1. Bashanachea gaiamnô, hem utor aikat: tumi Samariechea dongrar jietat, gorjevontank tumi mostitat, durbollank tumi pilltat, tumchea ghovank tumi mhonnttat: 'Amkam kitem-i pieunk haddat!'
2. Sorvespora Devan Aplê povitrtaiechea nanvan oso soput ghetla: osle dis atam tumcher ieunche zale ki gore ghalun tumkam oddun vhortole, tumchê modlea nimanneank legun goriô ghalun oddun vhortole.
3. Vonntichea khavtteantlean tumi bhair sortoleat, êkê pattlean êk nitt fuddem tumi vetoleat, ani Hermonak pavo porian tumkam dhanvddaitole -uloita to Sorvespor!
4. Bethelant vochat ani patok korat, Gilgalak vochat ani odikuch patok korat. Dôr sokallim tumche iodn gheun ieiat, ani dôr tisrea disa tumcho dhavo vantto haddat.
5. Fugoil'lem pitt vakhannnnecho iôdn koso lasat, tumcheô ap-khuxen kel'leô bhettovnniô sobhêmazar porgôtt korat, kiteak hench ki tumkam khuxal korta, Israelachea putam-dhuvamnô. Uloita to Sorvespor Dev!
6. Tea pasot, sogllea tumchea xaram-nogramnim tumche dant Hanvem saf dovorleat, sogllea tumchea ganvamnim unddo nastana Hanvem tumkam sôddleant; torui tumi Mhojê-xim portun ieunk nant. Uloita to Sorvespor!
7. Lunvnnê adim tin mhoine-bhôr paus addaun Hanvem tumkam dovorlim; eka nogracher paus poddunk dilo zalear, dusrea nogracher poddunk diunk na; eka xetacher paus poddlo, ani paus nastana dusrem sukun gelem.
8. Don nogram, tin nogram dhoddpoddot cholun eka chovthea nogrant udok magunk pavlim, punn tanchi tan bhagounk zali na; ani torui tumi Mhojê-xim portun ieunk nant. Uloita to Sorvespor!
9. Dhukean ani burxin tumchim xetam-bhattam Hanvem padd kelim, ani tumcheô bagô ani dakam-molle Hanvem sukoilim; tollamnim tumchim anjirachim ani zoitunanchim zhaddam khaun uddoilim, ani torui tumi Mhojê-xim portun ieunk nant. Uloita to Sorvespor!
10. Ejiptachê xikxê sarki tumcher-ui Hanvem xikxa dhaddli, tumchea tornnatteank Hanvem tolvarin marun uddoile, ani tumchea ghoddeank dhôrun vhorunk dile; tumchea xetantlê ghannin tumcheô nakpuddiô Hanvem bhôrleô, ani torui tumi Mhojê-xim portun ieunk nant. Uloita to Sorvespor!
11. Zoxem Sodomachem ani Gomorrachem Devan nisontton kelem, toxem Hanvem tumchem nisontton kelem; zolltea agtteantlê kaddlolê êkê boddiê sarkim tumi zal'leant. Torui tumi Mhojê-xim portun ieunk nant. Uloita to Sorvespor!
12. Hench, Israela, tujê vixim korunk Hanvem chintlam, ani hem Hanv tujê vixim korunk vetam mhonnttôch, Israela, tujea Deva mellunk toiar za!
13. Porvot Tannem ghôddleat, varem Tannem rochlam, mon'xakullak To Aplem mon kolloita, fantem ani kallôkh Toch rochun haddta, ani sonvsarachea vhodd-vhodd tenkxiancher To dhempamnim cholta. Sorvespor, Sorvsoktivont Dev, hem Tachem nanv!
