1. Tê rati razak nhid poddona zali. Tannem Nondnnechem vô Itihasachem Pustok haddunk lailem.
2. Koxê porim êk dis ghatki izdde, Bigtam ani Teresh razacho jiv gheunk sôdtale tanchi khobor Mordekain Ahasuerus razak kolloiloli ti thoim boroun mell'li, he dog mahalachea darvontteache rakhnne zaun asle.
3. Mhonnttôch razan vachtoleak mhollem, 'Hê kornnek lagon Mordekaik koslo man ani boreponn dilam zait?' Razachea sevokan zap dili, 'Taka kãich diunk na.'
4. Tedna razan mhollem, 'Bhair vosreant konn asa?' Apnnem ubarlolea gollar Mordekaik umkollaunk, teach vellar Haman thoim bhitôr sorlolo.
5. Razachea sevokan mhollem, 'Haman bhailea vosreant ubo asa.' Razan mhollem, 'Taka bhitôr ieum-di.'
6. Ani to bhitôr pavtanch, razan tachê kodde vicharlem, 'Jea mon'xak raza man diunk sôdta taka kitem korchem?' Hamanan apnnach bhitôr oxem mhollem, 'Mhojê bhair raza anink konnak man diunk sôdit?'
7. Mhonnttôch Hamanan razak zobab dilo, 'Raza tôr konnak man diunk sôdta zalear,
8. tannem taka apunn nhesta toslem avoronn haddchem ani raza bôstalo to ghoddo haddcho ani tachê tokler razmukutt ghalcho.
9. Uprant razan angvostr ani ghoddo aplea soglleam-von vortea odhikariak diuncho ani tannem raza man diunk sôdta tea mon'xak ani taka ghoddeacher bosoun xarachê chovker bhonvddauncho ani tachê mukhar oxi porgôttnni korchi: "Raza man diunk sôdta tea mon'xak hê porim vagoitole. "
10. Razan Hamanak mhollem, 'Vegim voch ani tunvem suchoilam toxem angvostr ani ghoddo ghe ani rajki darvonttea-xim bosun aslolea Mordekai Judevak hem sogllem kôr. Tunvem suchoilam tantlem ekui chukoinaka.'
11. Mhonnttôch Hamanan angvostr ani ghoddo ghetlo, Mordekaik nhesoilo ani taka ghoddeacher bosoun, xarachê chovker bhonvddailo ani oxi porgôttnni keli: 'Raza man diunk sôdta tea mon'xak hê porim vagoitole.'
12. Hachê uprant, Mordekai xarachea darvonttea-xim portolo punn Haman apli tokli khala ghalun ani nirxeun vegôveg ghora gelo.
13. Hamanan apnnak ghoddlolem titlem-i aplê bailek Zereshak ani sogllea aplea ixttank kolloilem, tedna tachea budh dinareamnim ani potinin mhollem 'Mordekaia mukhar tum khala poddunk lagla. To Judev pillgecho zalear, tum tacher zoit vhorunk xokchona. Punn tum jerul harovtolo.'
14. Tim uloita astana, razache khoje pavtat ani Hamanak Estheran toiar kel'lea vhodda jevnnak vhorunk ietat.
