1. Ahasuerus razan nhoich sogllo mukhel ganv punn doria modem aslole zunve dondda khal haddle.

2. Soglleô tacheô xoktivont ani bollvont kornneô ani koxê porim tannem Mordekaiak voir kaddlo, hem sogllem Mediachea ani Persiechea razachea Nondnnechea Pustokar boroilolem asa.

3. Ahasuerus raza uprant, Mordekai Judeva itlo vhôdd anink konn dusro naslo. Judevam modem taka man aslo, urponjimnim bhav tachi opurbai kortale kiteak to aplea lokak borem anvddetalo ani aplê sonstê thaim xantin vagtalo. (3a)-Ani Mordekain mhollem, 'Hem sogllem Devanuch kelam. (3b)Hea vixim mhaka poddlolem sopon kãich êk chuko nastana khorem zalem. (3c)Lhan zhôr asli ti nôd zali, thoim uzvadd, suria ani bhorpur udok aslem. Nôd mhollear Esther- raza tichê lagim logn zal'lo ani tika ranni kel'li. (3d)Te dog ar mhollear Haman ani hanv. (3e)Raxttram mhollear Judevanchem nanv na korunk ektthovlolo lok. (3f)Mhojem raxttr mhollear Israel. Tãnnim Sorvesporak ulo marlo ani Tannem tankam soddoilim. Hôi, Sorvesporan Aplê porjek soddoili, hea sogllea vaittantlim Sorvesporan amkam nivarlim, raxttram modem kodinch ghoddonk na toslim novlam ani vismitam Sorvesporan keleant. (3g)Sorti ghalun tannem don jin'sancho xevôtt tharailo: êk Devachê porjek ani dusro sogllea raxttrank. (3h)Ho don jin'sancho xevott nemlolea kallar ani vellar, zhoddtechea disa Sorvespora mukhar ani sogllea raxttram modem ghoddun ailo. (3i)Hea jin'san Sorvesporan Aplê porjecho ugddas kelo ani aplea daizak nit mellun dili; (3k)Hea jin'san Adar mhoineache he dis mhonngê chovdavo ani pondravo dis Sorvespora mukhar pinddkechê-pinddkek Israel porjê modem ektthaim ieupache, sontosache ani khuxalkaieche dis zatole.(3l)Tolemi ani Kleopatrachea razvôttkechea chovthea vorsa, apunn iadnik ani Levit mhonn sanglolea Dositheusan ani tachea puta Tolemi, Purim utsova vixim boroil'li chitt Ejiptant haddli. Hi chitt khori ani Jerusaleant vosti kortolea Lisimakus, Tolemichea putan bhaxantorailea mhonn tãnnim khatri dili.

• Previous