1. Sirus, Persiechea razachea poilea vorsa Jeremiasachê tonddim Sorvespor uloil'lo tem utor pallchê khatir Sorvesporan Persiechea raza Sirusak sfurti dili; tedna, tannem aplea ak'khea rajeant oxi ghoxnna keli ani toktteancher marun prosidh korunk laili:
2. Sirus, Persiecho raza, oxem porgôtt korta: "Sorvesporan, sorginchea Devan, prithumêvelim sogllim rajeam mhojê adhin keleant; Jerusaleant Judachea prantant, Aplea manak ek Mondir bandunk Tannem mhaka nemla.
3. Zo konn tumchê modem Tachê porjechê ak'khê xivdder asa, tacho Dev tachê sovem asum! Tannem Judachea prantant, Jerusaleak vechem ani thoim Sorvesporak, Israelachea Devak, ek Mondir bandchem. Toch to Jerusaleant asa to Dev.
4. Ani jivim urloleantlea zonn-ekleak, khoinsorui to ravum, tea-tea ganvchea lokan rupem, bhangar, saman, bospacheô mon'zati, toxem ap-khuxen her-ui dennim diun, Jerusalea astea Devak Mondir bandunk taka adar diuncho." '
5. Tedna Juda ani Benjamin kullanchea ghorabeanche vhoddil, iadnik ani Levit, zanchea soglleanchea monank Sorvesporan sfurti dil'li, Jerusaleant vochun Sorvesporachem Mondir bandunk toiar zale;
6. ani tanchea sogllea xezaream-samariamnim tankam rupem, bhangar, saman, bospacheô mon'zati, moladik dennim ani ap-khuxen bhettovnniô korun adar dilo.
7. Tea bhair Jerusaleant thaun Sorvesporachea Mondirantleô vostu vhorun Nebukadnezzaran aplea devachea mondirant dovorloleô teô Sirus razan porot dileô.
8. Sirus, Persiechea razan teô bhanddarea, Mithredath hachea hatant dileô; hannem teô topasleô ani Sheshbazzar, Judachea kunvrachea hatant dileô.
9. Tea vostunchi xudhi hi: tis bhangarachim tattam, rupeachim êk hozar tattam, ekunntis sarke kel'le
10. bhangarache tis kanxe; rupiache êk hozar kanxe, tantle charxim-dha tattam foddlolim; êk hozar dusreô vostu.
11. Sogllim mellun, panch hozar charxim bhangaracheô ani rupeacheô vostu asleô. Jedna Sheshbazzaran pordexiank Babiloniê thaun Jerusaleak haddle, tedna tannem heô soglleô vostu apnna borabor haddleô.
