1. Bhurgeamnô, tumi-i Somiachea ekvottant asat, tôr tumchea avoi-bapaichem aikat: oxem korop sarkem.
2. Bhasavnni lail'li poili adnia hi: Tujea avoi-bapaik man di.
3. Ani hi asa bhasavnni: oxem tuka borem zatolem ani lamb auk desant tuka melltolem.
4. Avoi-bapaiamnô, tumchea bhurgeank tumchê vagnnuken rag ie-so korum nakat. Xistin ani borê dekhin Somiachi vatt xikoun tankam lhan-vhodd korat.
5. Gulamamnô, Kristak tumi khaltim asat mhonn dakhoun, hea sonvsarantlea dhoniank vhodda manan ani sadhea kallzan khaltim ravat.
6. Tanche dolle tumcher asat tednanch tankam khuxal korunk mhonn nhoi, punn, tumi Kristachim chakram mhonnun, Devachi khuxi kallzant thaun tumi kortat dekhun.
7. Mon'xam khatir nhoi punn Somia khatir tumchem gulamanchem kam' borê khuxen korat.
8. Zonn-ekleak, gulamak toxem svotontr mon'xak, ap-aplea borea vavra pormannem Somi mozuri ditolo mhonn ugddas dhôrat.
9. Ani tumi, dhoniamnô, hêch bhaxen tumchea gulamam sorim cholat ani tankam bhenkddaunchem sôddat; tancho ani tumcho Dhoni sorgar asa ani To konnacheach tonddak pollena mhonn ugddas dhôrat.
10. Xekim, Somia sovem, Tachê podvechea bollan, tumi ghott ravat.
11. Devcharachea sogllea manddnniancher zoit vhorunk Devan dil'lem zhuzachem angtrann ghalun ravat.
12. Kiteak mhollear, rogta-masachea dusmanam lagim amkam zhuz na; punn pordhanam lagim, odhikariam kodde, hea kallokachea sonvsaracho razkarbhar choloitolea lagim, ontrallar vosti kortolea khottea atmeam koddeamchem zhuz.
13. Dekhun Devan dil'lem angtrann ghalchi tumkam goroz asa; na tôr, vaitt disa hea dusmanam virudh zhuzunk tumchean zaunchem na, ani soglle upai gheun-ui tumchean thir ubim ravunk ghòddchench na.
14. Mhonnttôch sogllim hatiaram gheun toiar ravat: tumi vollkhunk pavleant tem Devachem sot zaum-di tumchea penkttacho pott'tto; Devak manta toslem jivit zaum-di tumchê chhatichem kott'ttem;
15. Xantichem Xubhvortoman porgôttchi hurba zaum-di tumchea pãianche butt.
16. Devcharache soglle zollte bann tumchean palounk zaunchê khatir, tumchea hatant sodam bhavarthacho ddhal dhôrat;
17. xevttim soddvonnechem xirostrann ghalat ani Povitr Atmean dil'li torsad, mhonngê Devachem Utor, dhôrun ravat.
18. Atmeachea preronna pormannem sogllea somoiar magnnem ani vinovnni korat, sogllea bhoktam khatir zagrut ravun prarthon korunk pattim sorum nakat.
19. Mhojê-i pasot magat: mhojem tondd ugddun favo toslea utramnim ani kalljidarponnan Xubhvortomanacho gutt hanvem porgôtt korcho mhonn magat.
20. Hea Xubhvortomanacho hanv dut, punn hea vellar hanv bondkhonnint asam. Tem Xubhvortoman favô tê porim kalljidarponnan hanvem porgôtt korunk magat.
21. Mhaka hanga kitem ghòddta tem ani hanv kitem kortam tem tumi zanno zal'lim mhaka zai: Tikikus, mhozo opurbaiecho bhav ani Somiachea kamant visvaxi sevôk, mhojê vixim soglli gozal tumkam sangtolo.
22. Heach pasot hanv taka tumchê-xim dhaddtam, amchi khobor tumkam diunk ani tumchim kallzam ghott korunk.
23. Dev amcho Bap ani Jezu Krist amcho Somi sogllea bhavam-bhoinnink xanti, pritimôg ani bhavarth dium.
24. Jezu Kristacho, amchea Somiacho, môg kortat tankam soglleank Devachi doiallai bhôgunk mellum, atam ani kednanch sompona tea jivitant.
