1. Amosachim utram him: To Tekoachea gonvlliam modlo eklo. Uzia, Judacho raza, ani Jeroboam, Joashacho put, Israelacho raza, hanchea kallar,don vorsam bhuikamp zaunchê poilim, Israela vixim tannem ghetlolim dorxonam him.
2. Tannem mhollem: Sorvespor Siona thaun aroddta ani Jerusalea thaun Aplo tallo aiko-so korta; gonvllianchim chorva-moidanam dukh kortat ani Karmelacho mukutt sukun veta.
3. Sorvespor oxem sangta: Damaskachea tin -na, char mhonnttam- khunam khatir Hanvem Mhozo tharav ghetla, to Hanv anink bodôlcho na. Lokhonddachim môllnnê-pettnnim gheun tãnnim Gileadak maddoilo dekhun,
4. Ben-Hadadache razvadde lasun uddounk Hazaelachea Ghoranneacher Hanv uzo dhaddtolom.
5. Damaskachea darvontteanche addambe Hanv môddun uddoitolom; Bikath-Avenant ravtoleancho ani Beth-Edenant razvôtt choloitoleacho Hanv nas kortolom. Ani Aramacho lôk Kirak nirvaxit zaun vetolo. Oxem mhonntta Sorvespor.
6. Sorvespor oxem sangta: Gazachea tin -na, char mhonnttam- khunam khatir Hanvem Mhozo tharav ghetla, to Hanv anink bodôlcho na. Edomachim gulamam koxim akhea raxttrank tãnnim nirvaxit korun vhelim.
7. Tanche razvadde lasun uddounk Hanv Gazachea durgancher uzo dhaddtolom.
8. Ashdodant ravtoleancho ani Askelonant razvôtt choloitoleacho Hanv nas kortolom. Filistevkaram modlo nimanno monis moro porian Hanv Ekrona virudh Mhozo hat ubartolom. Oxem mhonntta Sorvespor.
9. Sorvespor oxem sangta: Tirachea tin -na, char mhonnttam- khunam khatir Hanvem Mhozo tharav ghetla, to Hanv anink bodôlcho na. Ak'khea raxttrank tãnnim koidi kelim ani Edomak nirvaxit korun vhelim, ani aplea bhavbondham kodde kel'lea koraracho ugddas dhôrunk na dekhun,
10. tanche razvadde lasun uddounk Tiracher uzo dhaddtolom. Oxem mhonntta Sorvespor.
11. Edomachea tin -na, char mhonnttam- khunam khatir Hanvem Mhozo tharav ghetla, to Hanv anink bodôlcho na. Doia-kaklut sarkich kuxin dovrun, pottant rag thambonastana peroun, ani kinv choddunk diun, tannem aplea bhavak tolvarin dhumallo dilo;
12. dekhun Bozrache razvadde lasun uddounk Hanv Temanacher uzo dhaddtolom. Oxem mhonntta Sorvespor.
13. Ammonkaranchea tin -na, char mhonnttam- khunam khatir Hanvem Mhozo tharav ghetla, to Hanv anink bodôlcho na. Apleôch ximô vaddounk Gileadant gurvar bailancho kusvo tãnnim chirun ugddapo kelo dekhun,
14. tanche razvadde lasun uddounk Rab'basachea durgak Hanv uzo laitolom. Tedna, zhuzachea kallar aikum ietat tosleô bobô-hueli martolim, vô vadoll-modd upraslam mhonn distolem.
15. Ani tancho raza pordesant vetolo, to ani tache borabôr tache kunvor. Oxem mhonntta Sorvespor.
