1. Tea pasot, hanv, Somiachea ekvottant atam bondkhonnint poddlolo, tumchê lagim porathun magtam: tumchea apovnneak sobta toslem tumchem jivit zaum-di:
2. sodanch khaltim zaiat, dulob ani sõsnnikaiechim; ekamekak mogan sõsat;
3. Devachea Atmean tumchê modem ekvôtt rochun haddla, tôr atam tumkam ektthaim dovorta ti xanti samballunk zata titlem korat.
4. Tumi sogllim êkuch kudd ghôddtat, soglleank êkuch Povitr Atmo dil'lo asa, toxench tumchea apovnneak êkuch bhorvanso asa;
5. amcho Somi ekloch, êkuch amcho bhavarth, ek amchem Povitr-Snan;
6. Dev-ui ekloch, sogtta-sorvancher odhikar choloita To, sogtta-soglleam udexim Aplem kam korit asa To, ani sogtta-sorvam sovem tthikann korun asa To, amam somestancho Bap.
7. Kristan vanttun dilam tea mapan amchê modlea zonn-ekleak êk kherit vorgunn dil'lo asa.
8. Dekhun Povitr Pustok mhonntta: "Unch choddun vechê vel'lim, Apnna borabôr Tannem zaiteank koidi korun vhelim, mon'xank dennim vanttun dilim."
9. Tôr "To unch choddlo", hachi somzonni kitem? Tacho ôrth oso: To poilo sokla, mhonngê amchê prithver, denvun ailo.
10. Zo sokla denvun ailo ani magir voir choddun gelo to Toch: sogllê srixttint Tacho odhikar dixtti poddchê khatir Devan Taka sogllea rochnnam voir ubarlo.
11. Tannench mon'xank he vorgunn dileat: thoddeank Dhormdut keleat, konna-konnank Devacho sondêx gheun to kollit korunk provadi keleat, kãi zannank Xubhvortoman porgôtt korunk dhaddleant, thoddeank sobheche gonvlli zaunk ani bhavarthachi xikovnn diunk vinchun kaddleant.
12. Hea vorgunnancho xevôtt mhollear ho: bhoktank Devachê sevek toiar korunk ani oxem Kristachi Kudd bandun haddunk.
13. Oxem okherek ami sogllim, Devachea Putacher bhavarth tthevlolim ani Tachi podvi onnbhovunk pavlolim mon'xam, sarkinch êk zatoleanv; ani Kristachê poripurnntaient odik-odik vaddon, aminch Tachê poripurnntaiechea mapak vaddlolim mon'xam zaunk pavtoleanv.
14. Tednam ami anink dhakttulea bhurgeam bhaxen zaunchim nanv; fottkirim mon'xam herank-ui teach fottinchea margar oddun vhorunk apli naddbudhichi xikovnn gheun ietolim, punn ami toslê xikovnnechea lharancher lotton vechim nanv; ani koslea-i vareachê funkin ami halchim-dholchim nanv.
15. Portench zalear, mogan sotachi vatt dhôrun, Kristacho akar purteponnim ghei-sôr sogllea vattamnim ami vaddot vetoleanv. Povitr-Sobha Tachi Kudd ani To hê Kuddichem Mostok:
16. Toch ak'khê Kuddiche veg-veglle sandhe ap-aplea zagear ghalun choloita ani ekamekak ekvottaun dhôrta; oxem êk-êk sandho ap-aplem kam korunk pavta ani Kuddichi ghottai vaddoita. Hê porim ak'khi Kudd choddot-vaddot moga vorvim sarki bandon ieta.
17. Mhonnttôch atam hanv tumkam sangtam ani Somiachea ekvottant oso tumkam ulo martam: hea fuddem anink videxiam porim jieum nakat; tanchem mon polkem, tanchea gineanacher kallôkh poddlolo asa; aplim kallzam tãnnim nibor keleant dekhun, tankam sotachi vollokh na, ani hea pasot Devachea jivitant tankam vantto na.
19. Vaitt kortubanchi soglli loz ani khônt soddun, kamchari jivitant tim buddleant ani sogllea jin'sachim pozddim kortubam korit asat.
20. Krista vixim osli xikovnn tumi gheunk na,
21. kiteak dubava virêt Jezu sovem asa tem sot tumkam porgôttlam ani xikoilam.
22. Mhonnttôch tumchea adlea jivitachi chal tumi sôddun diunk zai; khottea vondovnniam vorvim padd zait veta tem tumchem adlem-pornnem patki soimb sôddun diunchem.
23. Tumchea kallzachi ani monachi sarki novsornni korat,
24. ani Devachea sarkeachim rochlolim, Taka manta toslea jivitachim ani povitrtaien cholpi novim mon'xam zaiat.
25. Mhonnttôch fôtt marop sarkench sôddat; ekameka lagim sot tench uloiat, kiteak ami ekamekache sandhe.
26. Rag tumkam ietoloch, tôri ragak lagun patok korinakat; vêll poddo-sôr rag dhôrun ravum nakat;
27. na tôr tumchea kallzant devcharak rig dixat.
28. Chori korchi sonvoi asli tannem anink choriô korcheô nhoi, punn aplea hatamnim koxtt korun koslo tôri boro vavr korcho, ani oso gorjevontak adar diunk tachê lagim kitem tôri astolem.
29. Tumchea tonddantlim bhair sortat tim utram bemoriadichim zaunchim nhoi; portench zalear, aikotoleank soega pormannem bori dêkh ditat ani faideak poddtat toslim zaunchim tumchim utram.
30. Devachea Povitr Atmeak khônt dium nakat, kiteak ho Atmo Devanuch tumcher marlolo xik'ko, purnn suttkechea Disa tumi Devachinch mhonn khunnaunk dil'lo xik'ko.
31. Soglli kôddsann kallzantli bhair ghalat; rag ani krôdh monant dhôrunkuch nakat; bob marum nakat; jastiô marop bond korat; sogllê torechem khotteponn sôddun diat.
32. Ekameka thaim doiall-movall kallzachim zaiat. Krista sovem Devan tumkam bhogxilim, têch bhaxen tumi-i ekamekak bhôgsat.
