1. Sorvespor oxem sangta: Moabachea tin -na, char mhonnttam- khunam khatir Hanvem mhozo tharav ghetla, to Hanv anink bodôlcho na. Edomachea razachim haddam tannem chunean laslim dekhun,
2. Keriotache razvadde lasun uddounk Hanv Moabacher uzo dhaddtolom. Ani tea gondhollant, zhuzachea vellar martat toslea bobô-hueli modem ani korneanchea avazar, Moab mortolo.
3. Tanchê modlea odhikariak ani tachê borabôr sogllea tachea sordarank Hanv marun uddoitolom. Oxem mhonntta Sorvespor.
4. Sorvespor oxem sangta: Judachea tin - na, char mhonnttam- khunam khatir Hanvem Mhozo tharav ghetla, to Hanv anink bodôlcho na. Sorvesporachi Somurt tãnnim sôddun dili ani Tacheô adnia samballunk nant dekhun, ani tanchea purvozamnim bhôzlolea kud'dea devamnim khottea margar tankam pavoilim dekhun,
5. Jerusaleache razvadde lasun uddounk Hanv Judacher uzo dhaddtolom.
6. Sorvespor oxem sangta: Israelacheam tin -na, char mhonnttam- khunam khatir Hanvem Mhozo tharav ghetla, to Hanv anink bodôlcho na. Rupem diun promannik mon'xank, ani vhannanchi zoddi diun gorib mon'xank, tim viktat dekhun,
7. osokt mon'xancheô tokliô tim dhullint mostitat ani durbollanche hok'k kuxik uddoitat dekhun, Mhojem povitr nanv boxttaun, bapui ani put ekach cheddva lagim nhidtat dekhun,
8. gahannak ghetlolea angavleancher vedichê bazuk add poddtat dekhun, ani dôndd ghalun ghetlolo soro aplea Devachea ghorant pietat dekhun
9. Amorit lôk devdharam bhaxenunch ani xindur rukham vori mozbut aslo; tori tea lokacho Hanvench tanchê fuddem nas kelo. Zomni voir tanchea follam soit ani zomni khala tanchea pallam soit Hanvem tancho nas kelo.
10. Hanvench tumkam Ejiptantlim bhair kaddlim, ani Amoritancho dês tumchê adhin korchê khatir challis vorsam Hanvem tumkam oronneant choloilim.
11. Tumchea putam modle provadi ani tumchea tornnatteam modle Nazirit Hanvench upzoile. Israelachea putam-dhuvamnô, hem khorem nhoi? Uloita to Sorvespor!
12. Punn tumi Naziritank soro pieunk boll kelem ani anink bhakit korum nakat mhonn provadiank tumi hukum ghalo.
13. Puro atam! Zoso dhannean bhòrlolo gaddo apnna khal asa titlem chirddun ghalta, toxench hem sogott tumi asat thoinsoruch tumkam chirdditolem ani tumcho churo kortolem.
14. Vegan dhanvpiamnim porian pollun vochunk zaunchem na; bollixttank aplem boll dakhounk mellchem na, zhuzariamnim aploch jiv rakhunk ghòddchem na.
15. Bhalekar zomnir ube urche nant, vegan dhanvpi sutton veche nant, ghoddesvar aploch jiv vanchounk xokche nant.
16. Tea disa bollvontam modem odik kalljidar asat te zhuzari porian aplim ostram-xostram sôddun pollun vetole! Uloita to Sorvespor!
