1. Porjek Moizesachea Pustokantlem vachtale tedna tantunt tankam oxem boroil'lem mell'llem; "Khoincheach Amonitak zanv Moabitak Devachê Sobhent provês korunk dium noiê ani oxem sodam sodankal zatolem,
2. kiteak Israelitanchea adarak jevnnak ani udkak tim pavlim nant punn urfattem amcher xrap poddunk tãnnim ani hê virudh legun Balaamak baddeak ghetlo punn amchea Devan xrap axirvadan bodol'lo."
3. Somurt aikolea uprant tãnnim sogllea videxank Israelantlim bhairailim.
4. Punn hea adim iadnika Eliashibak Devachea ghoranchea kuddancher karbhari nemlolo ani Tobiasa kodde taka soirigot asli.
5. Tobiasak tannem ek viskôll kudd toiar kelolo ani hantunt adim tannem orov-dhannea-bhettô, gondhros, aidonam ani orov dhanneacho dhavo vantto, dakvelicho soro ani tel dovorlolem. Hem sogllem updesa pormannem levitank, gavpeank dar-raknneank, iadnikanchea udorposonnak dilolem.
6. Hem sogllem zalam tedna hanv Jerusaleak naslom kiteak Babiloniechea raza Artaxerxesache rajvôttkechea bot'tisavea vorsa hanv Raza-xim gelolom. Kaim kallan patxaiachi roja magun hanv Jerusaleak
7. ailom ani Tobiasak Devachea ghorantlea rajvaddeant Eliashibak êk kudd toiar kelo.
8. Hanv ekdomuch khonvtovlom ani hanvem Tobiasachea ghorantli soglli mustaiki kuddant asli ti xevttun bhair rostear uddoili.
9. Ani magir boxttovloli kudd sarki nitôll korunk laili ani Devachea mondirantlim vapuddttalim tim aidonam, jevnna-khannacheô bhettô ani dhump hem sogllem dusreak haddunk lailem.
10. Levitank jem kitem mellunk zai aslem tem mellona zalolean te ani gavpi sevadhorm cholovpi aplea xetam-bhattamnim gele mhonn hem mhojea kanar poddlem.
11. Magir odhikareank hanvem samket apoun kaddle, Devachem mondir kiteak sanddun dilam kai mhonn hanvem vicharlem. Hanvem soglleank ektthaim korun tankam porot tancheô zuttieô ani karbhar dilim,
12. ani ak'khea Judan aplo orovdhanneacho dhavo vantto dakvelicho soro ani tel gudavan dhaddlem.
13. Gudanvanche dekh-rekh koxe iadnika Shelemiak, devshastria Zadokak, Levitam modhlea ekleak Pedaiasak, hancho adari koso Zakurachea putak Hananak, Mattaniasachea putak, hancher patieum ieta oxem hankam lekhtale dekhun hanvem tankam nemle. Aplea soireank vanttun diupachem hem tanchem kam.
14. Saiba, hea vavra pasot mhoji iad dhôr; mhojea Devachea mondirant ani tantuntlea upasona sombondim boro vavr hanvem kela, to pusun uddoum naka.
15. Tea disamnim lôk Judant son'vara dakô mollttalo tem hanvem dekhlem. Her dhaniache penddke bhôrun sorea, dakam, anjiram ani veg-vegllea jin'sam soit ojim, jim Son'varachim Jerusaleak haddunk zai aslim tim gaddvancher ghaltale. Jevnna-khannache jinos tãnnim vikche nhoi mhonn hanvem tankam mona kele.
16. Jerusaleantuch Tirantle lôk ravtale, te-i masli ani sogllê torencheô vostu xarantlea ani Judev lokank son'varache viktale.
17. Judantleam odhikareank hanvem samke solun kaddle, son'var pasun boxttavpa sarki koslim him holkottponnam!
18. Tumchea purvozamni-i oxench korunk na? Dekhunuch Devan amcher ani xaracher itlem odruxtt haddlem kai na? Son'var boxttaun, Israelacher aninkui dolldir ailolem tumkam zai?
19. Mhonnttôch son'var pavta-pavta Jerusaleachea darvontteancher kallokh poddunk lagtanch daram dhamppak ani son'var somplea bogor tim ugddum noiê mhonn hanvem tankam hukum' ghalo. Son'varacho kosloch mhal bhitôr gheun iena zaunk thoddea mhojea khaxachea chakrank darvontteancher ravunk laile.
20. Mhonnttôch ek vô don pavtt, veapareank ani sogllea toranchea mhal khopounk ailoleank Jerusalea bhairuch rat sarchi poddli,
21. tedna hanvem tankam borech bhieun kaddle ani tankam mhollem, 'Kotta fuddlean ak'khi rat tumi kiteak sartat? Porot oxench tumi korxat zalear hanv karvai kortolom.' Tedna san son'varache te anink kednach dixtti poddle nant.
22. Son'var povitr dis pallchê nimtim levitamnim apli xud'dhi korun darvontteancher pahro korcho mhonn hanvem tankam hukum' ghalo. Saiba, he-i mhojê kornnecho ugddas dhôrun tujea vhodda visvaxi mogan hanv tuka xoronna ietam.
23. Tedna-i Ashdodit, Ammonit ani Moabit hanchea bailam lagim logn zalole Judev lôk mhaka sampoddle.
24. Tanchim bhurgim-ballam, sumar tantlim ord Ashdodkaranchi bhas uloitalim, tankam Judantli bhas ienasli. Tim ap-aplê zatinchi misôll bhas uloitalim.
25. Hanvem tankam borech bhieun kaddle ani tancher xirap sôddle. Tantlea zaiteank mar ghalo ani tanche kens katrun Devacher soput gheunk lailo. Tumchea choliank tanchea choleam kodde logn korchim nant ani tancheô dhuvô tumchea choleank haddchim nant ani tumi-i tanchê kodde logn zanvchim nant!
26. Israelacho Raza Solomon osleanch bailank lagun patok korunk pavlo na? Zorui itlea raxttram modem tachê oslo razach naslo, to Devachê opurbaiecho zalolean Devan taka ak'khea Israelacho Raza kelolo torui videxi bailamnim taka patkant ghalo.
27. Itlo vhodd oprad tumi adarlo tedna Devachea adniank tumi pallo dilo? Porkea ostoream lagim logn zaun Devacho visvas tumi bhongoilo kai na?
28. Mukhel iadnik, Eliashibachea puta, Jehoiadachea putantlo eklo Horonkarantlea San'balatacho zanvoi aslo. Mhojê mukhavelo hanvem taka dhanvddaun ghalo.
29. Deva mhojea, iadnikponnachi apli mannsugi tãnnim varear uboili ani iadnikamnim ani levitamnim kelolo korar môddlo, dekhun hem tunvem monant dovorchem.
30. Oxem hanvem tankam porkeponnantle nitoll korun dôr-eka iadnikachem ani levitachem kam koslem tem tankam tharailem,
31. toxench lakddachem orponn ani prothom' utponn haddchelo vellui tharailo. Hea mhojea boreponnacho ugddas kôr, Deva mhojea!
