1. Hanvem kott bandun kaddlem ani ek pasun khanch urunk na zorui tedna porian hanvem darvontteank ozun pasun daram bosounk naslolim hem San'ballat, Tobia, Geshem Arbi ani heram dusmanachea kanar poddttôch
2. San'ballatan ani Gesheman mhaka ho nirôp patthoilo. Onachea falkeant Hakeferimant (eka kheddea ganvant) amkam ieun mell. Punn te mhojê voir khottiô manddnniô ievjitale.
3. Dekhun oxem tankam sangat mhonn hanvem niropi dhaddle: Hanv eka vhoddlea kamant gul zalam dekhun thoim hanv pavchona. Cholta tem kam thoinch sanddun tujê-xim kiteak mhonn ienvchem?
4. Char pavtti mhaka tannem tench amontronn dhaddlem ani hanvem tankam tich zap dili.
5. Panchvê pavtt toch hetu monant dovrun, ukti chitt boroun aplea chakrak mhaka apounk dhaddlo.
6. Tantunt oxem boroilolem aslem: Raxttram modem êk khobor zalea ani Gashmu ti sarki mhonntta: Tum ani Judev bondd korunk polletat ani haka lagun tum kott novean bandtai; tum tancho Raza zaunk sôdtai.
7. Jerusaleant bob marun dobajean aplo joijoikar korcho mhonn tunvem provadiank legun nemleat. Judant êk raza zala. Atam heô khobro razachea kanar pavtit, dekhun tunvench amchê-xim ieun hê vixim cheorcha keloli tôr borem zatem.
8. Tum mhonnttai toslem sod'dea hanga kaim ek ghoddlolem na oxem sangun hanvem taka porot dhaddlo; hem tujech toklentlem.
9. Mhonnttôch te amkam benkddaunk polletale, somzun he atam sarko jiv soddtole ani hanchem kam fuddem vechench na punn mhozo atmvisvas odikuch vhaddlo.
10. Magir Delaiachea putak, Shemaiak Nehetabelachea natvak, mhojê-xim ieunk mona kelolean hanvuch taka porxim bhett korunk gelom, tannem mhollem: 'Devachea mondirant, dev-sthana bhitoruch ami ektthaim zaunk zai, ami dev-sthanachim daram bond korunk zai, kiteak tuka jivexim marunk ietat ani aizuch ratim te ieupache asat!'
11. Punn hanvem khoraien zap dili, 'Mhojea sarkea mon'xan poll kaddchi! Mondirant vochun aplo jiv vanchounk ho monis koslo tôr! Hanv bhitôr vecho na.'
12. Barik chintlea uprant mhaka kollun ailem ki Devan tankam patthounk nant; tori hem bhakit tannem mhojê add kelam; Tobia ani San'ballat.
13. Hanvem bhienvchem ani oslem kam korun mhaka patki mhonncho, ani mhozo abruman kaddunk taka koslem-i nimit mellchem mhonn tãnnim poixe farik kelole.
14. Mhojea Deva, mhojê add aslolea Tobian ani provadin Noadian ani her provadi mhaka bhenkddaunk sôdtale tanchea somestanchea kortubancho ugddas dhôr.
15. Elul mhoineachea ponchvisavea disa bavon (52) disam bhitôr kott bandpachem kam purnn zalem.
16. Amchea sorv xotrumnim hem aikolem ani amchê sorvbhonvtim ravpi videxeamnim hem pollelem tedna tankam hem ek ojapuch dislem; oslem kam amchea Devache podvenuch ghoddon ailam mhonn tim somzolim.
17. Hea kallar Judantle unch kulliecheTobiasak chittir chitti dhaddunk lagle, ani tacheô-i tankam pavunk lagleô.
18. To Arachea puta Shekaniacho zanvoi zalolean ani tacho put Yohanan Berekiachea puta Meshullamachê dhuvê lagim logn zalolo mhonnttôch Judantlea zaiteamnim tachea ordan ranvchi khuxi dakhoili.
19. Mhojea samkara tachê vixim vhoddli vhoddvikuch sangtale ani hanvem kitem mhollam tem vochun te taka kolloitale. Ani mhaka bhenkddaunk Tobia chitti patthoit ravlo.
