1. Vedichê kuxik ubo aslolea Sorvesporak hanvem pollelo. Tannem mhollem: 'Khambeancheô tenkxiô marun uddoi ani umbre porian kolkolom di. Tancheô soglleancheô tokliô foddun churo kôr! Eklo punn chukom noiê! Ani konn jivim urlim zalear, tankam soglleank Hanv tolvarin marun uddoitolom, konnankuch pollun vochunk mellchem na, eklo punn suttchona.
2. Norkant porian bhitôr riglear, Mhozo hat tankam oddun bhair kaddtolo, unch ontrallar porian choddun gelear, Hanv tankam khala denvoun haddtolom.
3. Karmelachê tenkxer porian lipun ravlear, thoinsorlim Hanv tankam sôdun kaddtolom ani dhôrtolom. Mhojea dolleam mukhailim doriachea pottant pollun ravlear, thoim tankam chabunk Hanv Sorpak hukum ghaltolom.
4. Tanchea dusmanamnim tankam koidi korun chombeamnim pordesant vhelim zalear, thoim tankam marun uddounk Hanv tolvarik hukum ghaltolom. Tankam borem korunk nhoi, punn tanchem nisontton korunk Mhoje dolle tancher lailole astole.'
5. Sorvespor, Sorvsoktivont Dev, prithvek hat lait zalear ti koddhon vetoli, ani ticher jietat tim sogllim dukh kortolim; Nil nodi bhaxen ti soglli bhoron ietoli ani Ejiptachê Nil nodi bhaxenuch thôndd zatoli.
6. Voir ontrallar Aplem tthikann bandta, prithumer Aplem bobd thir ghott korun dovorta, to Toch! Doriantlim udkam apoita ani prithumecher tim rokoita, to Toch. Tachem nanv Sorvespor!
7. Israelachea putam-dhuvamnô, tumi ani Ethiopiekaram Mhojê mukhar êkuch nhoi? Uloita to Sorvespor! Israelak Hanvem Ejiptantlo bhair kaddla, khorem. Punn toxinch Filistevkarank Kaftorantlim ani Aramkarank Kirantlim Hanvench bhair kaddunk nant kitem?
8. Polleiat, Sorvespora Devache dolle patki rajeacher lailole asat. Prithumê velem taka Hanv nanch kortolom. Tori Jakobachea Ghoranneacho Hanv sarko nas korcho na. Uloita to Sorvespor!
9. Atam Hanv hukum ghaltolom, ani, challnnint ghalun konne haloitat toxem, sogllea raxttram modem Israelachem Ghorannem haloitolom, êk punn konno zomnir poddcho na.
10. Amkam kãich vaitt zaunchem na, amcher koslench noxtt ieunchem na!', oxem mhonnttat tim Mhojê porjentlim sogllim patki mon'xam tolvarin mortolim.
11. Tea disa Davidacho môddlolo tombu Hanv novean ubartolom, tacheô futti sarkeô kortolom, tachem ghorttann novean ubem kortolom ani adim aslo tosoch Hanv to portun bandun haddtolom.
12. Oxem tim Edomachea urloleank ani Mhojem nanv dil'lem asa tea sogllea raxttrank apnnanchê adhin korunk pavtolim -uloita to Sorvespor!- ani Toch tem ghoddo-xem kortolo.
13. Polleiat osle dis ietat -uloita to Sorvespor!- ki eka pattlean êk ietoleô xetanchi kasnni ani pikachi lunvnni, toxench dakanchi môllnni ani bianchi vompnni. Porvotantlo novo soro pazhortolo ani sogllea dongram voilean to vhanvun ietolo.
14. Hanv Israel Mhojê porjek tichi adli dhon-girestkai porot ditolom, padd zal'lim xaram tim novean bandtolim ani thoim ravtolim. Dakam-molle laitolim ani soro pietolim, porsam laitolim ani thoinchim follam khatolim.
15. Hanv tankam tancheach desant portun laitolom, ani Hanvem tankam dila tea desantlim konn tankam anink umttun kaddcho na. Uloita to Sorvespor, tuzo Dev!
