1. Atam satvo mhoino pavlo tedna Israelitkar ap-aplea nogramnim aslea Soglli porza, êkuch monis zal'lê porim, Udkachea Darvonttea fuddlean aslolea choukar ektthãi zali. Sorvesporan Israelak formailolem Moizesachê Somurtichem Pustok tãnnim Ezras dhormxastriak haddunk lailem.
2. Tannem tem sobhê mukhar haddlem. Sobhent dadle, bailô ani gineanak pavlolim bhurgim aslim. Ho satvea mhoineacho poilo dis aslo.
3. Ani Udkachea Darvonttea fuddlean aslolea choukar, dadleam, bailam ani gineanak pavlolea bhurgeam hujir, bhov sokallim tem don'par porian, Pustokavelem tannem vachlem; sogllo lôk Somurtichea Pustokak chitan kan ditalo.
4. Mud'dom ubarlolea lankddi updês-asonar Ezras ubo ravlo. Tachê kuxik uzvean ube asle Mattitia, Shema, Anaia, Uria, Hilkia ani Maaseia. Tachea dhavean Pedaia, Mishael, Malkija, Hashum, Hashbaddana, Zekaria ani Meshulam.
5. Ezras sogllea loka-von unch aslolean, soglleank dista toxem tannem pustok uktem kelem. Tannem pustok uktem kortoch, sogllo lôk ubo ravlo.
6. Tedna Ezran Sorvesporak, Vortea Devak, dhinvaslo, ani sogllê porjen aple hat ubarun 'Amen! Amen!' oxem mhollem. Uprant sogllim bagvolim ani, saxttangim poddun, tãnnim Sorvesporak nomoskar kelo.
7. Ani ap-aplea zagear bosun astana Jeshua, Bani, Sherebia, Jamin, Akuk, Shabbethia, Hodia, Masheia, Kelita, Azaria, Jozabal, Hanan, Pelaia, hea Levitamnim tankam iskuttavn somurtichi somzonni dili. Somurtichi somzonni ditana sogllo lôk ap-aplea zageancher bosun aslo.
8. Ani Ezran Devachea pustokavelem vachlem ani tacho ôrth oso dilo ki sogllo lôk vachlam tem somzolo.
9. Tedna Bhov Xrêxtt Nehemìas, ani iadnik ani dhormxastri Ezra, ani lokak xikovnn ditale te Levit, hãnnim ak'khê porjek sanglem: 'Ho dis Sorvespora tumchea Devak povitr korun bhettoil'lo dis. Dukhest zaum nakat, roddum nakat.' Kiteak Somurtichim utram aikotana tanchea dolleamnim dukham ailolim.
10. Uprant tannem sanglem: 'Cholat, chorob khaiat, gôdd soro pieiat ani kãich toiar korunk na taka-i tantlem kitem-i dhaddat; kiteak ho dis amchea Sorvesporak povitr korun bhettoil'lo dis; tumi dukhest zaum nakat, kiteak Sorvesporacho sontôs tumchem boll.'
11. Ani Levitamnim sogllea lokak thonddailo mhonnun: 'Xant ravat; ho dis povitr; dukhest zaum nakat.'
12. Ani sogllo lôk jevunk-pieunk ani dusreank-ui aplo vantto diunk gelo ani apunn khuxali korunk laglo, kiteak apnnank porgôtt kel'lem tacho ôrth tankam mell'lolo.
13. Dusrea disa, tachê porjechea kuttumbantle malgodde ani iadnik toxech Levit Somurtintlim utram xikunk Ezra hea iadnika mhoreant ektthaim zale.
14. Somurtint oxem boroil'lem tankam mell'llem ki Sorvesporan Moizesak adnia dil'leô tea pormannem Israel porjen Satvea mhoineachea utsova disamnim mattvamnim ranvchem.
15. Mhonnttôch tãnnim sogllea xaramnim ani Jerusaleant oxem porgôtt korunk zai mhonn hem tantunt sanglolem. Dongrancher vochat ani Somurtintlea Gronthar boroun dovorlam toxem mattov ubarunk ut'tom zoitun ani ranzoitun rukhacheô, sugondh rukhacheô, kazra-maddancheô ani her dhatt pananchea rukhancheô khandieô gheun ieat.
16. bhair vochun lokan khandieô haddleô ani teô khandieô vapddun ap-apnnachea ghoracher,angnnamnim, Dev-mondirachea angnnamnim, Udka darvontteachea chovkant ani Efraim' Darvontteachea chovkant, apnna, pasot mattov ghale.
17. Oxem pordesant thaun portolole sogllê porjen mattov ghale ani tantunt vosti keli. Nunachea putan Joshuachea kalla thaun ho dis porian Israel porjen oslo somarombh cholounkuch naslo ani tancho sontôs khoreaninch bhov vhodd aslo.
18. Disachea disa, poilea tem nimannea disa porian Ezran Devachê Somurtintlea Gronthantlem vachun sanglem. Ho utsôv sat dis legun chol'lo; atthvea disa, boroun dovorlolem tea pormannem êk dobajik suvalleachi sobha bhorli.
