1. Tumchea opradham ani patkam pasot tumi mel'leant,
2. tednam tumi hea sonvsarachê vaitt chali pormannem choltaleat; varear podvi choloita tacho odhikar tumi mantaleat; mhonngê devcharak tumi khaltim asleat, kiteak Devacher kolpotat tim sogllim tachê adhin asat.
3. Khorench mhollear, adim ami-i sogllim tanchê sarkim asleanv, amchea patki soimbachea vondovnniam pormannem ami choltaleanv, kuddicheôch khuxiô palltaleanv, ani amcheach vadeachim zal'leanv. Oxem amchea patki soimbachê goti pormannem ami sogllea heram mon'xam bhaxen Devachea krodhak sampoddloleanv.
4. Punn kitli vhôdd Devachi konnvallai! Kitlo mhonn Devan amcho môg kelo!
5. Amchea patkank lagun ami mel'lim asleanv, ani tednanch Kristachea ekvottant, Tachea vangdda, Devan amkam novo jiv dilo! Tachea funkeachea dennean tumkam soddvonn mell'llea!
6. Jezu Krista sovem, Tachea vangdda, Devan amkam punorjivont keleant ani Tachea vangdda amkam sorgar bosoileant.
7. Jezu Krista sovem amchê thaim Devan Aplem bholeponn dakhoilem, fuddlea iugank Tannem Apli oprimit doiallai porgôtt keli.
8. Karonn Devachêch doiallaien, bhavartha udexim, tumkam soddvonn mell'llea;
9. ti tuminch kel'lea proitnancho fôll nhoi, punn Devachem funkeachem dennem. Hê babtint konnench mijas korum noiê, kiteak amchi soddvonn amcheach kornniam udexim upzona.
10. Ami Devachi rochnna: Apnnem adim fuddench toiar kel'leô boreô kornniô korun ami jieunchê khatir Devan amkam rochleant!
11. Hea pasot, tumi ekdam zolman videxi mhonn ugddas dhôrat; Judêv lôk, mon'xachea hatan kuddir kel'lê kornnek lagun apnnankuch "sunôt kel'le" mhonnttat te, tumkam "sunôt korunk naslole" mhonn lêkhtat.
12. Adim tumkam Kristachi vollokh naslich; Israel porjechem vorteponn tumkam lago-naslem; Devan Aplê porjek bhasavnniô korun tichê kodde korar kel'le tantum tumkam vantto naslo; bhorvanso ani Dev-ui nastana hea sonvsarant tumi jietaleat: hea soglleacho ugddas dhôrat.
13. Adim tumi pois asleat; punn atam, Jezu Kristachea ekvottant, Kristachea rogta vorvim, Devan tumkam lagim haddleant.
14. Khorench To amchi xanti: kiteak Judevanchi ani videxianchi êkuch porza Tannem kelea, Aplêch khursar marlolê kuddint tankam doxim kortoli vonnôt Tannem môddli, mhonngê tanchê modem asloli dusmankai Tannem nattak keli.
15. Tannem Somurt, tichea kaideam-nemam soit kaddun uddoili. Hê porim Tannem Apnna sovem dogãicho êkuch Novo Monis rochun haddlo, ani xanti sthapli.
16. Ani khursa udexim tankam dogãikui êkêch kuddint ektthaun, Tannem tankam Deva-xim sondhan korun portun haddleant. Sogllê dusmankaiecho Tannem Apnna sovem nas kelo.
17. Oso To ailo ani xantichi bori khobor Tannem porgôtt keli: xanti tumkam, pois asloleank, ani xanti lagim asloleank.
18. Tachê udexim atam tumi ani ami ekach Atmeachea bollan Bapa mukhar soroll pavtanv.
19. Mhonnttôch tumi atam porkim vô bhailim mon'xam nhoi: bhoktanchea vangdda tumi-i soho-nagrikam ani Devachea kuttumbantlim.
20. Tumi Dhormdutanchê ani provadianchê buniadir bandlolem Ghor ani toch Jezu Krist tea Ghoracho Konnxea-sondhicho Fatôr.
21. Toch hi soglli bandavôll ekvôttim samballta ani ti Sorvesporak bhettoil'lem Mondir koxem vaddoita.
22. Tumi-i, Tachê sovem, heram borabôr Atmea udexim Devachem Ghor koxem bandon ietat.
