1. Darius razachea hukuma pormannem, Babilonient razachea duddvanchea khateant aslolea doptor-khanneant vaspus kelo
2. ani Erbatana kottant, êk kovllo mell'llo tacher oxem boroilolem aslem: 'Nivedon.
3. Sirus razachea poilea vorsa, Sirus razan oso nirnnoi dilo: "Devachem Mondir, Jerusaleant. "Mondir novean bandcho ani thoim boliô ani hom' bhettounchim. Tachi unchai satt hat, rundai satt hat astoli:
4. Taka tin fatranchi ani êk lakddachi thov asunk zai. Rajkoxan ho khorch korcho.
5. Tea bhair, Devachea mondirantlim bhangra ani rupea aidonam Nebukadnezzaran Jerusaleantlim vhorun Babilonient haddlolim, tim portun vhorun Jerusaleant mondirant ap-aplê svater portun diunchim, ani Devachea mondirant dovorchim."
6. Mhonnttôch, Tattenai, Eufrates polltoddcho rajpal Shethar-Bozenai ani tumche sangati, Eufrat poltoddiche odhikari hea kamache pois ravat;
7. Darìus razan Eufratesachê poltoddchea prantantlea odhikariank oxem boroilem: 'Judachea Odhipotik ani Judevanchea zannteank Devachem Mondir bandunk diat; adlêch svater Devachem Mondir tãnnim bandchem.
8. Hem Devachem Mondir novean bandunk tumi koxê bhaxen Judevanchea vhoddilank adar diunk zai tê vixim hanv oso hukum' ghaltam: hea lokanchi mozuri rokddea-rokddi ani chukoinastana razachê iennavollintlean farik korchi. Hi iennavôll Eufratesachê poltoddchea prantantlea lokacho dôndd.'
9. Sorginchea Devak hom' bhettounk goroz tem tankam dispottim ani chukhoinastana diunchem: mhonngê tornne padde, menddre, bokdde, gonv, mitt, soro ani tel;
10. Jerusaleache iadnik hê toren tanche iodn magtit te pormannem sorginchea Devak mantat tosleô zanvcheô ani raza ani tachea putanchea mota khatir magchem.
11. Tea bhair hanv oxem formonn porgôtt kortam: konnui hem formonn pallina, tachea ghorachi êk patti môddchi, taka sullkar choddouncho ani tachea ghorachi êk kochreachi ras tachea opmana pasot korchi.
12. Hanv Darìus hem formonn porgôtt kortam. Tem asa toxem sarkem pallchem!'
13. Tattenai, Eufrates poltôddchea prantacho rajpal Shethar-Bozenai ani tachea sangateamnim, Darius razacho hukum' barkaien pall'lo;
14. Haggai provadian ani Zakarìas Idochea putan dil'lea dhiran, Judevanchea zannteamnim bandpacho vavr fuddem vhelo. Israelachea Devachea hukuma pormannem ani Sirus ani Darius hanchea formonna pormannem sogllem bandop tãnnim sompoilem.
15. Adar mhoineachea tevisvea disa hem Mondir bandun toiar zalem. Dariusachê razvôttkechea sovea vorsa hem ghòddlem.
16. Israelitamnim iadnikamnim, Levitamnim ani pordesantlea urloleamnim khuxalkaien hea Devachea Mondirachem somorponn kelem;
17. hea Devachea Mondirachea somorponna somoiar tãnnim xembor boil, don'xim vhodd menddre, charxim lhan menddre ani, ak'khea Israelachea patkam khatir farikponnachem bolidan koxem, Israelachea bara kullam pormannem bara bokdde bhettoile.
18. Magir, Moizesachea Pustokar boroil'lem asa toxem, Jerusaleant, Devachea Mondirachê sevek, ap-aplea vorgam pormannem tãnnim iadnik nemun dovorle.
19. Poilea mhoineachea chovdavea disa, pordesant thaun portun ailoleamnim Paskanchi porob somarombhli.
20. Êkuch monis zalolê porim, Levitamnim apnnachi xud'dhi keloli; te soglle nitoll asle dekhun, pordesant thaun ailoleam khatir, aplea bhavam iadnikam khatir ani apnnachêch khatir tãnnim Paskanchem bolidan kelem.
21. Pordesant sakun portun ailolim Israelkaram, ani jim sogllim, bhonvtonchea lokacheô mhelleô chali sôddun Sorvespora Israelachea tanchê borabor Devacher alaxiro ghetlolo, Paskachem jevonn khelem.
22. Sat dis porian, Khomir naxil'lea Unddeachi porob dhadoskaien somarombhli, kiteak khuxal zaunk, Sorvesporan tankam karonn dilolem; tor Assiriechea razachem kalliz tanchê vatten movallun, Israelachea Devachea Mondirachea vaurak tannem tankam dhir dilolo.
