1. Artaxerxes razachê razvottkechea visavea vorsa, Nisan mhoineant, hanv soreacho karbhari aslom tedna, hanvem razak soro dilo. Tea adim hanv tachê mukhar kodinch chintest disunk naslom.
2. Dekhun razan mhollem: 'Tujem mukhamoll itlem khontibhorit kiteak? Tum piddest kãi nãi. Mhonnttôch hi êk kallzachi dukh zaunk zai.' Mhojer vhôdd bhirant aili
3. ani hanvem razak mhollem: 'Razak lamb auk mellum! Mhojea purvozancheô somadhi asleô tea xarachem nisontton zalam ani ujean lasun tachea darvontteancho bhosm zala astam, mhojem mukhamoll koxem khontibhorit zaunchem na?'
4. Razan zobab dilo: 'Tôr tuka kitem zai?' Hanvem sorginchea Devak ulo marlo ani razak oso zobab dilo:
5. Razak borem dista zalear, ani tujea sevoka thãi tum proson'n asai zalear, mhaka Judeiant, mhojea purvozanchea somadhinchea xarant, vochum-di ani hanv tem novean bandtam.'
6. Tachê kuxik ranni bosun astam, razan mhollem: 'Tuka thoim vochunk kitle dis lagtole ani tum kedna portun ietoloi?' Mhonnttôch razak manta toslo êk dis hanvem dakhoilo ani tannem mhaka vochunk dilem.
7. Hanv anink êk pavtt raza kodde uloilom: 'Judeiant pavo porian Eufratesachê poltoddchea prantantlean vochunk, mhaka tea prantantlea razpalank potram di;
8. toxench Dev-mondirachea kott'ttachea darvontteank, toxench xarachea durgank ani hanv ravtolom tea ghorak ghalpak mhaka lankudd diunk razachea ran-rakhpea Asafak chitt di.' Mhojea Devacho udar hat mhojê sovem aslo dekhun, hanvem maglolem tem razan mhaka dilem.
9. Eufratesachê poltoddchea mulkanchea rajpala-xim hanv pavlom tedna razachim hukum'-potram hanvem tankam dilim. Mhoji rakhonn zaunk razan mhojea vangdda loskorantle odhikari ani ghoddesvor patthoile.
10. Israel porjechem voste kaddunk konn eklo ailolo asa oxem Horonitant-lea Sanbalatachea ani Ammonachea odhikarea, Tobiachea hem kanar poddtanch, tanchem pint sarkhem challvolem.
11. Ani itlean hanv Jerusaleak pavlom. Thoim pavtôch tin dis legun
12. Jerusalea khatir Devan mhojê motint ghatlolem tachi hanvem konnakuch mitti foddli na. Ratchoch utthun thoddea mhojea bhageliam borabor, mhojeach gaddva bhair ani koslench zonavor ghenastana hanv oso bhailean bhonvun ailom.
13. Kallkhantleanuch bhair sorun Falkeachea Darvotteantlean Ozgorachea Zhori kodde tem korun Xennachea Darvonttea kodde hanv pavlom ani zoim Jerusaleachi vonnot moddon poddloli ani tiche darvontte laslole tanchi topasnni hanvem keli.
14. Magir Zhoricho darvontto ani Razachi mhonnttat ti Tolli hanv utorlom, punn mhojea gaddvak mat mhojê borabor ieunk zalem na.
15. Dekhun Vonnttichi topasnni korit kallkhantleanuch hanv falkea-xim gelom. Hanv khoim gel'lom vô hanv kitem kortalom hachi khobor odhikariank nasli uprant khaxa hanv patthlean sorun novean Falkeachea Darvontteantlean bhitôr ailom.
16. Atam meren Judevank hanvem mitti foddlina. Hea kamak laglolea iadnikank, nhoi mhonn kullvont -mon'xank, na mhonn odhikareank, toxench konna ekleakui hanvem ek-ui zap kaddli na.
17. Magir hanvem tankam mhollem, 'Kosli amchi durdoxa zalea ti pollelea mu tumi.' Jerusaleachem zalam nisontton, tachea darvonntteancho gobor korun uddoila. Cholat, vochun novean Jerusaleachim kottam bandum-ia ani amchi loz dhampum-ia.
18. Mhojea Devacho udar movall hat mhojer aslolo hem ani Razan mhaka sangleant tim utram tem sogott hanvem tankam sanglem. Hea utrak tãnnim mhollem, 'Atanchea atam bandunk lagum-ia ani borea vavrak tãnnim rokddoch hat ghalo.
19. Horoni Sanbalatan, Ammonantlea odhikarean, Tobiasan ani Geshem Arbean hem aikonaka, amcheô moskoreô korun te hansle. Tãnnim mhollem, 'Tumi hem kortat tem kitem?'
20. Patxaiacher bondd korunk ievjitat kai kitem? Punn hanvem tankam êk zap dili na. Sorgincho Dev amkam ies ditolo ani ami tachê sevôk pengott bandun hem kott bandun kaddttoleanv; punn tancho zalear Jerusaleant vantto, hok'k, nhoi mhonn iadgiri oslem kaim ek kuskutt aschem na.
