1. Sorvespora Devan mhaka dorxonant dakhoilem tem hem: ek tollanchem birem. Dusrê lunvnnê uprant, mhonngê razak diunchê pikavollichê lunvnnê uprant, mottea tollanchem birem Tannem mhaka dakhoilem.
2. Ganvant hirvem-pachvem aslem titlem-i tollamnim khaun uddoilem, tedna hanvem mhollem: 'Sorvespora Deva, bhogôs! Tujê lagim poratun magtam! Jakob itlo lhan-kirkôll: koso mhonn to anink vanchtolo?'
3. Tedna Sorvespor movall'lo. 'Hem oxem ghòddchem na!' - mhollem Sorvesporan.
4. Sorvespora Devan mhaka dorxonant dakhoilem tem hem: Sorvespora Devan khast lavunk eka zolltea ujeak ulo kelo. Hea ujean khôl patall khaun uddoilo ani ganv girasunk to suru kortalo.
5. Tedna hanvem mhollem: 'Sorvespora Deva, matso thamb mum! Tujê lagim hat zhoddun magtam! Jakob itlo lhan-kirkôll: koso mhonn to anink vanchtolo?'
6. Ani Sorvespor movall'lo. 'Hem-i oxem ghòddchem na!' - mhollem Sorvespora Devan.
7. Tannem mhaka dorxonant dakhoilem tem hem: Aplea hatant êk ollombo gheun Sorvespor êkê vonnti lagim ubo aslo.
8. Sorvesporan mhaka vicharlem: 'Amos, kitem dixtti poddta tuka?' Hanvem mhollem: 'Êk ollombo.' Tedna Sorvesporan mhaka mhollem: 'Polle, Israel Mhojê porjê modlean Hanv êk ollombo sôddtam; Hanv anink tiche opradh bhôgxicho na.
9. Izakache unchle zage padd zatole, ani Israelachea povitr sthananchem nisontton zatolem, ani hatant tolvar gheun Jeroboamachea Ghoranneacher Hanv akromonn kortolom.'
10. Tedna Amazian, Bethelachea iadnikan, Jeroboamak, Israelachea razak, oso êk nirôp dhaddlo: Israelachea Ghorannea modem Amos tujer kolpola. To sangta tem desachean anink sosunk zaina.
11. Kiteak Amos oxem sangunk bhonvta: "Jeroboam tolvarin mortolo ani Israel aplea desa thaun pois nirvaxi zaun vetolo."
12. Ani Amosak Amazian oxem mhollem: 'Arê bhaknnara, chol voch; Judachea prantant portun voch; thoim tuzo dispott'tto giras zôdd, ani thoim tujem bhakit kôr.
13. Bethelant anink bhakit korum naka, kiteak Bethel razacho povitr zago, raxttrik devmondir.'
14. Amosan Amaziak oso zobab dilo: 'Hanv provadi nhoi aslom, nhoi mhonn provadiancho put. Hanv êk sadho menddram-rakhnno aslom ani rumbodd-zhaddancho samball kortalom.
15. Punn Sorvesporan mhaka mhojê hindd choroitalom thoincho kaddlo ani mhaka mhollem: "Chol voch, Israel mhojê porjek bhakit kôr."
16. Tôr atam Sorvesporachem utor aik: "Tum mhonnttai: Israela virudh bhakit korum naka," Izakachea Ghoranneacher add koslench noxtt bhakum naka."
17. Borem tôr, atam Sorvespor sangta tem hem: "Tuji bail xarachea rosteancher êk xindôll bail koxi bhonvtoli, tujeô put-dhuvô tolvarin poddtoleô, tujea ganvche sutan mapun vantte kortole, ani tunch bhoxttol'lê zomnir mortoloi ani Israel aplea desa thaun pois nirvaxi zaun vetolo." '
