1. Hea pasot hanv Paulu, videxiam khatir Jezu Kristacho koidi, tumkam sangtam:
2. Devan tumchê khatir mhaka ek dennem kelam mhonn tumi ghoddiê aikolam zatolem.
3. Aplo gutt ukto korun Devan mhaka tachi vollokh dilea: hea guttachi khobor niktich hanvem tumkam voir thoddeach utramnim boroun sanglea.
4. Tumi tim vachxat tôr, Kristachea guttachi kitli mhaka somzonni asa ti tumkam kollon ietoli.
5. Hea guttachi khobor adlea pinddkanchea khõicheach mon'xak mell'lli na; punn atam, Atmea udexim, Devan to gutt Apleam bhoktivont dhormdutank ani provadiank ukto kela:
6. mhonngê Xubhvortomana udexim, Jezu Kristachea ekvottant, videxiank tench daiz favo zalam, têch Kuddiche sandhe zaunk tim pavleant, ani têch bhasavnnent tankam-i vantto mell'la.
7. Mhaka favô kel'lea Devachê doiallaiechea dennean hea Xubhvortomanacho hanv sevôk zalam: khud Devan Aplê podven hem kelam.
8. Bhoktam modem soglleam-vôn lhan to hanv, tôri astana tthav nasloli Kristachi dovlôt videxiank porgôtt korchem dennem Devan mhaka favo kelam,
9. ani Aplea guttachi manddavôll kosli ti sobhê-mazar uzvaddaunchem kam Tannem mhaka dilam. Sogtta-sorvanchea Rochnnara Devan ho gutt iuganchea orombak thaun Apnnachêch bhitôr lipoun dovorlolo;
10. hê porim Devachi vividh zannvai fokot atam, Povitr-Sobhê vôrvim, ontrallavelea pordhanank ani odhikariank kollit zaunchi asli.
11. Hich ti amchea Somia Jezu Krista sovem Devan sasnnak thaun ievjil'li manddavôll.
12. Tachê sovem, Tacher bhavarth dovrun, Deva mukhar visvasan vochunk amkam dhir mellta.
13. Mhonnttôch, tumchê khatir hanv koxtt-dogd bhôgtam mhonn polleun, tumi niraxi zaum nakat mhonn hanv tumchê kodde magtam: he mhoje koxtt-dogd tumchi vhoddvik.
14. Amcho sorgincho Bap sorgar ani prithver aslolea sogllê tôrechea ghoranneacho Oromb; tôr Tachê mukhar saxttangim poddun oxem magtam:
16. Tumchê bhitôrlê-bhitôr tumi novim mon'xam zaun aileant: hea novea mon'xacho akar, Bapachea Povitr Atmea vorvim, ghottaien vaddot vochum; ani bhavartha vorvim Krist tumchea kallzamnim tthikann korum. Toch Bap, Apunn bhov mhoimevont dekhun, hem dennem tumkam favo korum. Hê porim, tumchi buniad ani pallam mogant rigun,
18. Devachea somest bhoktam borabor Jezucho môg kitlo rund, kitlo lamb, kitlo unch ani kitlo khôlto somzunk tumi xoktoleat.
19. Khorem mhollear, Kristacho môg kodinch poripurnntaien vollkhum nozo, tôri to tumi onnbhovunk pavtoleat, ani oso, ho mog purnntaien onnbhovun, tumi Devachich poripurnntai bhôgunk pavtoleat.
20. Aplê podven amchê bhitôr. Zo Aplem kam' korit asa, amchean magunk-prarthunk zata, vô ami kolpunk xoktanv, tachê poros ogllem korunk Zaka podvi xokti asa,
21. Taka, amchea Bapak, mhoima, ak'khê Povitr-Sobhê modem, Jezu Krista sovem, pinddkê-pinddkent, sasnna-sasnnak! Amen!
