1. Israelachea Ghorannea, tujer add Hanv uchartam tem utor aikun ghe. Tem êk vilap.
2. Ankvar Israel sokla poddlam ani tem anink kednanch utthchem na. Aplêch zomnir tem sôddlolem asa, taka voir kaddunk konn na.
3. Tôr Sorvespor Dev oxem sangta: Israelachea Ghorannea khatir zhuzunk zhuza-moidanar êk hozar dhaddtale tea xarant atam fokot xembôr urtole, ani xembôr dhaddtale tea xarant atam fokot dha urtole.
4. Israelachea Ghoranneak Sorvespor oxem sangta: Mhaka sôdun kaddat ani tumi jivim urtoleat.
5. Bethelak sodum nakat, Gilgalant bhitôr sorum nakat, Beershebak vochum nakat. Gilgalak pordesant vhortole ani Bethelachem kãich urchem na.
6. Sorvesporak sôdun kaddat ani tumi jivim urtoleat; na zalear, Juzechea Ghoranneacher uzo koso To poddtolo ani tem lasun uddoitolo, ani to uzo palounk Bethelant konnuch ascho na.
7. Nit soddun onitichi koddu-koddu bhaji tim khaunk ditat, ani promannikponn zomnir xevttitat.
8. Pleiades ani Orion, Krit'tika ani Mrigaxirsh he noketranche chombe rochleat, to Toch; mornna sarko kallôk kaddun fantem nirmann korta, ani disacho uzvadd kaddun kallkê ratik apoita, to Toch; doriantlim udkam ektthaim korta ani lottamnim zomnir ôt'ta, to Toch. Tachem nanv Sorvespor!
9. Ghôtt-mozbut kottanchem nisontton korta ani kil'leancho nas korta, to Toch.
10. Xarachea darvonttea-xim nit rakhta tacho tim dvês dhôrtat, ani sotak sakxi ditoleak tim zolltat.
11. Gorib mon'xank tumi pãiam tolla mostitat ani tanchea gonvacher bollan dôndd ghetat dekhun, taslolea chireanchim ghoram tumi bandleant zalear-ui, tea ghoramnim tumi kednanch ravunk pavchim nant; ani anond divpi dakam-molle tumi laile zalear-ui, tea dakam-molleancho soro tumi kednanch pieunk pavchim nant.
12. Kiteak tumche khun hispa-bhaile ani tumchim patkam bhov vhodd mhonn Hanv zannom. Promannik mon'xank piddapidd divpi tumi, bollan lônch khavpi tumi, darvonttea-xim gorjevontank pois korpi tumi.
13. Heach pasot, edea vellar chotur mon'xam oginch ravtat, kiteak he dis vaitt.
14. Borem sôdat ani vaitt sôddun diat, ani oxem tumi jivim urtoleat, ani,tumi sangtat toxem, Sorvespor, Sorvsoktivont Dev, khoreponnim tumchê sovem astolo.
15. Vaittacho dvês dhôrat, boreacho môg korat, xarachea darvonttea-xim nit samballat. Oxem ghoddiê Juzechea urlolea zomeachi Sorvespor, Sorvsoktivont Dev, doia kortolo.
16. Hea pasot Sorvespor, Sorvsoktivont Sorvespor, oxem sangta: Sogllea bhovxik nakeancher vilap astolo. 'Ai Saiba! Ai Saiba!' mhonnun dôr-eka rostear lôk aroddtolo. Xetkamtiank vilap korunk apoitolim, toxench roddpinnink rudon korunk.
17. Dôr dakam-molleant roddnnem aikum ietolem, kiteak tumchê modlean Hanv ieun vetolom, mhonntta Sorvespor.
18. Sorvesporachea Disak axeun axetat tanchem kottakotta! Kiteak mhonn to zai tumkam, ho Sorvesporacho Dis?
19. To Dis mhollear kallôkh, uzvadd nhoi. Konn-êk monis xinvachea tonddantlo sutton asvelachea chopkeant poddta, vô aplea ghorant bhitôr sorun vonntik hat laita mhollear, êk sorôp taka chabta, oxem tem zatolem mhonnchem.
20. Sorvesporacho Dis uzvadd nhoi punn kallôkhuch zauncho na? To dis kallokitt zatolo, tea disa uzvaddachem ek kirnn porian aschem na.
21. Tumchea utsovancho Hanv dvês dhôrtam, tankam Hanv sarkoch kanttalltam. Tumchea dobajik sobhamnim Mhaka kosloch sontôs bhogona.
22. Hom' vô dhaneachim somorponnam tumi gheun iexat zalear, Hanv tim mandun gheuncho na, ani dattea-mottea vasranchea tumchea xantichea iodnancher Hanv nodor porian ghalcho na.
23. Tumchea gitanchi bob Mhojea kanar anink poddunk dium nakat! Tumchea vinneanchea tarancho avaz Mhaka aikunk dium nakat!
24. Punn udka bhaxen nit vhanvum-di, ani kodinch sukonaslolea vhalla porim promannikponn vhanvun ieum-di!
25. Israelachea Ghorannea, oronneantlea tea challis vorsamnim tumi Mhaka iodn ani somorponnnam haddun dil'lim?
26. Atam Sakuth tumchea razacho ani Kaivan tumchea noketr-devacho bhar tumchea khandar tumi vhorunk zai: hech te tumi apnnank kel'le kud'de dèv.
27. Dekhun Hanv tumkam Damaska pelean pordesant vhortolom: mhonntta Sorvespor. Sorvsoktivont Sorvespor, hem Tachem nanv!
