1. Hachê uprant, Ahasuerus razan Haman nanvachea, Agag ganvchea Hammedatachea putak, odikunch zuttiêk venchun kaddlo. Taka tachea boraborchea odhikariam poros odik podvi dili.
2. Ani razachea darvonnteachê sevek aslolo sevok Haman dixtti poddlo zalear taka nomoskar kortale ani taka paiam poddtale, oso aslo Razacho hukum'. Ekloch Mordekai taka nomoskar korinaslo, nhoi mhonn taka paiam poddo naslo.
3. Razacho hukum' kiteak môddtai?' oxem darvonntteachê sevek aslole sevok Mordekaia lagim vichartale.
4. Disachea disa te taka hem vichartale punn to tanchim utram kanar ghenaslo. Apunn Judêv mhonn Mordekain tankam kolloilolem. Hê vagnnukek koslem-i karonn asa kai mhunn polleunk xekim tãnnim Hamanak kolloilem kiteak apunn Judêv mhonn Mordekaian tankam sanglolem.
5. Jedna Mordekai apnnak nomoskar korina vô paiam poddona mhonn Hamanan pollelem, tedna to ragan pettlo.
6. Hachê bhair Mordekai Judev mhonn taka kolltôch, nhoich eklea Mordekaiak punn Ahasuerus razachea somrajeant jietolê, Mordekaichê zatik mhonngê sogllea Judevank tannem marun uddounk ievjilem
7. Poilea mhonngê Nisan mhoineant, Ahasuerus Razachê rajvôttkechea baravea vorsa dis ani mhoino tharanvche khatir tannem pur vô sort ghali. Hamana hujir ghali. Sort poddli baravea mhonngê Adar mhoineacher.
8. Hamanan Ahasuerus razak mhollem, 'Tujê razvottkechea sogllea prantamnim, heram lokam modem ximpoddlolem, hem êk kherit raxttr asa. Her raxttram poros tanche nem' veglle ani tim razache nem' pallinant. Tankam jieunk diun razak koslo adav?
9. Razak borem dista zalear tanchem nisontton korchê khatir, razan êk adnia bhair kaddchi. Oxem kelear hanv dha hozar rupeache talent razachea bhanddarant ghalchê khatir vevhar choloitoleanchea hatant ditam.'
10. Tedna razan aplea xik'keachi mudi kaddli ani Judevanchea dusmana Hammedatachea puta Hamana lagim dili ani oxem mhollem,
11. Duddu tuka pavle ani toxench porza, tuka zai toxem tichê thaim kôr.'
12. Mhonnttôch poilea mhoineachea teravea disa tannem razachea xastriank apoun haddle. Tãnnim Hamanan dil'lo hukum' boroun kaddlo. To razachea uprajpalank, dôr-eka prantachea rajpalak ani porjechea mukhel odhikariank tanchi khaxa lipi ani bhaxê pormannem boroun kaddlo. Hukum Ahasuerus razan soi kel'lo ani tacher xik'ko ghal'lo.
13. Baravea, mhonngê Adar mhoineachea teravea disa sogllea Judevank, lhanank toxem vhoddank, bailank toxem bhurgeank, ekach disa marun uddounk ani tanchê kodde asa titlem-i kaddun gheunk, dhanvtea sevokanchea hatant diun sogllea prantamnim chitti patthoileô. Te chittincher oxem boroun aslem: 'Ahasuerus, vhôdd raza Indiek thaun Etiopia porian pavta tê ak'khê razvôttkechea ekxem sot'tavis prantachea rajpalank ani tachea odhikariank oxem boroita: (2) 'Jedna sorvoi raxttrancher mhaka odhikar mell'llo ani ak'kea sonvsarachi podvi mhojea hatant poddli, tedna hanv soktechea gorvan fulonk na punn moriadin ani konnvallaien odhikar cholounchê pasot, hanvem nirnnoi ghetlo; mhojea hata khal aslolim sogllim sodankal, uchambollai nastana jieunk ani mhojê razvôttkent sogllem boreponn ximpddonk ani sogott lok axeta ti xanti tankam mellunk, mhoji khuxi. (3) Hem sogllem koxem xarthi pavchem tê vixim, hanvem mhojea budh dinnareanchem mon polleun ghetlem; tanchê modlo eklo bhov xanno, mogan vavr korpi ani visvaxiponn samballpi! Tachem nanv Haman ani raza pattlean taka podvi asa. (4) Tannem amkam kolloilam toxem sonvsarachea sogllea porzam modem êk noxtti porza jieta, tiche nem'-kaide, dusrea raxttram add vetat ani thambonastana razache hukum' môddta. Oxem jem boreponn ami rajeant haddunk sôdtanv, taka addkôll zata. (5) 'Mhonnttôch hi porza ani tich ti sogllea raxttrancher add veta, amchea boreak upkarona tosle attvech nem' gheun asa ani kannttalleache oprad adarta. Oxi amchea rajeachê udargotik addkhôll zata: (6) 'Haman êk odhikari ani amkam soglleank dusro bapui. Tannem boroilolê chittint zancho ul'lekh kela tankam soglleank, bailank bhurgeank soit, konnachech churchure dhôrinastana tanchê dusmanachê torsadin, hea vorsachea baravea mhonngê Adar mhoineachea chovdavea disa, samkinch marun uddounchim. (7) Hê toren him noxttim mon'xam ekach disa norkant vetolim ani tea uprant amchea rajeak sasnnak thirai ani xanti melltoli.'
14. Tea disak sogllea lokan toiar aschê khatir, hea hukumachi proti dôr-eka prantant dhaddun dili.
15. Razachea hukuma pormannem, dhanvtole suddsuddit taktin gele. Poilê svater ho hukum' Suza rajdhanint porgôtt zalo. Raza ani Haman jevonn korunk ani pieunk lagle punn Suza rajdhanint vhôdd akant suttlo.
