1. Jedna Mordekain hi khobor aikoli, tannem aplim angvostram pinzlim ani gonnan aplem ang pangurlem ani mathear gobôr ghalo. Uprant to sontapun bobô hueli marun xarantlean gelo ani
2. rajmahalachea darvonttea-xim porian pavlo. Hanga gonnan aplem ang pangrun konnench bhitôr sorunk zainaslem.
3. Jea-jea prantamnim razachea hukumachi khobor pavli, Judevam modem vhodd sontap, upas, roddnnem ani bobô suru zaleô, zaitea zannamnim gonnan aplem ang pangurlem ani gobracher bosle.
4. Tichea sevokamnim ani izddeamnim hi khobor Esther Ranniek sangli ani ti zobor chintest zali. Gonna svater ghalunk, tinnem Mordekaik angvostram dhaddlim punn to tim ghena zalo.
5. Tedna apli seva korpak razan dil'lea mukhel izddeak Hatakak Estheran, kiteak pasot oxem kortai kai mhonn vicharunk, Mordekaia sorxem dhaddlo.
6. Hatako Mordekai aslo thoim xarachea chovker, rajmahalachea darvonttea-xim gelo.
7. Mordekain apnnak kitem ghoddlam tem sanglem ani Judevanchem nisontton korunk koxêporim Haman razachea bhanddarak duddu diunk toiar zala tem kolloilem.
8. Tea bhair tika khobor mellcheak tannem Suzan porgôtt zal'lea hukumacho utaro, Esther ranniek dhaddun dilo ani raza-xim vochun aplê porjê khatir vinonti korunk tika sondêx dhaddlo. (8a) Tannem mhollem, 'Tum lhan asli tedna, hanvem tuji koxi kallji ghetli tacho ugddas dhôr. Raza pattlean podvi aslolea Hamanan amchem nisontton maglam. (8b) Tum Devak ulo mar, amchê pasot raza kodde uloi ani amkam mornnantlim vattai.'
9. Hatak portun ailo ani Mordekain sangloli soglli khobor, Estherak dili.
10. Tinnem taka ho sondêx diun, Mordekaia-xim portun dhaddlo.
11. Apnnak apoilea xivai, konnui dadlo vô bail raza-xim bhitorlea kuddan vochot zalear, taka kaidea pormannem moronn favo zata mhonn razache odhikari ani prantamnim ravtolo lok zanno. Fokt raza aplo bhangaracho rajdondd ubarta, tedna mon'xacho jiv vattaum-ieta. Ani tis dis zale razan mhaka apounk na!'
12. Him Estherachim utram Mordekaichea kanar poddtôch,
13. tannem ho portipall kelo, 'Tum razachea mahalant asai dekhun, Judevam modli tum eklich sutt'tolii mhunn somzum nakai.
14. Kedinch na. Tôr tum oslea vellar ogi ravlear, alaxiro ani suttka Judevank anink dusrê koddchi ietoli. Punn tum ani tujem ghorannem somptolem. Konn zanno! Ghoddiê hea oslech prosongak lagon, tum xinvasonar pavleai.'
15. Hem aikotôch Estheran ho zobab Mordekaik dhaddlo,
16. Voch ani Suza xarant jietolea sorvoi Judevank ekttãi kôr; mhojê pasot upas korat ani tin dis kãi khainakat vô pienakat. Mhojê vatten hanv ani mhojeô sevika têch porim upas kortoleanv. Tea uprant kaido zorui add veta hanv raza-xim vetolim. Melear, melim!'
17. Mordekai gelo ani Estheran sanglolem toxem kelem. Sorvesporan kelolea ojapanchea kortutvancho ugddas korun, Mordekaian hem magnnem kelem: Sorvespora, Sorvespora, Raza ani sogllea vostunchea Dhonia, sogllem Tujê podvê khala asa, Israelak soddovpachê Tujê khuxer Konnacheanuch add ieunk nozo (17c) Ontrall ani prithum' Tunvem rochleãi ani ontralla khala asat titlim-i ojapam. Tum sogllea vostuncho Dhoni, Konnacheanuch, Dhonia, Tuka addaunk nozo.(17d) Tum sogllem zannai; khorench, Dhonia, Tum zannai, urmottponnan vô gorvan vô mijaxen hanvem hem korunk na: gorvixtt Hamana mukhar, hanvem tokli bagaunk na. (17e) Israelachi suttka zatit zalear khuxêmonan hanv tem kortolom aslom ani tachea pãiancho umanv ghetolom aslom. Punn jem kitem hanvem kelam tem mon'xak mhoima nhoi punn Devak mhoima diunk kelam, ani Tujê bhair, Sorvespora, hanv konnakuch nomoskar korpi nhoi ani hem sogllem hanv gorvak lagun korina. (17f) Ani atam, Sorvespora Deva, Raza, Abrahamachea Deva, Tujê porjek vattai; kiteak amcho nas korunk dusmananache dolle amcher lailole asat, ani jem purvilea kallar thaun Tujem daiz aslem tacho bhosm te korunk sôdtat. (17g) Tujea daizachi beporva korum naka; hem daiz Tunvench Ejiptachea desantlem Tukach soddoun haddlãi.(17h) Mhojea magnneak kan di, Tujea daizachi kaklut kôr, amchem dukh kaddun amkam sontosan bhôr, ani Tujem Nanv vakhannchê khatir, Sorvespora, ami jivim urum. Tuka vakhanntat tanchim tonddam bond korum naka. (17i) Ak'khem Israel sogllê sokten roddonk laglem kiteak tanchem moronn samkem lagim pavlolem.
