnavelo utthlo ani rajmahalachea bagent gelo; raza apnnak vaitt kortoloch mhonn zanno zaun, aplo jiv vattai mhonn, Esther ranniê lagim magunk, Haman pattim ravlo.
8. Jedna raza rajmahalachê bagent thaun jevnna vosreant portolo, tedna tannem Haman Esther ranni bosun asli tea polongar poddlolo aslo dekhlo. Raza udgarlo, 'Mhojeach rajmahalant ho ranniecher zobordosti kortolo kitem?' Him utram razachea tonddantlim bhair sorta thoinch astana, Hamanachea mukhamollar ôl uddoili.
9. Razachi seva kortolea, Harbon nanvachea izddean mhollem, 'Razachea boreponna khatir uloitolea Mordekaiak marun uddounk, Hamanan aplea ghora lagsar pon'nas hat lamb gôll toiar kel'lo asa.' Razan mhollem, 'Taka tacher choddoiat.'
10. Mhonnttôch Mordekaiak toiar kel'lea gollar Hamanak choddoilo ani razacho rag nivlo.
