1. Porot ailole Pordexi, Sorvespora, Israelachea Devak, Mondir bandtat mhonn, Judeiachea ani Benjaminachea dusmananchea kanar sadovlem,
2. tedna te Zerubbabela ani Jeshuaani ghorabeanchea vhoddilam-xim aile ani tãnnim mhollem, 'bandunk tumkam adar dium-ia kiteak tumchêch bhaxen ami-i tumchea Devak xeronna ietanv ani Esarhaddonan, Asiriechea razan, zannem amkam hanga haddleant tea kallar thaun ami taka boliô voptanv.'
3. Zerubbabel; Jeshua ani Israel lokachea ghorabeachea vhoddilamnim zobab dilo, 'Amchea Devak Mondir bandunk tumi amchea sangata ieunk sarkem na; Sirusan, Persiechea razan amkam hukum' ghala toso, khud ami Sorvesporak, Israelachea Devak tem bandtoleanv.'
4. Uprant tem Mondir bandina zaunk, desantlo lôk, Judachea lokachem kalliz môddunk ani tankam bhenkddaunk bhair sorlo;
5. Sirusa, Persiechea Razachê razvôttkê thaun Dariusa, Persiechea razachê razvottkê meren tancho hetu fiskottaunk tãnnim budhvontank-ui lonch dili.
6. Xerxes, hachê razvôttkechê survatek, tãnnim, Judant ani Jerusaleant ravtoleancher add êk firiad manddli.
7. Artaxerxesachea kallar, Mithredath, Tabeel ani tanchea sangatiamnim Artaxerxesa, Persiechea razak boroun, Jerusaleacher arôp manddlo; hem potr Aramaik lipient ani bolient aslem.
8. Tedna Rehum Rajpalan ani Shimshai tachea chitnnisan Jerusaleacher arôp manddun Artaxerxes razak hi chitt boroili:
9. Rehum rajpal ani Shimshai chitnnis ani tanche her sangati, nitidar, dut, Persieche odhikari, Urukantlo, Babilionentlo ani Susantlo lôk mhonngê Elmacho lôk ani zo lôk vhoddlea ani xrêxtt Assurbanipalan pordesant dhaddlolean ani zankam Samarient ani Eufrates nodichê poltoddi ravunk dilem
10. he soglle hi chitt boroitat.'
11. Tichi hi proti: 'Artaxerxes razak, tuje sevok, Eufrates nodiche poltoddicho lôk:
12. Razak gomun ieunk zai ki, Tujê thaun Judev je Jerusaleant aileat te atam tem fitur ani noxttem xar novean bandtat; te kottam novean bandtat, ani buniadi ghaltat;
13. tôr razak gomunk zai ki, tem xar bandlear ani khottam sarkim kelear te dondd, zokat ani potti farik korchenant, ani oxem razak luskan zatolem; tôr atam ami razachem mitt khatanv dekhun razak opman kel'lo amchean polleunk zai na;
14. hea khatir, ami hi mahiti razak dhaddtanv, tumchea purvozanchea doptor-khanneant vaspus korchê khatir:
15. tea doptor-khanneant hem xar ek fitur xar mhonn razancho ani prantancho xirap, ani purvilea kallar thaun bondd thoim thaun uprasleat mhonn tuka thavem zatolem; heach khatir tea xarachem nisontton kel'lem.
16. Hem xar novean bandlem zalear ani tachim kottam sarkim kelim zalear, Eufrati nodichê altoddi tuka veginch prant anink asche nant mhonn ami razak gomoitanv.
17. Razan oso zobab dhaddlo: 'Razpal Rehumak chitnnis Shimshaiak ani Samarient ani dusrê kodden Eufrati nodi poltoddi ravtolea tanchea sogllea sangateank noman!
18. Tumi amkam patthoilolo dakhllo, zotnaien mhaka utrailo,
19. ani mhojê hukumê promannem, vaspus keli ani adim thaun hem xar razancher upraslam ani tantunt bondd ani fiturai ghoddun haddleant mhonn amkam thavem zalem.
20. Jerusaleant bollixtt razamnim Eufrat nodichê poltoddê raj toxench choloilam ani dondd, zokat ani potti tãnnim vosul kelea mhonn thavem zalam.
21. Tumi, tea mon'xank vaur bond korunk adnia diat: Hanv hukum' dii porian hem xar novean bandchem noiê.
22. Hea kamant allxi zaina zaunk chotur ravat. Kiteak mhonn razak sonkoxttant ghali porian, luskan vaddot urchem?'
23. Artaxerxes razacho dakhlo rajpal Rehukak, Shimeshai chittnisak ani tanchea sangateank vachina fuddem, Jerusaleantleant Judevam-xim vochun tãnnim hatiaranchea bollan vavr bond kelo.
24. Hê toren, Jerusaleant, Devachea Mondiracho vavr thamblo; ani Darius, Persiechea razachea dusrea vorsa meren tosoch urlo.
