1. Jotham, Ahaz ani Hezekiah-hea Judachea razanchê razvôttkent Moreshetachea Mikak ailolem Sorvesporachem utor hem. Samariê ani Jerusalea vixim him tachim dorxonnam.
2. Aikat tumi, sogllea porzamnô, Kan diat, ê prithumê ani tantunt ravtolea sorvamnô! Sorvespor Dhoni aplea devmondirant-sun, tumchea add êk sakxi diunk sôdta.
3. Ho polleiat, Sorvespor aplea nivasthanantlo bhair sorta, to sokla ieta, ani prithumechea unch zageancher to cholta-bhonvta.
4. Ujea lagim aslolea menna porim, ani denvter vhanvtolea udka sarkhe, Tachê pattlean porvot kolltat, ani khonddi ukteô zatat.
5. Jakobachê opradha khatir Israel ghoranneachea patka khatir hem sogllem ghoddta. Jakobacho opradh, kitem zait to? Samaria nhoi kai? Juda ghoranneachem patok, konn zait tem? Jerusalem nhoi kai?
6. Samaria, êk dakam-mollo, hanv tichem nisontton kortolom. Tiche bandavolliche fator hanv khonddint xevttitolom, ani tichi buniad hanv ustitolom.
7. Sogllea tichea murteancho nas zatolo, soglli tichi zôdd ujean lason vetoli. Sogllea tichea kud'dea devanchem hanv nisontton kortolom - Naikininchea zoddimnim tankam zoma kelole atam naikininchea zoddim itlench tanchem mol zatolem.
8. Hea khatir hanv bob martolom ani vilaptolom, uktea paiamnim ani vingllo hanv vetolom, koleam porim hanv hueli martolom, gugumam porim hanv kil'lonch martolom;
9. Sorvesporan ghala tea gaiak ilaz na: Juda sorxim to pavla, Jerusalea, mhojê porjechea darvonttea-xim porian to pavla.
10. Gathant porgôttum nakat, matui dukam golloi nakat. Beth-Leaprant dhullint lonvddat!
11. Korno vazoiat, ê Xapirant vosti kortolea; Zananant vosti kortolean aplem xar sôddun sôddunk na. Beth-Ezel aplê buniadi soit, aplea ghôtt kottam soit kosol'lam.
12. Marothant ravtolean koxem mhonn sukhak anvddeum ieta zait? Portench zalear Sorvesporan Jerusaleachea darvontteacher odruxtt pattoun dilem.
13. Lakishant vosti kortolea, ghoddo gaddiek band! Thoinsor Sionachê dhuvechem pap suru zalam; thoim Israelache khun melltat!
14. Moreshet-Gathak tunvem dôt diunk zai. Israelachea razank Akzibachea ghoran fosoile.
15. Mareshant vosti kortolea, dusman fouz onekdam tujer akromonn kortoli ani Adullamant Israelachem tez nopoit zatolem.
16. Khodd'di za, tuje kens sarke katrun uddoi tujea sontosachea bhurgeam khatir. Ekê gonni porim khodd'dim zaiat, kiteak tuka sanddun tujim bhurgim pordesant gelim.
