1. Ahasuerus Razachea kallar oxem ghoddlem: Tachem somraj, Indiek thaun Ethiopiek porian pavtalem, ani taka ekxem sot'tavis (127)prant asle.
2. Tea disamnim Ahasuerus raza Suzachea kottant aplê rajki sodrer aslo.
3. Aplê rajvôttkechea tisrea vorsa aplea rajmahalant tannem aplea sogllea odhikariank ani montriank, Persiechea ani Medi hea foujechea senapotink, unch kulliechea mon'xank ani rajpalank ek vhodd jevonn dilem.
4. Hê porim aplea somrajachi girestkai ani porzôll, ani aplê vhôddvikecho dobazo ani voibhov dokhol kelim ani ho dobazo zaito kall toglo, ekxem oixim dis!
5. Ho kall somptôch, Suza kottant ravtolea sorvoi lokak, vhoddank ani lhanank, rajmahalachea bagechê angnnant Razan sat dis vhoddlem jevonn dilem.
6. Dhove ani zamblle podd'dde, bhov moladik bhangarachea doriank laun te rupeachea mudiank bandlole ani heô paxannachea khambeancher umkolltale ani porfiriche, paxannachê ani rong-birongi fatranchê zomnir, bhangarache ani rupeache sofa ghal'le asle.
7. Razachea udarponnak lagun pieunchê khatir upôtt soro ani veg-vegllea akarachim bhangarachim patram aslim.
8. Razachê hukumê pormannem, pieunkuch zai mhonn kaido naslo ani Razan aplea ghorachea odhikariank eka-eka pavnneak tachê khuxê pormannem vagounk sanglolem.
9. Ranniê Vashtin, aplê pallien, Ahasuerus Razachea rajmahalant bailank vhoddlem jevonn dilem.
10. Satvea disa, jedna raza pieun boroch murgott'talo, Mehuman, Bizta, Harbona, Bigta, Abagtha, Zethar, ani Karkas, hea razachi chakri kortolea sat khojeank Ranniê Vashtik aplo ranniecho rajki mukutt ghalun Raza fuddem haddunk formailem.
11. Sorvoi lokak ani sorkari odhikariank tichi sobitai polleunk mellchê khatir, hem tannem kelem kiteak ti bhov sobit asli.
12. Khojeam vorvim kolloilolea razachea hukumak Ranniê Vashtin pallo dilo na. Haka lagun, razacho rag pettlo ani choddot gelo.
13. Tedna razan aplê sonvoiê pormannem kaideanchi zannkari aslolea mon'xachi budh ghetli.
14. Te mhollear: Karshena, Shethar, Admatha, Tarshish, Meres, Marsena ani Memukan. Hea sat Persi ani Mediekari-odhikariank raza mukhar vochunk sot'tea asli ani te somrajeant xrêxtt zuttiô choloitale.
15. Tankam apoun razan mhollem, 'Vashti Rannien Ahasuerus Khojeam vorvim kolloilolo Razacho hukum', mandun gheunk na. Hea pasot nemam pormannem tika kitem korchem?'
16. Razachê ani odhikaranchê hujir Memukanan zobab dilo, 'Vashti Rannien okman kela nhoich Ahasuerus Razak, punn odhikariank ani Ahasuerus Razachea prantamnim jietolea sorvoi lokak.
17. Vashti Ranniechi chal rokddich sorvoi bailank kollon ietoli, ani teô aplea potinchi têch porim beporva kortoleô. Teo mhonnttoleô, "Ahasuerus Razanuch, Vashti Ranniek aplea hujir apoili ani ti gelina."
18. Dis sompta mhonnosôr Persi ani Medi odhikareancheô bailô, ranniechê vagnnukechi khobor aikotoleô ani razachea odhikariam thaim apunnui toxeô vagtoleô. Oxem sogllêch vatten beporva ani rag ximpoddtolo.
19. Razachi khuxi zalear, razan ho hukum' bhair ghalcho, Vashti Ranni anink kednanch Ahasuerus Raza hujir dixtti poddum-noiê ani ho hukum' bodlunk zaina toso korun Persi ani Medi lokanchea nemamnim bhitôr ghalcho, ani ranniechi vhoddvik razan dusrê favo toslê bailek diunchi.
20. Ani ho razacho hukum' ak'khea lamb-rund somrajant porgôttcho ani sorvoi bailô, zaum teô vhodd vô lhan hea fuddem favo to man aplea potink ditoleô.'
21. Hi Memukanan diloli budh razak ani odhikariank mandli ani tichê pormannem razan kelem.
22. Tannem rajachea dôr-eka prantak ap-apleam okxora ani bhaxê pormannem chitti dhaddun dileô, ani oxem dôr-êk poti aplea ghora dhoni mhonn sid'dh kelem.
