1. Teach disa Ahasuerus razan Judevank dhumalo ditolea Hamanachem ghor-dar Esther Ranniek dilem. Apnna ani Mordekaia sovem asloli soirigot Estheran razak dakhôl kortôch, Mordekaiak raza fuddeant vhelo.
2. Hamana kodlli porti ghetloli xik'keachi mudi, razan Mordekaiak dili ani Esther Rannien Mordekaiak Hamanachea ghoracho vhoddil kelo.
3. Anink êk pavtt Esther raza mukhar geli. Ti tachea paiam poddli ani Hagagachea Hamanan Judevam add nixtturaien ievjilolem tem nirfoll korunk, roddun tinnem raza lagim maglem.
4. Razan apli bhangarachi betkatti tika dakhoili. Tedna Esther ranni utthli ani raza mukhar ubi ravli.
5. Tor razak borem dista zalear ani hanv taka manovleam zalear ani razak mhojem mhonn'nem mandlem zalear ani hanv taka mandlim zalear, sogllea rajki prantamnim jietolea Judevanchem nisontton korunk hukum' diun Hammedatachea puta Agagit Hamanan boroil'leô chitti fattim gheunk formonn bhair kaddchem.
6. Mhojê porjecher ietolem dukh, mhojean koxem polleum-iet? Mhojea gotracho bhosm zal'lo koso mhojean polleum-iet?'
7. Ahasuerus razan Esther Ranniek ani Judev Mordekaiak mhollem, 'Polleiat, Hamanachem ghor hanvem Estherak dilam ani Judevancher akromonn korunk sôdtalo dekhun, taka gollar marlo.
8. Tumi, tumchê vatten Judevam vixim tumkam borem dista tem razachea nanvan boroiat, tacher rajki xik'ko marat; kiteak razachea nanvan boroil'lo ani xik'ko marlolo hukum' bodlunk zaina.'
9. Tedna Xivan mhoineachea tevisavea disa, rajki chittnisank apoun haddle ani Mordekaian dila toso tãnnim utran-utor, Indiek tem Etiofiek porian, ekxem sot'tavis prantantlea Judevank, up-rajpalank, rajpalank ani odhikariank tanche khaxa lipie ani bhaxê pormannem borounk kaddlo, dôr-eka prantak ap-aplê lipien, dôr-ekê porjek ap-aplê bhaxen ani Judevank tanchê lipien ani bhaxen boroilo.
10. Heô chitti, Ahasuerus razachea nanvan boroiloleô ani raj xik'kean thirailoleô, rajki ghoddeancher bosun sondêxkar gheun gele.
11. Hea chittim vorvim, aplea sogllea prantamnim ekach disa Adar mhoineachê teraver, sorvoi xaramnim jietolea Judevank ektthaim ieunk aplea jivachi rakhonn korunk ani apnna add uprastolê khoincheach raxttrachê vô prantachê foujek marun uddounk
12. ani tanchea bail-bhurgeam soit tanchem nisontton korunk ani tancho mal luttunk, Ahasuerus razan porvangi dili. (12a) Hi asa formavnnechi proti: (12b) 'Vorto Ahasuerus raza, India tem Etiopia porian aslolea ekxem sot'tavis up-rajpalank, prantachea rajpalank ani sogllê visvaxi porjek noman korta:(12c) 'Zaite zann zankam aplea Dhoniachea upott udharponnak lagun odik man mellta, title te odik gorvan fultat. Amchea sevokank vaitt korun tankam puro zaina punn aplêch vhoddvikaien buddon, te borem dekhtoleancher vaitt ievjitat. (12d) Te nhoich dusreachem upkarponn kaddun vhortat punn boreponnachi vollôkh nasloleanchê polkê boddaien fulon vetat. Sogllem polleta tea Devachi vaittak kanttaltoli nit apnnak chuktoli oso tancho somoz. (12e) Sobar pavtt proxasonachi zobabdari aslolea ixttanchea bhulovpi utram udexim, odhikar aslole monis niropradheanchem rogot varounk soho-zobabdar zalear ani bhôrun haddunk zaina toslem vaitt korunk pavleat.(12f) Vaitt monache monis raj kortoleanchem borem mon ibaddtat. (12g) Hacho puravo amkam pavleat tea adlea ghoddnukam vorvinch nhoi punn odhikar favo naslolea mon'xamnim tumchê modem kel'lea khottea kortubam vorvim tumkam melltolo.(12h-i) Fuddarak novim dhoronnam dhôrun ani amchê mukhar manddlole khottle khorea monan suttave korunk, amchê razvôttkent xanti-somadhan samballunk ami vavurtoleanv. (12k) Hea jin'san Hammedatacho put Haman zo Masedoniecho aslo ani zachea xiramnim Persiechea rogtacho ekui thembo naslo amchem udarponn bhôgtalo, (12l) ani sorv raxttrank dakhoitanv toslem boreponn ami dakhoilem; ani taka amcho bapui mhonn porgôttlo ani raza uprant takach sorpott poddun somestamnim man diuncho mhonn hukum' ghalo. (12m) Punn aplê podvechê ximê bhitôr ravcheak to nokllo zalo, ani amchi razvôttki kaddun uddounk ani amcho jiv na korunk ievjitalo. (12n) Punn aplê podvechê ximê bhitôr ravunk to nokllo zalo, ani amchi razvôttki kaddun uddounk ani amcho jiv na korunk ievjitalo. Tea bhair, vankddeô vidhya ani addgam-naddgam korun amchea jivachi rakhonn korpi ani sodancho boro dekhnnar Mordekaiacho, thoraiechi sugunni sangatin Estheracho ani tanchea ak'khea gotracho to jiv kaddunk sôdtalo. (12o) Hea jin'san amkam adara viret dovrunk ani amchi Persiechi razvôttki Masedoniechea hatant diunk to sôdtalo. (12p) 'Punn hea nixttur mon'xan na korunk ievjilole Judev opradi nhoi punn neainitichea nemam pormannem cholpi. (12q)Tim Bhov Vortea ani bollixt jivea Devachim bhurgim. Tannench amchê ani amchea purvozam khatir razvôttki samballun dovorlea. (12r)Dekhun tannem Hammedathachea puta Hamanak dhaddlolea chittim pormannem tumi cholum nakat, Suza xarachea darvonttea-xim taka ani tachea ak'khea ghoranneak jivexim marlim: soglleacher raj choloitolea Sorvesporan tabortob taka favo ti khast laili. (12s)Hea chittinche utare bhovxik svatancher ghalat ani Judevank aple nem' bhiranti vinnem pallunk diat. Tanchem nisontton korunk adim Adar nanvachea baravea mhoineacho teravo dis venchun kaddlolo. Tea disa konnui tancher akromonn korit zalear, tanchea adarak ieiat. (12t)Kiteak sogllea voir razvôttki choloita tea Devan apnnem venchun kaddlolê porjek nisonttonacho nhoi punn sontosacho dis zaum-so kela. (12u)Mhonnttôch tumi tumchea tharailolea porbam modem sogllea sontosan ho kherit dis koso pallcho. Oxem atam ani fuddarak amkam ani visvaxi Persiechea lokak ho dis zoitacho somarombh zatolo ani amchê add firiad manddtoleank nisonttonacho ugddas kortolo. (12v)'Khoincheim xar vô prant ho hukum' pallina zalear, ujea ani torsadi vorvim tacho nas zatolo; tachi gôt oxi zatoli ki monisuch nhoi punn ran'vott zonavoram ani suknnim porian thoim ravchim nant.'
13. Judev tea disa aplea dusmanachi sudd gheunk toiar asunk, kaido zauncho aslo tê chittiche utare dôr-eka prantant sogllea lokak dhaddun dile.
14. Razanchea ghoddeancher bosun chitti pavoupi, vhoddê taktin tachê hukumê pormannem bhair sorle. Suza rajdhani xarantui ho hukum' porgôtt zalo.
15. Mordekai kunvrachem zambllem ani dhovem angvostr nhêsun, toxench bhangaracho vhoddlo mukutt ani sonni sutacho tambddo jubho ghalun, raza mukhavelo bhair sorlo. Suzachem rajdhani xar khuxalkaien arddunk laglem.
16. Judevam modem khuxalkai, sukh ani man porzoll'lo.
17. Jea-jea prantant vô nogrant razachem formonn porgôtt zalem, thoim Judevam modem khuxalkai ani sontôs porgôtt zalo. Sogllê kodden jevnnam ani mouz suru zali. Somestank Judevanchi bhirant lagli ani razvottkentlo zaito lôk Judev zalo.
