1. Sorvespora Devan mhaka dorxonant dakhoilem tem hem: piklolea follamnim bhòrlolo êk korondd.
2. Tannem vicharlem: 'Amos, kitem dixtti poddta tuka?' Hanvem mhollem: 'Piklolea follamnim bhòrlolo êk korondd.' Tedna Sorvesporan mhaka mhollem: 'Israel Mhojê porjecho xevôtt lagim pavla. Tanche okman Hanv anink bhôgxicho na.
3. Tea disa razvaddeant gaionam bodla aikum ietoleô hueli. Uloita to Sorvespor Dev! Zaitim moddim zollim-mollim ximpoddlolim astolim. Gopchup ravat!'
4. Jim tumi gorjevontank pãiam tolla mostitat ani ganvchea goribank nanch korunk sôdtat, tim tumi hea utrak kan diat:
5. Tumi mhonnttat: 'Amcho dhanno-gotto vikpak Amas kedna sortoli? Ani amcho gonv vikrek ghalpak Son'var kedna somptolo? Tedna amchean map lhan korunk ani kimôt choddounk zatolem ani khotti tagddi vaprun ami lokak ottounk xoktoleanv.
6. Tedna rupem diun amchean goribank viktim gheunk zatolem, ani vhannanchi êk zoddi diun ami gorjevontank viktim gheunk xoktoleanv, ani gonvachem pol legun diun ami duddu korunk pavtoleanv.'
7. Jakobachea obhimanan Sorvespor oso soput gheta: 'Tanchim khoinchinch kortubam Hanv kodinch visorcho na.'
8. Ani heach khatir bhuim kampchi na kai? Ani desant ravtat tim sogllim dukh korchim nant kai? Nil nodi bhaxen to sogllo dês bhoron ietolo, ani uchambôll zalea uprant Ejiptachê Nil nodi bhaxenuch to thôndd zatolo!
9. Tea disa - uloita to Sorvespor Dev! Hanv don'parchea vellar suria poddo-so kortolom ani disa uzvadda prithver kallôkh ghaltolom.
10. Tumcheô porbô kaddun Hanv tumkam dukh korunk sôddtolom ani tumchim gaionam thamboun tumkam vilapuch korunk ditolom. Tumam-somestanchea komrak sakafottem ghaltolom ani tumam soglleancheô tokliô tasun boddkiô kortolom. Ekach putachem dukh kortat toslem tem dukh zai-xem Hanv kortolom ani hea sogttacho xevôtt êk koddu-koddu dis koso zatolo.
11. Osle dis ieunche asat - uloita to Sorvespor Dev! ki Hanv desacher dukôll dhaddtolom, punn jevnna-khannachi bhuk nhoi ti, nhoi mhonn udkachi tan nhoi ti, punn Sorvesporachem utor aikopachi bhuk ani tan.
12. Sorvesporachem utor sôdunk tim eka doria thaun dusrea doria porian dhoddpoddot vetolim, utorek thaun udentek porian tim bhonvot astolim, punn tem tankam mellchem na.
13. Tea disa tanek lagun jintt marun poddtolim sobit tornnim cheddvam ani toxench kalljidar tornnatte.
14. Samariechea Ashimachean soput ghetat tim, "Dan tujea devachean" ani "Beershebachê iatrechê vattechean", oxem mhonnun soput ghetat tim, sogllim poddtolim ani portun kednanch utthchim nant.
