1. Jim konn khotteponnam chint'tat, ani aplê bajer poddun vaitt ievjitat, tanchem kotta! Fantem futtona fuddench tim tem korunk lagtat, kiteak oxem korunk tanchea hatant asa.
2. Xetam-bhattanchi axa dhôrtat ani tim chortat, toxench ghoram bollan vhortat, Ghorak ani dhoniak borabor apnnachê adhin kortat, mon'xak aplea tabeant kortat ani tachem aslem-naslem kaddun vhortat.
3. Mhonnttôch Sorvespor oxem sangta: Atam oslê zaticher Hanv ievjitam tea vaittantli tumchi man tumchean suttounk zaunchi na, tokli voir kaddun tumchean cholunk zaunchem na: itlo vaitt ho kall zatolo!
4. Tea disa, tumkam kenddunk git rochtolim, vilapachem git gavun mhonnt'tolim: 'Amchem sogllem kaddun ghetlem; Mhojê porjecho vantto mapun dusreank dilo, ani tankam to portun diunk konn na. Amchim xetam-bhattam lutt martoleank dileant.'
5. Dekhun Sorvesporachê Sobhent êk vantto tumkam mapun diunk konn-eklo ascho na.
6. Porgôttum nakat- te porgott'tat, 'heô vostu porgôttum nakat! Odruxtt amcher ieunchem na!
7. Jakobachea ghoranneacher xirap poddum ieta? Sorvesporachi sõsnnikai moriadit zalea zait? Vô oslim tachim kortubam zait? Tachim bhakitam tachê Israel porjechea adavak poddtat'
8. Punn tumi mhojê porjeche dusman koxe vagtat. Eka niropradhi mon'xachem angavlem tumi bollan vhortat, surokxit-xant asa tancher tumi zhuzachem nuksann haddtat.
9. Mhojê porjechea ostoreank tanchea opurbaiechea ghorantlim tumi bhair ghaltat ani tanchea bhurgeam velo obhiman sasnnak kaddun uddoitat,
10. mhonnun 'Utthat ani koddsoron vochat.' Tumchean hanga ravunk zaina. Ekê mol naslolê vostu khatir tum uncha molachi ghann dovortai.
11. Êk fottkiro provadi tôr ailolo ani mhonnlolem: 'Hanv sorea khatir, khôr sorea khatir tumkam bhakit kortam'- ho provadi hê porjek favo toslo.
12. Jakobachea sogllea ghoranneak hanv zoma kortolom, Israelachea urlolea vantteak hanv ektthaitolom, Ekê chorvachê svater menddram porim hanv tankam ektthaim kortolom. Ani aplea ghotteant aslolea eka hindda porim, tim konnak bhienastana roddtolim,
13. Tancho gonvlli poilo bhair sortolo, uprant sogllim darantlean bhair vetolim, tanchê mukhar tancho raza ani soglleam poros fuddem vetolo Sorvespor.
