1. Uprant, jedna provadi Haggai ani Zekariah, Iddocho put, tanchê voir aslolea, Israelachea Devachea nanvan, Judantlea ani Jeruzantleantlea Judevank, bhakitam korunk lagle,
2. tedna, Zerubbabel, Shealtielacho put ani Jeshua, Jozadakacho put, Jerusaleant, Devachem Mondir novean bandunk suru kelem; tanchê bori tankam boll diun Devache provadi asle.
3. Tea vellar, Tattenai, Eufrat nodichê poltoddichea prantacho rajpal, Shethar-Bozenai ani tanche bhageli tanchê-xim aile ani vicharlem: 'Hem Mondir novean bandunk tachi bandavôll sompounk tumkam konnem hukum' dila?
4. Hi bandavôll ubartat tanchim nanvam konn?'
5. Punn tanche Devache dolle Judevanchea zantteancher asle; Darius-ak hea vixoiacho vako pattoun tacho odhikrut zobab pavosor vavr bollan bond korunk lailo na.
6. Tattenai Eufrat nodichê poltoddi prantachea rajpalan Shethar-Bozenai- hannem ani tachea bageliamnim Eufrat nodichê poltoddichea prantachea odhikareamnim Darius razak
7. patthoil'lea potrachi hi proti, tãnnim taka ho vakho patthoilo: 'Darius razak, maiêmogacho nomoskar!
8. Razak kollounk zai ki ami Judachea prantant, Vortea Devachea Mondira-xim geloleanv: tem chireamnim bandtat; vollonttimnim lamb pattiô bhorleat; vavr nettan chol'la ani suddsuddit fuddem veta.
9. Zantteank prosn korun ami vicharlem, "Hem Mondir bandunk ani tachi bandavôll sompounk tumkam konnem rojea dilea?"
10. Tuka kollounk, ami tanchim nanvam-i vicharlim.
11. Tãnnim amkam oso zobab dilo, "Ami sorga ani sonvsarachea Devache sevok; ami hem Mondir novean bandtanv; tem khub vorsam adim Israelachea eka vhoddlea razan bandlolem ani sompoilolem.
12. Punn amchea purvozamnim, sorginchea Devak tiddkailo ani tannem tankam, Kaldeiekara, Nebukadnezzara, Babiloniechea razachea hatant dile: tannem hea Devmondiracho bhosm kelo ani porjek Babilonient pordesak dhaddli.
13. Sirusa, Babiloniechea razachea poilea vorsa, Sirus Razan, hem Devachem Mondir novean bandchem mhonn êk odhikrut hukum' dilo;
14. tea bhair, Devachea Mondiracheô bhangracheô ani rupeacheô Nebukadnezzaran Jerusaleantlim kaddun Nikea Mondirant, Babilionient vheleô, Sirus Razan Babiloniechea mondirantlem kaddun Sheshbazzar nanvachea mon'xa lagim Zaka tannem rajpal nemlolo dileô
15. ani taka oxem sanglem: 'Heô vostu ghe; voch ani Jerusaleantlea Mondirak teô portun di ani Devachem Mondir tachea purvilea zagear novean bandun ieum di;'
16. to Sheshbazzar uprant ailo ani Jerusaleant, Devachem Mondir bandunk buniad ghatli. Tedna thaun tacho bandpacho vavr cholot asa, punn ozun porian tem somponk na."
17. Mhonnttôch, Razak borem disot zalear, Babilonient, razachea sorkari duddvam-vevharachea khateant sôdpus korchi ani Sirusa razan Jerusaleant Devachem Mondir novean bandunk odhikrut hukum' khorench dilolo zalear ruzu korchem hê vixim razacho nirnnoi amkam dhaddun diuncho.'
