1. Tisrea disa, magnnem korun sompoilem tedna tinnem aplim vilapachim angvostram kaddlim ani aplea voibhovan nhesli.
2. (5)Uprant sogllea voibhovan nhesun ani soglleanchi zoton gheta ani soglleanchem taronn korta tea Devak ulo marun, tinnem apnna borabor (6)dogam chakornink ghetleô. (7)Modhuraien ti eklecher aplo bhar pêllta ani dusri tichê borabor tichea angvostrachi xep dhôrun cholta. (8)Sopurnn sobitaien ti porzolltali, tichea mukhamollar khuxalkai rosrostali punn tichem kalliz bhirantin anvllun ailolem. (9)Sogllim daram utorlea uprant, ti raza hujir pavli. To aplea rajki xinvasonnar boslolo aslo, to aplo rajki zhogo nheslolo, bhangaran ani mannkamnim to zogzogtalo polleunk to bhõikrut distalo. (10)Thoraien bhôrun, tannem voir nodor marli ani ragan bhôrun tika polleli. Ranni samki thorthorli. Tika ghunvôll aili tedna tichea mukhamollacho rong bodol'lo ani tinnem apnna fuddem choltolê sevikechea khandar apli tokli dovorli. (11)Punn Devan razachem kalliz bodol'lem ani to movall zalo. Akantun to aplea xinvasona velo sott korun utthlo ani ti soiranna ie-sor tika aplê vengent ghetli ani tika dhir diunk laglo.(12) Tannem tika mhollem, 'Esther tuka kitem zalam?' (13)'Dhir ghe,tum morchi-naim, amcho hukum' fokot sadhea lokakuch lagta. Lagim ie.' (14) Ani aplo bhangaracho rajdondd tannem Estherachê gomttek lailo, (15)tika veng marli ani mhollem 'Mhojê kodde uloi.' (16)Tinnem taka zobab dilo, 'Mhojea Dhonia, tum Devacho êk boddvo koso mhaka disloi, (17)ani mhojem kalliz tujê thoraiechê bhirantin buddlem kiteak tum ojapvont, mhojea Dhonia, (18)ani tujem mukhamoll korunnaien bhorlolem.' (19)Punn oxem uloitana ti anink êk pavtt ghunvôll ieun poddli. Raza odik uchambôll zalo ani tache sevok tika portun soirannar haddunk lagle.
3. Razan mhollem, 'Esther ranniê, tuka kitem zalam? Tuka kitem zai tem sang; mhojê rajvôttkechem ord porian magxi zalear, hanv tuka tem ditam.'
4. Estheran zobab dilo, 'Mhojea Dhonia, tuji khuxi zalear tum ani Haman mhojea vosreant hanvem aiz toiar kelam tea vhodda jevnnak iexat?'
5. Razan mhollem, 'Estherachi khuxi korchê pasot Hamanak vegô-veg hanga apoun haddat.' Mhonnttôch raza ani Haman Estheran toiar kel'lea vhodda jevnnak aile ani
6. Soro pietana, Razan Estherak mhollem, 'Esther, tuka kitem zai tem sang, ani hanv tuka tem ditam. Rajvôttkechem ord zalear porian, hanv tem tuka ditolom.'
7. Estheran portipall kelo, 'Mhoji goroz ani mhojem magnnem oxem,
8. Hanv tuka mandleam ani mhojem magnnem mandun gheunk tuji khuxi zalear, Hamana borabor faleanchea disa, hanv toiar kortam tea jevnnak io ani tea uprant razak zai toxem hanv kortolim.'
9. Haman tea disa khuxalkaien ani sontôxi kallzan bhair sorlo ani razachea darvonttea-xim Mordekaik dekhlo ani to apnna fuddem ubo ravona ani halona tem dekhlem, tacho rag choddlo.
10. Toruipunn tannem kãi-ek mhollem na. Aplea ghora pavtôch, tannem aplea ixttank ani Zeresh aplê bailek apoili.
11. Aplê girestkaiechi ani sobar bhurgeam-ballanchi vhoddvik, toxench razan apnnak koxê porim voir kaddla ani montriam ani sevokam voir odhikar dila hachi khobor tannem sangli.
12. Tea bhair tannem mhollem, 'Esther rannien dusream konnakuch nhoi punn mhaka raza borabor jevnnak apoila ani toxench faleam-i, raza borabor mhaka amontronn asa.
13. Punn jedna tea Judev Mordekaiak razachea darvonnttea-xim hanv boslolom polletam, hem mhaka kãich nhoi koxem dista.'
14. Zeresh, tachê bailen ani sogllea ixttamnim mhollem, 'Pon'nas hat unch gôll ubarunk lai ani faleam sokallim Mordekaik tacher umkallaun mar mhonn razakodde mag. Uprant tujean raza sangata kosloch husko nastana, jevnnak vochum-ieta.' Hi budh taka bori lagli ani tannem to gôll ubarunk lailo.
