1. Jedna satvo mhoino laglo ani Israelachea putamnim ap-aplea nogramnim novean thikann kelea uprant te soglle Jerusaleant ekuch monis koxe ektthovle.
2. Tedna Jeshuan, Jozadakachea putan, aplea iadnik-bhavam borabor, ani Zerubbabelan, Shealtielachea putan, aplea bhavam borabor Israelachea Devachi vedi novean bandunk suru keli ticher hom' bhettounk Devachea mon'xa Moizesachê Somurtint boroil'lem asa tea pormannem.
3. Sorvbhonvtonnchea lokachi bhirant astanam-i, tãnnim vedi adleach zagear bandli ani ticher Sorvesporak hom' vople, hom' sokallim ani sanjê;
4. kaidea pormannem, tãnnim tombunchi porob somarombhli, dôr disa kaidea pormannem, favo title hom' vople, tea bhair son'vara disak nemlole nirontor hom' bhettoile; toxech amasam
5. ani Sorvesporachea porbam somoiar hom' vople ani khasgi mon'xamnim Sorvesporak ap-khuxen dil'lim dennim voplim.
6. atvea mhoineachea poilea disa thaun, zorui mondirachi ozun buniad ghalunk nasli, tim Sorvesporak hom' bhettounk laglim.
7. Uprant gonvddeank ani thovoiank tãnnim duddu dilo ani toxench Sidoniekarank ani Tiriekarank jevonn, pivonn ani tel dilem, hãnnim devdarachem lankudd, Lebanon thaun Jaffak doriantlean haddunk, hea kamak Sirusan, Persiechea razan, porvangi dil'li.
8. Jerusaleant, Devachea mondiraxim dusre pavlea uprant, vorsachea dusrea mhoineant, Zerubbabelan, Shealtielachea putan ani Jeshuan, Jozadakachea putan aplea sogllea bhavam, iadnikam, Levitam ani pordesant thaun Jerusaleant portotolea loka borabor, vavrak survat dili; tãnnim vis vô odik vorsam axil'lea Levitank, Sorvesporachea Mondirachea kamache dekhrekhi nemle.
9. Mhonnttôch, Levit, Jeshua, tache put ani bhav, Kadmiel ani tache put Binnui, Hodaviahche put Devachea Mondirachem kam kortoleanche dekhrek ravunk toiar zale.
10. Jedna bandpiamnim, Sorvesporachea Mondirachi buniad ghali, tedna iadnik aplim vostram nhesun tuturiô gheun fuddem ube ravle, ani Levit, Asafache put, kansallim gheun, David, Israelachea razachea nivaddeam pormannem, Sorvesporak vakhannunk ube ravle.
11. Tãnnim Sorvesporak vakhannni ani dhinvasnni gaionamnim orpili; kiteak Israela sovem te mhonnttale 'To boro ani Tacho visvaxi môg sasnnacho.' Tedna Sorvesporachea Mondirachi buniad atam ghatloli dekhun sogllo lok mottheô bobô marun Sorvesporak vakhannunk lagle.
12. Novea Mondirachi buniad aplea dolleam mukhar ghatloli polleun, poilinchem Mondir dekhlolem, tosle zaite mhatare iadnik, Levit, ani ghorabeanche vhoddil chodd mottean roddle, punn zaitea dusreamnim khuxalkaien bob marli;
13. oxem konn khuxalkaien bobô martalo, ani konn roddtalo hem somzonaslem, kiteak lokan itlea mottean bob marli ki to avaz pois aikum ietalo.
