1. Paulu, Devachê khuxen Jezu Kristacho Dhormdut, Efezant Jezu Kristacher bhavarth dovortolea Devachea bhoktank hem potr boroita.
2. Deva amchea Bapachi ani Somia Jezu Kristachi doiallai ani xanti tumkam.
3. Jezu Kristachea Devak, amchea Somiachea teach Bapak, vakhannum-ia, dhinvasum-ia. Krista sovem amcher sorgincho Aplo axirvad, sogllim atmik vordanam, To subhamponnan denvoit asa.
4. Sonvsar rochchê adim Tannem Krista sovem amkam maiêmogan vinchun kaddlim: povitr ani patka mekllim Tachê mukhar asun, ami
5. Tachê doiallaient fankta tê mhoimechi kirti korunk Jezu Krista sovem Aplim apnnailolim bhurgim ami zaunchim mhonnun Tannem adim-fuddench tharav ghetlo: oxem Taka borem dislem, hich ti Tachi moga-ievzônn. Pritivonta Puta sovem udar mogachem hem dennem funkea amkam favô kelem.
7. Tachê sovem, Tacheach rogtan, amkam atam mell'lli soddvônn, amchim patkam bhogsun gelim. Kitli vorti, kitli girest
8. amkam Tannem bhôgunk dil'li Tachi doia, Tachi priti! Tachê buddhik par na, xim na! Tthav-naslolem Tachem ginean!
9. Aplê khuxecho gutt Tannem amkam ukto korun dilo: adim fuddench bholeponnan Apnnem Krista sovem tharailoli ievzônn amkam dokhol korun porgôtt keli.
10. Kallam-iuganchê sompadnnek Kristak Mostok korun, sorgar prithver asa titlem Tachêch adhin ektthaim korchem: hich ti Tachi moga-ievzônn.
11. Apnnachêch khuxê pormannem Zo ekloch sogllem ievjita, Zo ekloch sogllem tharaita, Tannench amkam[Judêv lokak] Jezu sovem Aplim mhonnun Aplea sasnnant nirmun haddlim.
12. Tachi mhoima ami kirtunk ho Krist ieunchê fuddem Tacher bhorvanso tthevloli porza rochun haddchea monan Tannem adinch amkam nemlim.
13. Kristachea ekvottant atam tumi-i bhitôr sorleant, kiteak tumi-i[videxiamnim] sotacho sondêx aikola, soddvonnechem Xubhvortoman bhavarth dhôrun manun ghetlam. Tumi-i Aplim mhonn dakhouncheak Devan tumcher xik'ko marla: Bhasailolo Povitr Atmo Tannem tumcher dhaddun dila.
14. Amkam dovril'lea daizacho khud Povitr Atmo isaro. Hem daiz amkam mell'llea uprant Tachê mhoimechi vakhann'nni ami sasnnak korchê khatir amkam sarkinch Aplim korun Dev ditolo sopurnn suttka!
15. Hea pasot, Somia Jezucher tumi bhavarth dovorla ani sogllea bhoktancho tumi môg kortat mhonn hanvem aikolam
16. tê meren tumchê khatir hanv Devak argam diit asam, ani mhojea magnneamnim hanv tumcho ugddas korit asam.
17. Amchea Somia Jezu Kristacho Dev, mhoimevont Bap, Tachi poripurnn vollokh tumkam mellchê khatir, Aplo zannvaiecho ani prokasnnecho Atmo tumkam dium.
18. Koslea unch bhorvanxeak Devan tumkam apoileant! Kedi vhôdd mhoimechi girestkai daiz koxem Aplea bhoktank Tannem samballun dovorlea! Mit-mer nasloli, amam bhavarthiam sovem Tachem boll dokhol korta ti, Tachi podvi! Hem sogllem tumi vollkhunk pavchê khatir tumchea gineanachea dolleank Dev uzvadd dium. Jednam Kristak Devan mel'leantlo punorjivont kelo ani sorgar Aplea uzveak taka bosoilo, tednam Tannem Krista sovem ti Apli podvi vaporli.
21. Thoim sorgar sogllea sorginchea pordhanam, odhikariam, podviam ani rajeam vôir, toxench atanchea vô fuddlea iugantlea kosli-i sot'tia aslolea xrextt nanvacher, Devan Kristak odhikar dilo.
22. Devan soglleô vostu Kristachea pãiam tolla ghaleat ani sogllea vôir ubarun Taka Povitr-Sobhechem Mostok korun dila.
23. Ti tachi Kudd, Tachi poripurnntai: Zo ak'khi srixtti poripurnn korit asa, Tachich poripurnntai ti.
