1. Hea ghoddnneam uprant, Artaxerxesa, Persiechea razachea kallar, Ezra Seraiahcho put, Azariahcho put, Hilkiahcho put,
2. Shallumacho put, Zadokacho put, Ahitubacho put,
3. Amariahcho put, Azariahcho put, Meraiothacho put,
4. Zerahiahcho put, Uzzicho put, Bukkicho put,
5. Abishuacho put, Finehasacho put, Eleazaracho put, porom Iadnika Aaronacho put
6. ho Ezra, Babilonient thaun ailo. To êk dhormxastri Sorvespora, Israelachea Devan, Moizesak dilolê somurtint boro goll'lolo aslo. Sorvespora tachea Devacho hat tachê voir aslo dekhun to magi titlem-i raza taka ditalo.
7. Artaxerxes razachea rajvôttkechea satvea vorsa puskôll Israelkar iadnik, Levit, gavpi, dar rakhnne ani Mondirache sevok Jerusalea choddun gele.
8. Ezra Jerusaleant panchvea mhoineant ailo; tem, razachê rajvôttkechem satvem voros aslem;
9. kiteak, poilea mhoineachea poilea disa, tannem Babilonientlo bhair sorunk nirnnoi dilolo ani, panchvea mhoineachea poilea disa to Jerusaleant pavlo, tôr tachea Devacho mogall hat tachê voir aslo.
10. Kiteak Ezra Sorvesporachi Sumurt xikunk ani oxi ti vevharant ghalunk ani Israel lokak tichea nemam kaideanchi somzonni diunk to ap-bhettlolo.
11. Ezrak, iadnika-dhormxastreak, Sorvesporachea Israel lokak lagu zatolea nema kaideancho, Artaxerxes razan dilolea lekh-potrachem hem vakhia:
12. Razancho Raza, Artaxerxes, Ezrak Sorginchea Devachê Somurtichea xastreak, nomoskar!
13. He asat mhoje nem': Mhojea rajeantle soglle Israelachea lokache vangddi, iadnik ani Levit soit, ap-khuxen, Jerusaleant vochunk tharav gheit te tujê borabor vochum ietat.
14. Tôr, tujea Devache Somurticho tum xastri mhonnttôch, ti koxi Judant ani Jerusaleant vevharant ghatlea hachi topasnni korunk tuka raza ani tache sat budhvont patthoitat, toxench Jerusaleant ravtolea, Israelachea Devak Razan
15. ani tachea budhvontamnim ap-khuxen bhettoilam tem rupem ani bhangar vhorunk,
16. têch borabor Babiloniechea ak'khea prantant tuka diit titlem-i rupem ani bhangar, ani Jerusaleantlea, Devachea Mondirak, lokan ani iadnikamnim ap-khuxen dil'lim dennim vhorunk tuka patthoitat.
17. Heach duddvamnim padde, menddre, bokdde ani bhettovnniank ani orpil'lea pivonnank vapurcheô vostu barkaien vikteô ghe ani teô Jerusaleant tujea Devachea Mondirachê vedicher vôp.
18. Urlolem bhangar ani rupem, tujea Devachê khuxê pormannem, tuka ani tujea bhavank sarkem dista toxem korchat.
19. Tujea Devachea Mondirachê sevek tuka dil'leô vostu, Jerusaleant Deva fuddeant dovor.
20. Ani aninkui kitem tujea Devachea Mondirak gorjechem ani tuka kaideachem dista tem rajkoxantlem purvonn kôr.
21. Hanv, Raza Artaxerxes Eufratesa poltoddchea prantachea bhanddariank heô adnia ditam: Sorginchea Devachê Sumurticho chittnis, iadnik, Ezra, tumchê kodde kitem-i magit tem taka tem barkaien pallchem:
22. rupeache xembor talent porian gonvache xembor kor porian, soreache xembor bat porian, telache xembor bat porian, ani mitt, mitmer nastana.
23. Sorginchea Devachea Mondira khatir, sorgincho Dev jem sogllem kitem magta titlem-i, fikirin diuk zai; na tôr, Devachea ragachem farikponn razacher ani tachea putancher ieunchem na?
24. Tuka hem-i kollit kortam ki Iadnikancher, Levitancher, gavpiancher, dar-rakhnneancher, Dev Mondirachea gulamancher ani heram sevokancher dondd, khor, potti ghalunk mona kelam.
25. Ani tum, Ezra, Tujea Devan tuka dil'lê zannvaiê vorvim, Eufrates poltoddchea sogllea lokak neai korchê khatir, dhormxastri ani nitidar nimiar mhonngê tujea Devachi Somurt vollkhotat tankam, ani ti vollkhonant tankam tum ti xikoi.
26. Ani konnui Tujea Devachi Sumurt ani Razachi Sumurt pallina, taka xikxa suddsuddit diunchi: Moronn, bhairavop, dondd vô bondkhonn.'
27. Sorvespora amchea purvozanchea Devak vakhannni, Jerusaleant, Sorvespora amchea purvozanchea Devak vakhannni! Tannem hê bhaxen Jerusaleant Sorvesporachea mondirachi sobitai novsorunk Razachem kalliz movall'lem.
28. Razacho, tachea budhvontancho dut Razachea sogllea bhov podvedar odhikarancho visvaxi môg mhaka zôddun ghetlo. Sorvespora Devacho hat mhojer asa. Kalljidarponnan mhojê borabor ghorabe veche asat tanchea vhoddilank hanvem zoma kele.
