1. Tumi Devachim opurbaiechim bhurgim dekhun, Tachi dêkh gheiat.
2. Kitlo mhonn Kristan tumcho môg kelo! Amchê khatir Tannem, Devak manpachem, domdomit pormollachem, Apnnachench somorponn ani bolidan kelem; tôr tumi-i Tachêch bhaxen mogan cholat.
3. Kamcharachi, soddeponnachi ani sonvsari vostunchê bhagonaslolê axechi gozal porian tumchê modem aschich nhoi, kiteak osleô vostu bhoktank sobonant.
4. Toxench aschem nhoi mhellem vô burxem ulovop ani bemoriadichim fokannam: hem sogllem tumkam puttvona; urfattim, tumchim utram zaum-di Devak dhinvas diupachim.
5. Hem mat monant dhôrat: kamchari mon'xank, pozddea lokak, sonvsari vostunchi odik-odik axa dhôrunuch jietat tankam, Kristachea ani Devachea rajeant daiz na. (Osli sonvsari vostunchi axa khorench mhollear kud'dea devanchi puza.)
6. Polkea utramnim konnench tumkam fosoina zaunk chotrai dhôrat. Osleanch vostunk lagun Devak khaltim ravonant tea mon'xancher Tacho krôdh denvun ieta.
7. Oslea mon'xanchea bhaga tumi poddum nakat.
8. Eka kallar tumi-i kallokhant asleat, punn atam Somiachea ekvottant tumi uzvaddak pavleant; tôr uzvaddachea bhurgeanchi chal dhôrat;
9. khorench, uzvaddachim kamam sogllea jin'sachem boreponn, promannikponn ani sot.
10. Somiak kitem odik manta tem sôdun kaddat.
11. Ani kallokhachim holkim kortubam kortoleam kodde kosloch sombond dovrum nakat; portench zalear, tanchem patok tankam dakhoun diat.
12. Guptim kortat tea kortubanchi khobor porian korunk loz dista.
13. Punn uzvaddak haddtat teô soglleô vôstu kosleô teô sarkeô kollon ietat; ani kosli-i vost uzvaddak haddtôch, ti apunnuch uzvadd zata.
14. Dekhun Povitr Pustokar oxem mhonnlolem asa: "Nhidleant tim zaiat zagim, utthun ieiat mel'leantlim, Kristacho prokas tumchê vôir porzolltolo."
15. Mhonnttôch tumchea jivitachi chal kosli ti mhenotin polleiat, ani nennar mon'xanchi nhoi punn xanneam mon'xanchi tumchea jivitachi chal zaum-di.
16. Hea kallar vaitt khub vaddlam, dekhun tumi tumkam dil'lea vellacho zata titlo faido kaddat.
17. Chotraien cholonant toslim mon'xam zaum nakat, punn Somiachi khuxi konn ti sôdun kaddat.
18. Soro pieun bebdikai korum nakat, oxem tumi tumchea jivitachi vatt laitoleat. Portench zalear, Povitr Atmean bhòrlolim mon'xam zaiat.
19. Tumchea zomatimnim stotram, gitam ani bhoktichim gaionam gaiat ani tumchea kallzamnim gitam-gaionam korun Somiak vakhannit ravat.
20. Amchea Somia Jezu Kristachea Nanvan Devak, amchea Bapak, sodanch ani sogllê svater dhinvaxit ravat.
21. Tumi Kristak man ditat mhonn dakhounk ekamekak khaltim zaiat.
22. Bailô aplea ghovank khalteô zauncheô ani oxem apunn Somiak khalteô asat mhonn tãnnim dakhounchem.
23. Kiteak, zoso Kristak, Aplê Kuddichea mhonngê Povitr Sobhechea Soddvonnarak, ticher odhikar asa, toso ghovak aplê bailecher odhikar asa.
24. Ani oxem, zoxi Povitr-Sobha Kristak khalti asa, toxeô bailô aplea ghovank sogttant khalteô asunk zai.
25. Tumi potimnô, aikat: zoso Kristan Povitr-Sobhecho môg kelo ani tichê khatir Aplo jiv dilo, toxench tumi tumchea potinnincho môg korat.
26. Udkachea snanan, tacher ucharlolea sobdachea bollan, Tannem tika nitôll-nirmôll korun Devak bhettoili;
27. Povitr-Sobhek sundôr-sobit korun, Tannem tika Apnna mukhar ubi keli! Khot nasloli, miri nasloli, koslich khôdd nasloli, povitr ani nixkollonk Tannem tika keli!
28. Hêch porim, aplo môg kortat toso, potimnim aplea potinnincho môg korunk zai. Aplê potinnicho môg korta to aploch môg korta.
29. Konnuch monis aplê kuddicho dvês korina, punn ti pôsta ani ticho poramôs korta; Krist-ui Povitr Sobhê thaim toxench korta,
30. kiteak ami Tachê kuddiche sandhe.
31. Dekhun dadlo aplea avoi-bapaik sanddtolo ani aplê potinnik ekvott'tolo ani tim dogam-i êk zatolim.
32. Povitr Pustokantlea hea utramnim ek unch molachem gupit sot attaplolem asa: tem Kristak ani Povitr-Sobhek lagu zata mhonn hanv dhôrtam.
33. Punn tim utram tumkam-i lagu zatat: mhonnttôch tumchê modlea zonn-eklean, aplo môg korta toso, aplê potinnicho korcho, ani potinnin aplea potik man diuncho.
