1. Ieunche asat tea disamnim Sorvesporachem Mondir dongrachê tokxer dovortole, ani porvotam-von voir ubartole. Porza tachê-xim lotton ietoleô,
2. mezunk xokona titlim raxttram tachê-xim ietolim; ani tim mhonnttolim: 'Ieiat, Sorvesporachea dongrar choddum-ia, Jakobachea Devachea Mondirant vochum-ia; To amkam Apleô vattô xikoitolo, ani ami Tachea margamnim choltoleanv. Siona thaun Somurt bhair sortoli ani Jerusaleak thaun Sorvesporachem bhakit.'
3. To khub porzancher odhikar choloitolo ani bollixtt raxttrancho Mon'subidar zatolo; torsadim ôddun tim nangor kortolim ani bhale môddun koiteô kortolim. Raxttr raxttracher tolvar ubarchem na, zhuzak konn anink toiari korchona.
4. Zonn-eklo ap-aplê dak-velichê savllek ani ap-aplea anjirachea zhadda ponda bostolo, konn konnak tras diuncho na. Oso uloita to Dolbharancho Sorvespor.
5. Kiteak soglleô porza zonnekli ap-aplea devachea nanvan fuddem cholun vetoli, punn ami Sorvespora amchea Devachea nanvan fuddem cholun vetoleanv sasnnachea sasnnak.
6. Tea disa -uloita to Sorvespor- thontteank-panglleank hanv zoma kortolom ani poro ghal'leank zomoitolom toxench hanvem khub dukhoil'leank hanv ektthaitolom.
7. Thontteam-panglleancho hanv Urlolo Zomo kortolom ani zollim-mollim ximpddailoleanchem êk bollixtt raxttr kortolom. Ani Sorvespor tancher raj choloitolo, Sion dongrar, to kall tem sasnnachea sasnnak.
8. Ani tuka, Hinddachea Minara, Sion dhuvechea dongra, purvili razvôttki portun ietoli, Jerusaleachê dhuvecho raiall odhikar.
9. Atam kiteak mhonn tum hueli martai ani vilap kortai? Tuzo raza na tôr? Somplo zait tuzo budh dinnar? Kiteak êk porsut zatolê bailê sarkhi tum khontibhorit zaleai?
10. Sionachê dhuvê, ekê porsut zaunk vetolê bailê porim khontin pirngov ani hueli mar. Kiteak atam tum xar sanddun vetolii ani eka uktea mollar biradd kortolii; tum Babiloniek vetolii ani thoim tuka suttka melltoli; thoim Sorvespor tuka dusmananchea chopkeantlo nivartolo.
11. Atam puskôll raxttram tujer add kolpoleant. Tim mhonnttat: 'Taka ami boxttavum-ia, tachea odruxttak polleun ami vikrutt khôs bhôgum-ia.'
12. Punn tim Sorvesporachim chintnam vollkhonant, nhoi mhonn Tachi ievzonn somzonant: tannem tankam mollnnek konnsam koxim punzaileant.
13. Chol Sionachê dhuvê, utth ani mollunk suru kôr. Lokhonddachem xing ani pitullchim paim-getam tuka ditam, zaitea deslokank tum pilltolim. Luttlea ti soglli aspôt Sorvesporak bhettoi, soglli grestkai ak'khê prithumechea Dhoniak orpun di. 14. Atam tujim durgam topas, ê kil'lea amkam tãnnim veddho ghatla; eka danddean Israelachea razachea polear martole.
