1. Punn tum, Bethlehema Efrata, Judachea kullam modem tum bhov lhan, tori Israela voir razvôtt cholouncho asa to Mhaka tujê thaun zolmotolo. Tacho oromb nhoi atancho, punn bhov purvilea kallancho.
2. Tea pasot, ji zolma haddchi asa ti zolma haddi porian, Sorvespor tankam sanddun ditolo. Uprant tanchea bhavam-bhoinnincho êk urlolo zomo Israelachea putam dhuvanchea ekvottant portotolo.
3. Tedna Sorvesporachê podven ani aplea Devachea Nanvacho protap fankoun to thir ravtolo ani aplea hinddak choroitolo. Ani tim bhiranti vinnem ravtolim, kiteak tedna thaun tachi podvi pritumechea ximancher porian pavtoli ani toch xanticho kunvôr zatolo.
4. Assirien amchea desar akromonn kelear, amchea ganvant bhitôr sorlear, ami ticher add zhuzunk sat rakhnneank, atth foujechea fuddariank ube kortoleanv.
5. Ekê tolvarin te Assiriecher raj choloitole, ani Nimrodacher ekê uktê torsadin Assiriekaramnim amchea desacher akromonn kelear ani amchea ximam bhitôr paim ghalear, To amkam tanchea hatantlim nivartolo.
6. Tedna Jakobachea Urlolea Zomea bonvtonnim Sorvespora thaun denvtolea dova porim, tonnacher poddtolea pavsa sarkhim zaitim raxttram ietolim. Te khoinchea-i mon'xacho adar ravonant, nhoi mhonn konnacheruch patienant.
7. Tedna Jakobachea Urlolea Zomea bhonvtonnim zaitim raxttram ietolim, ranantlea zonvaram modem axil'lea eka xinva porim, menddranchea hinddam modem axil'lea eka xinvachea pettea porim. To hindda modlean vetana xelliank mostita, xellianche kuddkean kuddke korta, ani tachea tabeantli konnuch tankam kaddun ghena.
8. Tuzo hat sogllea tujea dusmanancher uprastolo tujea sogllea dusmanancher tum zoit vhortoloi ani sorv tujea xotrunchem tum nisontton kortoloi
9. Tea disa -uloita to Sorvespor- tumchê modlea sogllea tumchea ghoddeanchem Hanv nisontton kortolom ani tumchea ron'gaddeancho bhosm kortolom.
10. Tumchea desachea xarancho bhosm kortolom ani soglle tumche kil'le môddtolom.
11. Tuje hatantle jadu hanv kaddun bhair martolom. Ani tujê kodde anik noxib parkhi aschena.
12. Tujea murteancho ani tujê modlea povitr khambeancho hanv bhosm kortolom. Ani tujea hatamnim kel'lea vostunk tum anink kodinch bhozchonaim.
13. Tujeô povitr maddiô hanv umttaitolom ani tujea xaranchem hanv nisontton kortolom!
14. Mhaka aikunk na tea raxttrancho sontapan ani krodhan hanv sudd ghetolom.
