1. Êk pavtt hem zatôch, mhaka oxem sangunk odhikari mhojê-xim aile 'Israelachea lokan, iadnikamnim ani Levitamnim Kanaankarancho, Hittitancho Perizzitancho Jebusitancho, Moabitancho, Ammoritancho, Ejiptkarancho
2. mhonngê hea ganv lokancheô kanttaleacheô chali tãnnim sôddunk na, punn tanchea putamnim ani tãnnim kãi tanchea bailam kodde logn zaleat ani oxem Povitr ganv loka borabor misôll zaun produxit zalea. Hea khottea ovisvasachê chalin, odhikari ani mukheli odik opradi zaleat.'
3. Hi khobor aikun, mhojem angavlem ani avoronn hanvem pinzlem, mhoje tokleche ani khaddache kens oddun kaddlle ani thorthorun boslom.
4. Pordexianchea ovisvasak fuddo korun, Israelachea Devachea utrank koddkoddtale te mhojê bhonvtim ekttãi zale, ani sanz zai-sôr hanv aplo thorthorun sanjechea iodna vellar porian thoinch bosun ravlom.
5. Sanjechea bolidanachea vellar, hanv Ezra porot soirannar ailom ani pinzloli nhesonn ani nhespa avoronn ghalun dimbier poddlom; Sorvesporak, mhojea Devak, mhoje hat ubarun
6. hanvem mhollem: 'Mhojea Deva, hanv loztam ani mhojem tondd Tuka dakhounk, mhojea Deva, hanv ghabortam, kiteak amchea tokliam voir pavo-sôr amchim khotteponnam vaddleant ani guneanv sorgak tenko-sôr choddla.
7. Amchea purvozanchea kallar thaun tem atam porian amcho guneanv bhov vhôdd; amchea khotteponnank lagun amkam, amchea razank ani amchea iadnikank, dusrea desanchea razanchea hatant ghalim, ani amkam torsadik, gulamponnank, luttik ani lojek pavoilim: hi amchi gôt aiz.
8. Punn atam ovchit, Sorvesporan, amchea Devan, Aplea upkaran amcho êk urlolo zomo samballun dovorlo ani Aplea povitr zagear amkam asro dilo; hê bhaxen amchea Devan amchea dolleank uzvadd haddlo ani amchea gulamponnant amkam novi ghottai dili.
9. Ami tôr gulamam; punn Devan amchea gulamponant amcher visôr ghalunk na. Persiechea razanchea dolleam mukhar Apli kaklut Tannem amkam dakhoili; ani amchea Devachem Mondir novean bandunk ani tachem ghortthann novean bandun haddunk Tannem amkam rojia mello-xi keli ani Judeiant ani Jerusaleant amkam surokxit asro dilo.
10. Punn atam amchea Deva ami kitem mhonnunk xoktanv? Tôr ami Tuje updes sôddle;
11. te tujea sevokam, provadiam udexim hea utramnim Tunvem amkam dil'lei: "zo ganv tumi tumchea tabeant korunk vetat to êk bhoxttailolo ganv, ganvchea lokan ani tanchea kanttalleachea chalimnim bhoxttailolo, ani xekanxek aplea mhellan bhôrla. Mhonnttôch tumi odik mozbut zaunk ganvchea sufollaiechea pikan jieunk ani tumchê sonstek to sodankal dovrunk tumkam zai zalear
12. tumi tumchea dhuvank tanchea choleank lognant diuncheô nhoi, nhoi mhonn tancheô dhuvô tumchea choleank lognant gheuncheô nhoi; ani tanchê kodde xanti vô boro sombond samballunk tumi husko kaddcho nhoi;"
13. Amchea vaitt kortubam ani amchea vhodd guneanvam pasot, amcher hem sogllem ailea uprant- zorui tunvem, amchea Devan, amchea khotteponnak favo asli te porim amkam xikxa dileai ani oxim suttun vochunk amkam nirmileim-
14. ami tuje updes novean môddche ani oslea kanttaleanchea chalinchea loka lagim logn zaun amcho bhosm korunk tuka rag ieuncho nhoi ani oso amcho bhosm zauncho nhoi ani amkam
15. Sorvesporak, Israelachea Deva, tum promannik, ami zomo koso aiz porian vanchun urleanv; amchem patok gheun ami tujê fuddean ietanv; hea pasot tujea mhoreant ravunk ami xokonanv.'
