1. Israelachea putam-dhuvamnô, tumcher add, mhonngê Ejiptantlem Hanvem bhair kaddlem tea ak'khea Ghoranneacher add, Sorvespor uloita tea utrak kan diat:
2. Prithumê velea sogllea ghoranneam modem fokot tumkam Hanvem Mhojim mhonn vollkhun ghetleant. Dekhun sogllea tumchea khotteponnam khatir Hanv tumkam khast lavunk vetam.
3. Apnnam modem adim-fuddench kobul zainastana dog dadle borabôr êkuch rosto dhôrtat?
4. Kãich apnnak xikar mellonastana ranant xinv gorôz ghalta? Kitench dhôrinastana xinvacho pilo kil'lonch marta?
5. Taka kãi fas manddinastana suknnem zomnir poddta? Kãich dhorinastana fas zomni velo voir sorta?
6. Xarant tuturi vazot zalear, lokak kampero suttcho na? Sorvespor dhaddina zalear, xarant noxtt ieta?
7. Aplea sevokam provadiank Apli ievzônn kolloinastana Dhoni Sorvespor kitench korina.
8. Xinv gorôz ghalta: konn bhienastana ravot? Sorvespor Dev uloita: bhakit korinastana konnachean ravunk zait?
9. Ashdodachea razvaddeanchea pattsancher, Ejiptachea razvaddeanchea pattsancher vhoddlean porgôtt kôr: 'Samariechea dongrancher ektthaim zaiat; tichê bhitôr koslo gondhôll zala, thoim koslo zulum cholta, tem polleiat!'
10. Promannikponnan cholop kitem tem tim nokllot, - uloita to Sorvespor!- zuluman ani piddnnuken aple razvadde bhôrtat.
11. Tea pasot, Sorvespor Dev oxem sangta: Dusman desak veddho ghalcho asa, tumchem boll to môddun uddoitolo, tumche razvadde to lutt'tolo.
12. Sorvespor oxem sangta: Israelacheô put-dhuvô Samarient aplea Damaskachea lamb mhov khatthincher sust lolltat. Zoso êk gonvlli xinvachea tonddantle fokot don donke vô kanacho êk kuddko soddoun kaddta, toxem fokot tea lamb mhov uxeanchea konnxeam ani katthinchea eka kuddkea borabôr tankam soddoun kaddtolom.
13. Aikun gheiat ani Jakobachea Ghoranneacher add govai diat uloita to Sorvespor Dev, Sorvsoktivont Sorvespor!
14. Israelak tachea khunank lagun Hanv khast laitam tedna, Bethelachea vedink-ui Hanv khast laitolom. Vedinchim xingam môddtole ani te zomnir poddtole.
15. Hinvalleachim ani gimachim ghoram Hanv môddun uddoitolom, hostidantan nettoil'lea ghoranchem nisontton zatolem, ani vhoddlim-vhoddlim ghoram nanch zatolim -uloita to Sorvespor!
