1. Thoddea kalla uprant razacho rag nivlo tedna, Ahasuerusak Vashtichê vagnnukecho ani ticher add ghetlolea upaiancho ugddas ailo.
2. Tedna razachea sevokamnim mhollem, 'Raza khatir sobit-sundor ankvar choliô sôdun haddunk zai.
3. Hea khatir razan aplea rajeachea dôr-eka prantant odhikari pattounche. Tannim thoinsorlea sobit-sundor ankvariank Suza kottantlea strighorant pavouncheô. Bailancho samballnnar Hegai hea razachea khojeachea odhikara khal, tankam ghalcheô ani ap-apli sobitai vaddounk tankam goroz tem diunchem.
4. Ani razak chodd mandta tê choliek Vashtichê svater ranni korchi.' Hi budh razak mandli ani tika tannem pallo dilo.
5. Tôr Suza khottant Mordekai nanvacho Judev jietalo. To Benjaminachê kulliechea Jairacho put, Shimeicho natu, ani Kishacho pontu.
6. Babiloniechea raza Nebukadnezzaran, Jerusalea thaun dusrea nirvaxitam bori ani Judachea raza Jekonia sangatim taka-i nirvaxit korun haddlolo.
7. To atam eka Hadassa nanvachê choliecho samball kortalo, tichem nanv Esther. Ti tachea bapoleachi dhuv asli. Ticho avoi-bapui melolo. Ti angan ani rupan sobit asli, ani ticho avoi-bapui somplea uprant Mordekain apli dhuv koxi tika voir kaddloli.
8. Razacho hukum' porgôtt zatôch, zaiteô choliô Suza kottant ektthaim zaleô ani tankam Hegaichea tabeant kelim. Estherak-ui rajmhalantli kaddli ani Hegai hea bailanchea samballnnarea adhin keli.
9. Esther taka chôdd mandli ani tachem boreponn tinnem jikhun ghetlem. Tannem tika rokddench nhoich nhespak ani jevnna-khannak gorjechem tem sogllem dilem, punn tika razachea ghorantlim sat kherit sevikam dilim ani tika sevikam soit strighorant soglleam-von bori svat dili.
10. Mordekain formailolea tea pormannem, Estheran apli zat ani ghorannem konnakuch kolloilem na.
11. Dôr disa Mordekai strighorachea moidanar bhonvadde martalo ani Esther koxi asa ani ticho poramos koso zata, hachi khobor gheit aslo.
12. Bailam baptint aslolea nemam pormannem, bara mhoineachê toiarê uprant, dôr-ekê cholien Ahasuerus raza fuddem dixtti poddunk zai aslem. Ho toiarecho vêll tãnnim oso sarunk zai: sôv mhoine gondhrosachem tel rogddun ani sôv mhoine pormôll ani sobitai vaddoitolim vasachim telam rogddun.
13. Jedna choli raza fudeant vetali tedna tichean strighorantlem apnnak zai tem gheun rajmhalant bhitôr sorum ietalem.
14. Ti sanjechi thoim vetali ani dusrea disa, sokallim tika dusrea eka strighorant pavoitalim. Hem strighor razachea khojea Shashgazachea tabeant aslem zaka dovorlolea bailanchi zobabdari asli. Razak chôdd mandlearuch ani nanvan tika apoilearuch, ti raza hujir dusrê pavtt pavot asli.
15. Jedna Mordekain aplich dhuv koxi vaddoilolê Abigailachê dhuvê, Estherachi raza fuddeant vochpachi palli aili, tedna tinnem kãich maglem na punn bailanchi zobabdari aslolea razachea khojea Hegain dilem tench tinnem vhelem. Tor-ui astana Esther somestank mandli.
16. Razachea satvea vorsantlea, dhavea mhonngê Tebet mhoineant tika Ahasuerus Razachea rajmhalant vheli.
17. Esther sogllea heram ostoriam-on Razak odik mandli; Dusrê khoinchech choliek, razachi itli opurbai ani manop favo zaunk na. Mhonnttôch tannem ranniecho mukutt tichê tokler ghalo ani Vashtichê suater, Estherak ranni mhonn porgôtt keli.
18. Esther ranniechea manak razan sogllea odhikariank ani montriank ek vhoddlem jevonn dilem. Sogllea prantamnim sutti dili ani rajki udarponnan somestank danam vanttlim.
19. Jedna dusrea choliam sangata Estherak dusrea strighorant vhel'li,
20. tinnem Mordekaichê budhi pormannem, aplo avoi-bapui, ani apli zat konn tem kolloilem na. Mordekai hichê khal astana tachê xikovnnê pormannem choltali, toxench ti atam kortali.
21. Hea kallar Mordekai razachea darvonnttea-xim bosun aslo, ani rajmahalant sevek aslole dog nirxel'le khoje Bigtan ani Teresh Ahasuerus razacho jiv kaddunk sôdtale.
22. Mordekain hem aikona fuddem, vochun Esther ranniek kolloilem, ani Mordekaichea hukuma pormannem tinnem Razak kolloilem.
23. Choukoxi kelea uprant khorem mhonn kollon ailem. Dogãi fitureank gollar marle. Ani hi ghoddni raza hujir rajki itihasant boroun dovorli.
