1. Hea mhoineachea chovisavea disa Israel porza ghonni vostram pangrun ani mathear gobor ghalun upasa khatir ektthaim zali.
2. Magir Israel vonxantlim tim sorv videxamsun kuxin sorlim ani ubim ravun tãnnim aplim patkam ani aplea purvozanche oprad sobhêmazar ucharle.
3. Ap-aplê svater ubim ravun porian Devache somurtintlea gronthantlem tankam vachun sanglem ani anink dusro dis porian tãnnim aplea patkanchi ucharnni keli ani Sorvespora aplea Deva mukhar tim sorpottlim. Jeshua, Binnui Kadmiel
4. Shebania, Bunni, Sherebia, Bani ani Kenani he Levitanche machier ube ravun Sorvesporak aplea Devak vhoddlea tallean ulo martale.
5. Jeshua, Kadmiel, Bani, Hashabnea, Sherebia, Hodia, Shebani ani Pethalia, hea Levitamnim mhollem, 'ube ravat ani Sorvespora, tumchea Devachi Stuti korat Sorvespora, amchea Deva, sasnnachea sasnnak tujem nanv orchit zaum. Sorv lôk tujea mhoimevont nanvachi stuti korum. Sorv stuti ani vakhann'nnê poros tem vortem.
6. Tum, Sorvespor, ekloch Sorvespor, Tunvench sorg rochlai, sorgancho sorg ani tantunt aslolem sogllem, prithvi ani tacher asa tem sogllem, doria ani tantuntlem sogllem. Tankam soglleank tum jivit dita ani sorgincho dolbhar Tuka noman korta.
7. Tum Sorvespor Dev, Abramak vinchun kaddlolo, Kaldeanchea Ur ganvantlo tunvem taka bhair kaddloi ani taka Abraham hem nanv dilem-i.
8. Kallzan to tuka visvaxi mhonn parkhun, Kanaankarancho, Hittitkarancho, Amoritkarancho, Perizzitkarancho, Jebusitkarancho dês taka ani tachê sonstik ditolo mhonn tunvem tachê kodde korar kel'lo. Hem tujem utor tuvem pall'llem. Tujeô bhasavnneô tunvem xarti pavoileô kiteak tum promannik.
9. Egiptant amchea purvozanche hal upodre tunvem pollele; Tambddea Doriachea tirar tanchi bob tunvem aikoli.
10. Faraoh, tachea sorv sevokam ani tachea somest des lokam samkhar tunvem khunna ani vismitam korun dakhoilim kiteak tankam kitlê darunnaien tãnnim vagoilim hem tum zanno asloi. Tunvem zhoddloli namna aiz legun tum toxi sambhalltai.
11. Tanchea dolleam samkar doriachim tunvem don ordam kelim. Oxim tim nitt doria modlean sukê zomnivelean cholun gelim. Tanchi patt dhôrunk ail'leank uchamboll doriantlea khoddpa porim khorik xevttilim.
12. Disachi tunvem tankam kupachea khambean vatt dakhoili ani ratchem ujeachea khambean tim cholchi asli ti vatt uzvaddan bhôrli.
13. Sion dongrar denvun tum sorgar thaun tanchê lagim uloiloi, tunvem tankam spôxtt nem', thir kaide, bore nem' ani updes dile.
14. Tuvem tankam tuzo povitr Son'var ugddapo kelo, tujea sevoka Moizesa vorvim tuvem tankam updes, nem' ani kaide dile.
15. Tankam bhuk lagloli tedna Sorgar thaun tunvem tankam unddo diloi, Tanchê tanek tunvem khoddpantlem pieunk udok dilem, Zo dês apunn ditolo oso soput tunvem ghetlolo, vochun tumchê svadin korat mhonn tunvem tankam sanglem.
16. Punn tim ani amchim purvozam urmottponnan vaglim, nibôr manechim zalim ani tujeô adnia bhair marleô.
17. Tanchê khatir Tunvem kel'lim ojapanchim kortutvam visrun tujeô adnia pallunk tim kobul zalim nant. Hott dhôrun ravlim ani porot Ejiptant gulamponnak vochpachem kelem. Punn tum bhogxita toslo, krupall, doiall Dev dekhun tunvem tankam sôddun dilim nant.
18. Jedna koddoun bhangaracho êk paddkulo kelo ani mhollem, "Ejiptantlim tumkam bhair kaddun haddlolim to ho tumcho Dev!" Oxem mhonnun sap duxtt dhormninda adarleô tedna legun,
19. aplê vhoddê doien tunvem tankam thoinch oronneant sôddlim nant: Disachi tanchi vatt dakhounk kupacho khambo tunvem kaddlonai. Jê vatten tim vochpachim aslim tichea fuddlean uzvaddaunk tunvem ratcho ujeacho khambo-i kaddlo naim.
20. Tanchem ginean uzvaddaunk tunvem tankam tuzo xubh atmo diloi. Tanchea tonddantlo man'na tunvem kaddun ghetlo nai, apli tan bhagounk tunvem tankam udok dilem-i.
21. Tankam kainch unnem zanvchem nhoi mhonn challis vorsam oronneant tunvem tancho poramos keloi, tanchim angvostram kotteunk nant, nhoi mhonn tanchea paiank cholun suz aili na.
22. Tunvem tankam raxttram dilim ani tanchi vanttnni korun tancheô ximô dês koxe tankam dile oxem tãnnim Heshbonachea Raza Sihon ani Bashanachea Raza Og hea dogãiche-i dês aplea tabeant kele.
23. Ontrollar jitlim noketram titlim bhurgim tunvem tankam dilim, bhitôr sorun aplo kortolim aslim tea tanchea purvozank bhasail'lea desant tuvem tankam haddlim
24. Tanchea purvozamnim vochun to dês aplea tabeant kelo ani tunvem tanchê mukhar Kanaanachea nivaxeank khaltim kelim, tunvem tea desachea lokak toxench tanchea razank, tanchê adhin kele ani aplê khuxê pormannem tankam cholounk tunvem tankam dile
25. Tãnnim durgam aslole nogor ani pikall-bhuim svadin kelim Sorv jin'sachê girestkaien bhorlôlim ghoram, khonddloleô bãio, dakam-molle, zoituna- molle ani puskoll follam-rukh apnnachea tabeant kele. Tankam bhorpur jevunk-khaunk mell'llem, tim matlim ani tunvem dilolea boreponnan anondan jielim.
26. Punn tim tujer add vochun tujer upraslim tãnnim tujê somurtik patth keli, tankam tujê-xim portun haddunk proitn kelolea tujea provadiank tãnnim jivexim marle ani tuka vhodd okman kelo.
27. Dekhun tunvem tankam tanchea dusmanachea hatant ghalim ani tankam tãnnim piddlim punn tim koxttant astana tãnnim tuka bob marli ani tunvem Sorgar thaun tanchem prarthon aikolem. Tunvem tujê vhoddê kaklutin tankam tanchea dusmananchea hatantlim soddouncheak tankam soddvonnar dile.
28. Punn tankam il'lo visôv melltôch tãnnim portun tuka vaitt dista tem kelem. Jedna tunvem tankam portun tanchea dusmananchea hatamnim ghalim ani portun tuka bob marli ani tunvem sorgim thaun tanchem prarthon aikolem ani oxem tujê vhoddê kaklutin tunvem tankam zaitê pavtt suttka dili. Punn tim gorvan bhôrlim ani tujea updesank pallo dilo na.
29. Tujê Somurti khal tãnnim jieunchem mhonn tunvem tankam anink ekdam' xiddkailim tori punn gorvan bhôrun tujea updesanchi tãnnim beporva keli ani jeô adnia pallun monis jivo urta tea adneam add vochun tãnnim pap adharlem.
30. Zaitim vorsam Tum tanchê kodde sosnnik zaloi. Tujea Atmea vorvim ani Tujea provadiam vorvim tunvem tankam chotrai dili punn tãnnim tujem aikolem na dekhun tunvem tankam videxi lokanchea hatant ghale-i
31. tori tunvem tujê vhodd kaklutin tancho purto nas kelo na ani tankam sanddle nant kiteak tum doiall ani kaklutsar Dev.
32. Amchea Deva, vortea, podvedar ani bhoim-bhokti upzovpi Deva, tujea visvaxi mogacho korar thir samballtolea amcher, amchea razancher, fuddariancher, iadnikancher, provadiancher, purvozancher ani sogllê porjecher Assiriechea razanchea kalla thaun aiz porian ailolea sorv vignancho ugddas dhôr.
33. Amkam ghoddlam tea soglleant tum visvaxi ravloi.
34. Hôi, amchea razamnim, fuddareamnim, iadnikamnim ani amchea purvozamnim tuje kaide pallunk nant. Tãnnim tujea updesank ani tunvem tanchea ugddasak haddlolea nemank lokx dilem na.
35. Tim apleach rajeant astana ani tujem boreponn bhôglam astana ani tunvem tanchê mukhar vistarailolê vixall ani pikall bhuiment jietana tãnnim tuji seva keli na ani apleô khotteô kornneô soddleô nant
36. punn polle, aiz ami gulam'. Boreô vostu utpon zatat teô khaun dhadoxi zaumcheak zo dês tunvem amchea purvozank dil'loi tea desant ami atam gulam' zavn jietanv,
37. amchea patkank lagun tunvem amcher nemloleam razank hea desachi bhorpur utpon mellta. Te amkam ani amchea zonavorank, tankam zai toxim choloitat. Ami vhodd sonkottant.
