1. Hanvem mhollem: 'Aikat, Jakobachea Ghoranneachea fuddareamnô, ani tumi, Israelachea Ghorachea Kunvramnô. Borem ani vaitt kitem tem vollkhunk tumkam lagu zaina,
2. ani toruiastana tumi boreacho dvês kortat, ani vaittacho môg kortat, mhojê porjechi kat kaddun, ani tanchea haddam velem mas ôddun kaddun,
3. mhojê porjechem mas khaun, tanchi kat ôddun, tanchim haddam môddun, tanche kuddkean kuddke korun, eka toplean khimo ghaltat tê porim.'
4. Tedna tim Sorvesporak ulo martolim, punn to tankam kan diuncho na. To vêll ietôch, to aplem mukh tanchê velem lipoitolo karann tãnnim itle khun keleat.
5. Mhojê porjek vaitt margar vhortolea provadiam add Sorvespor oxem mhonntta: Tankam kitem-i jeunk-khaunk mello-sor te arddun mhonnttat: 'Xanti.' Punn tanchea tonddant konn kainch ghalina tedna, te ticher zhuz manddtat.
6. Tea pasot, tumkam dorxonna viret rat astoli ani bhakita viret tumkam kallok astolo. Provadiancher suria poddtolo, ani dis asa to tancher kallokh poddtolo.
7. Tedna provadi lojen bhortole, bhakit kortole guspagondollak sampoddtole; te soglle aplea tonddar aplê hat dovortole kiteak Deva koddsun ekui zobab tankam ieuncho na.
8. Punn mhojea ordan hanv toso nhoi, Hanv sogllê xokten, Sorvesporachea bollan, promannikponnan ani odhikaran bhorlolom Jakobache khun ani Israelachim patkam lavun diunk mhaka odhikar asa.
9. Hem matxem aikat, Jakob Ghoranneachea fuddariamnô ani Israel Ghoranneachea mon'subidaramnô, tumi niticho dvês kortoleamnô, ani neai-nit padd kortoleamnô,
10. Sionachem xar rogtan bandtoleamnô, ani Jerusalem (xar)vikottaien bandtoleamnô.
11. Tache mon'subdar lonch gheun mon'subi kortat, tache iadnik duddvanchê axen xikovnn ditat, tache provadi poixeam khatir bhakit kortat ani itlem-i korun, te Sorvesporacher patieun ravtat. Te oxem mhonnttat: 'Sorvespor amchê modem na kai? Koslench odruxtt amcher ieunchem na!'
12. Hea pasot, tumchê khatir, Sion zatolem eka khonnlolea xeta sarkhem, Jerusalem êk fatranchi ras ani Mondiracho Porvôt ek ran.
