1. Kitlo mhonn hanv dolldiro! Pikachem foll ektthailea uprant vô daku punzailea uprant, ek-ui dakancho ghons mellona toslo monis hanv! Axel'lem ek-ui piklolem poilem foll mhaka favna.
2. Soglle dhormvont monis sonvsarantle somple ani mon'xam modem ek-ui promannik monis na. Soglle rogot varounk zagrut asat; ek-eklo aplea bhavak fas manddta.
3. Vaitt korunk tanchem don-ui hat borech fixall. Rajkarbhari tosoch mon'subdar lonch magtat, apnnak zai toxem podvedar to korta; hê porim te soglle onit ibaddtat.
4. Tantlo ut'tom monis ek kantteanchem jhilkutt koso promannik to ek nival-kantteanchi voim. Pahro kortoleancho khasticho dis lagim pavta, atam lojek te sampoddtole.
5. Tujea sangateacher patieum naka, tujea ixttacher visvas dovrum naka; tujê unttient axil'lea mogia velem tujea tonddachem dar rakh.
6. Kiteak put bapaik man dina; dhuv avoicher portota; sun sasu add veta; mon'xacho dusman tachoch ghorcho lôk.
7. Hanv mhoje dolle Sorvesporacher lavun dovortam; Dev mhoji soddvonn kortolo, Tacheruch mhozo visvas; mhozo Dev mhojem aikotolo.
8. Mhojea dusmana, mhojer nirbhag ailam mhonn sontosbhorit zaum naka: kiteak hanv poddlom zalearui, hanv novean utthtolom. Kallokhant hanv jietam zalear-ui, Sorvespor mhozo uzvadd!
9. Sorvesporacho rag hanvem sosunk zai, kiteak Tacher hanvem patok kelam. Magir To mhoji neainit kortolo, ani hanvem vankddem kelam tem nitt korun ditolo. To mhaka bhair kaddun uzvaddak pavoitolo, ani Tacheô promannik kornniô polleun mhaka sontôs bhogtolo.
10. Mhoje dusman polletole tedna, ti lojen bhortoli; 'Sorvespor tuzo Dev. Khoim asa to?!' hem mhonnun mhaka hinnsaitali tichem atam hanv nisontton polletolom; atam tika paiam tolla rosteavelea chikla porim mostitolim.
11. Tujim durgam novean bandcho dis to ho! Tujeô ximô vaddouncho dis to!
12. Tea disa sogllim tujê sorxim ietolim Assiriê thaun Ejiptak, Ejipta thaun Eufrates nodi porian, eka doria thaun tem dusrea doria porian, eka dongra thaun tem dusrea dongra porian.
13. Punn thoim vosti kortoleam pasot ani tanchea vaitt kortubam khatir dês padd zatolo.
14. Tujê porjek boddi gheun chorvak vhor, hi porza Tujea daizacho hindd; ti eksuri ravta eka ranant ani sobhonvtim asat moidanam: Purvinchea kallar ti chorvak vetali toxench tika atam Bashan ani Gilead ganvamnim chorvak vochum-di.
15. Ejiptantlo Tum bhair sorloi tedna Tunvem kel'leim toxem, amkam vismitam polle-xim kôr.
16. Raxttram polletolim ani apnnacheach sogllea bollachi tankam loz distoli; aplea tonddar tim aple hat dovortolim, tanche kan bheretole.
17. Sorpa porim tim dhull khatolim, zomnir sorpott bhonvtolea pranneam porim, tim aplê dhôlintlim Sorvespora amchea Devachem bhem dhôrun bhair sortolim; tujê mukhar kampun ravtolim.
18. Tujê-oslo Dev anink khoim asot? Tum guneanv kaddun uddoitai, khotteponn rokddench bhogxitai. Tum pottant rag dhôrinai, punn kaklut dakhoun sontostai.
19. Anink ekdam amchi kaklut kôr, amchê guneanv mostun uddoi, sogllim amchim patkam doriachê khorik uddoi.
20. Magam amchea purvozank soput dil'loi, tachê pormannem Jakobak visvaxi rav, Abrahamank kaklut dakhoi.
