1. Sorvespor kitem sangta tem atam aik: 'Utth, tuzo khottlo porvotanchea kanar poddta toso mandd, ani dongor tuzo tallo aikum. '
2. Porvortamnô, Sorvesporachi firiad aikat. Prithumechea buniadimnô, kan diat: Kiteak Sorvespor Aplê porjecher garannem ghalta ani Israelacher add vad-vivad korta.
3. Mhojê porjê, Hanvem tuka kitem kelam? Hanvem tuka kosli dukh dilea? Mhaka zobab di.
4. Ejipatachea desantli Hanvem tuka bhair kaddli; gulamponnachea ghorantli Hanvem tuka soddoili. Tumchê mukhar Moizesak, Aaronak ani Miriamak dhaddlim.'
5. Porjê mhojê, Balak, Moabachea razan kitem ievjilolem tem ani Balaam, Beorachea putan taka koso zobab dilo tacho ugddas kôr. Shittim thaun tem Gilgal porian kitem ghoddlem tachi iad kôr ani Sorvesporachim promannik kortubam tuka kollon ietolim.
6. Kitem mhonn gheun hanv Sorvespora mukhar vetolom? Ani sorginchea Deva mukhar koso sorpott'tolom? Tachê mukhar hom' gheun vetolom? Vô eka vorsachea paddkuleak?
7. Hozaranche hozar menddre bhettoile mhonn, ani telache vhall kele mhonn, To proson'n zait? Mhojea chukink lagun mhojeam malgoddeank vopun dium? Mhojea patkam khatir mhojê kuddichem foll bhettoum?
8. Mon'xa, kitem borem tem tuka dakhoilam: promannikponnan bhonv, doia-moia dakhoi, ani Devakodde khaltikaien chol, itlench puro. Hench Sorvespor tujê lagim magta.'
9. Xara add Sorvesporacho tallo aroddta, 'Aik zomlolea nagrikanchea kulla!
10. Fottkirem map mhojean pollenastana ravum iet to kanttallo ani chortolem map?
11. Fottkireô tagddeô ani fosovtolea mapancho mhal mhojean sonsum ieta zait?
12. Tea xarache grest monis broxttacharan bhorleat ani tanchea tonddant fottkireô jibô asat.
13. Hea pasot hanv tuka khast laitolom ani tujea patkam pasot hanv tujem nisontton kortolom.
14. Tum khatoleim punn dhadoxi zaunchem naim; tuka khub bhuk lagtoli. Tum zomoitoleim punn kainch samballunk pavchem naim ani kitem samballtai tacho hanv tolvarin bhosm kortolom.
15. Tum vomptoleim punn lunvchem naim, ajetinam pilltoleim punn tanchem tel tuka lavunchem naim, dakô pilltoleim punn novo soro pieunchem naim.
16. Tunvem Omriche kaide pall'lei; Ahabachea ghorannean kelem tem tunvem keleim; Ani tanchê budd'dhi pormannem tum chol'leim. Hea khatir, hanv tuzo bhosm kortolom ani Tujea nagrikancheô hanv moskoreô kortolom; Hea fuddem tum dusrea porzanchea kenn'nneacho mhal zatoleim.'
