1. Ami kott bandit asleanv hem Sanbal'latan aikolem tedna to boroch challvollo.
2. Aplea soiream mukhar ani Samarientlea unch kullantlea mon'xam huzram Judevancheô moskoreô korun mhonnunk laglo, 'He babdde Judev kitem kortole ..Hea babddea Judevam kodde zata kitem? He sôddun ditat ki na? Te iodn bhettoitole attapa ietole? Nisonttonantlea ani lason kalle zalolea, paxonni fatrank novean jivit haddunk tanchean zait?
3. Tachê kuxik Ammoni Tobia aslo tannem mhollem. Te jem bandtale tacher zôr kolean uddi marloli, tôr to tanchem kott moddun sokoll uddoitolo aslo!'
4. Deva amchea, kan diun amkam aik, tanchea dolleam mukhar ami kikont zaleanv! Tim amchim khebaddam kortat tim tanchim tankanch mellum. Lutt marun haddlolea mhala bhaxen tum tankam gulam bhogtolea desant pavoi!
5. Tanchem noxtteponn bhogsum naka. Tanchem patok tujê mukhavelem kednach puson vochum noiê. Kiteak kott bandpeancher tãnnim okman kele.
6. Titlea mhonnosor ami kott bandpachea kamak eksarkim lagloleanv, bandun pare unch modekot pavlole; kiteak lôk dhean-mon lavn kam' kori.
7. Jerusaleachea kottanchem bandkam' borench mukhar pavlam ani dharô bhôrunk suru keleat mhonn Sanballat, Tobias, Arab, Ammonitkar ani Axdoditkar hanchea kanar poddlem tedna te sap challvolle
8. ani vochun Jerusaleacher akromonn korunk ani mhojeô mannddnneô fiskottaunk soglleamnim guddmêll kelo.
9. Ami zalear amchea Devak prarthon kelem ani xarachi rakhonn zaunk dis ani rat êk pahrekar toiar kelo.
10. Punn Judeiant oxi khobor posorli 'hem kam fuddem vhortoleachem boll pavona, nisonttonachi punz iedi vhoddli ki amcheamnim durig bandunk zanvchem na.
11. Ani amchea virodhiamnim mhollem: 'Tankam kednach khobor pasun aschi na? Nhoi mhonn ekloi pollenvcho na, ani tanchê-xim pavleanv mhonn tankam kainch kollunk dinastana tankam marun tanchea rogtachi khatodd kortolenv ani magir tancho vaur bond uddoitolenv.
12. Punn tanchea xezara ravtolea Judevamnim amchê-xim ieun amkam dha pavtti tori xiddkail'le. Apunn ravtat tea sorv zageam thaun te amcher add ietale.
13. Dusrea fattlean odik sokol uktea zagear lokak tanchea kuttumba pormannem bosoile ani tanchea hatamnim tolvari, bhale ani dhonnvam dilim.
14. Te tharea bhiel'le tem hanvem pollelem ani hanvem kullvont mon'xank, odhikareank ani her lokak oxem sanglem. Tankam bhieum nakat. Sorvespor vorto ani Taka bhieun cholunk zai mhonn ugddas dhôrat ani tumchea bhavam ani putam ani tumchea dhuvam ani potinim pasot zhuzhat.
15. Amkam adim-fuddench xiddkavnni mell'lloli ani Devan tanchi manddnni fiskottail'li oxem ekdamamchea dusmanamnim aikolem tedna ami patthim sorleanv ani ami soglle durga-xim porot vochun ap-aplea vaurak lagleanv.
16. Tea disa thaun mhojech orde sevok vaurak lagle tôr her orde bhale, ddhall, dhonnvam gheun ani kovach dharonn korun Judachem ghorannem pagarachem novean bandta mhonnsor tanchi rakhonn kori.
17. Dôr eklo eka hatan kam kortalo zalear dusrea hatant bhalo gheun aslo.
18. Bandpachem kam choltana dôr-eka bandpean aplea komrak tolvar bandloli. Mhojea mhoreant eka tuturi vazovpeak ubo dovorlolo
19. kiteak hanvem kullvontank, odhikareank ani her lokank sanglolem, 'Bhorpur kam' asa ani tem zolla-molla pavlam.' Ami kottacher ximpddun asanv ani ekameka thaun pois asanv.'
20. Tuturecho avaz tumchea kanar poddtanch amchê bhonvtonnim ektthaim zaiat. Amcho Dev amchea ordhan zhuztolo
21. oxem sokallim fantea pahrar tem tinsanam pasun ami bandpachem kam' chaluch dovorlem.
22. Tech porim hanvem lokakui oxem sangun dovorlolem, 'zonn-eklean aplea chakra soit Jerusaleantuch rat sarchi. Ratcho pahro korum-ia ani disachem kam korum-ia.'
23. Hanvem, nhoi mhonn mhojea bhavamnim, nhoi mhonn mhojea sevokamnim, nhoi mhonn mhojea rakhonndaramnim aple kopdde kaddle nant. Zonn-eklean aplea uzvea hatant aplo bhalo dhorlolo.
