1. Sionant itle sust jietat tanchem kottakotta! Ani Samariechea dongrar apunn surokxit mhonn somzotat tanchem kottakotta! Raxttram modlea poilea raxttrache nanv'voste monis te. Israelachem Ghorannem tancho alaxiro gheunk veta.
2. Kalneak vochat ani polleiat, hanga thaun vortea Hamathak vochat, magir Filistevkaranchea Gathak vochat. Hea rajeam-vôn te odik podvedar? Tancho ganv tumchea ganva-vôn vhoddlo?
3. Durdoivacho dis tumi fuddem dhuklunk sôdtat, punn tumi zobordostechem raj lagim haddtat.
4. Hostidantachea khattincher add poddun ani lamb-mhov bhazancher hatpãi sôddun, hinddantle menddre ani datte-motte paddkule marun borim-borim jevnnam tim kortat.
5. Apunn David zal'lê porim, vinneanchea avazar ani novim vazontram ievzun kaddun, bobô marun gitam gaitat.
6. Patram oto-sôr bhorun soro pietat ani sugondhi-domdomit telamnim aplem ang rogôddtat. Punn Juzechea ghorttannachem tankam kãich poddlolem na.
7. Hea pasot, pordesant vetolea koidiam modem te poile nirvaxit zaun vetole. Oxi hatpãi sôddun bekar poddun ravtat tanchi mouz somptoli.
8. Sorvespor Dev Apnnachean soput gheta: uloita to Sorvespor, Sorvsoktivont Dev! Jakobachea gorvacho mhaka kanttallo ieta, tache razvadde Mhaka bilkul mandonant, xar ani tantum asa titlem-i Hanv dusmananchea tabeant ghalunk vetam.
9. Eka ghorant dha zonnam astit tôr, tim mortolim.
10. Ani konn-êk soiro moddim lasunk vhorunk tim ghorantlim bhair kaddunk iet, ani ghorachê bhitorlê kuddint ghoddiê asloleak oso vichar korit: Anink konn urla rê?, to oso zobab ditolo: 'Na!' Tedna to soiro mhonnttolo: 'Gopchup! Sorvesporachem nanv ami gheum noiê!'
11. Polleiat, Sorvespor hukum ghalta: To mar ghalunk suru kortanch,, vhoddlea ghoranchem ghorttann zata, dhakttea ghorancho zata churo.
12. Ghodde khoddpancher dhanvunk xoktat kai? Boilank gheun somdir kosunk zata? Tori tumi nit sôddun vikh pieunk dilam, ani promannikponnachem foll bhair uddoun koddu-koddu bhaji khaunk dilea.
13. Lo-Debar hachê vixim tumi murgotttat ani mhonnttat: 'Amcheach bollan ami Karnaim' ghetlam nhoi?'
14. Borem tôr, Israelachea Ghorannea, tujê virudh Hanv ek raxttr upzounk vetam - uloita to Sorvespor, Sorvsoktivont Dev!- ani Hamathachê khinddi thaun Arabachea udkam porian tem tumkam piddapidd ditolem.
